Spirituality: జుట్టు విరబోసుకుని తిరుగుతున్నారా, అసలు జడ ఎందుకు వేసుకోవాలో తెలుసా!

ఇప్పుడంటే జుట్టు విరబోసుకోవడం ఓ ఫ్యాషన్ అయిపోయింది కానీ అప్పట్లో జుట్టు విరబోసుకోవడం అంటే అపచారం, అశుభానికి సంకేతం. అసలు జడ ఎందుకు వేసుకునేవారు, జడ వెనుకున్న ఆంతర్యం ఏంటో తెలుసా..

Hindu Traditions

నడుముదాటి జడ అల్లుకున్న అమ్మాయిని చూసి ముచ్చటపడని మగవారుంటారా? సంచెడు డబ్బులతో కానిపని...గుప్పెడు మల్లెపూలతో అవుతుందన్న సామెత కూడా జడను చూసే పుట్టుకొచ్చిందేమో. అయితే ఇప్పటి జనరేషన్లో అసలు జడ వేస్తున్న వారెంతమంది ఉన్నారు ? . జుట్టుని చిన్నగా కట్ చేసుకుని క్లిప్పో, రబ్బరు బ్యాండో పెట్టి వదిలేస్తున్నారు. లేదంటే కట్ చేసి పోనీ టైల్ అంటున్నారు. దాదాపు 70% అమ్మాయిలైతే జుట్టు విరబోసుకునే తిరుగుతున్నారు. చివరకు పెళ్లిళ్లలో కూడా వాలు జడల ప్లేస్ లో  రెడీమేడ్ జడలు వచ్చి చేరాయి. అసలు జడ ఎందుకు వేస్తారో తెలుసా. 

సాధారణంగా జడని మూడు రకాలుగా వేసుకునేవారు...
 1.రెండు జడలు వేసుకోవడం  2.ఒక జడ వేసుకోవడం 3.ముడి పెట్టుకోవడం

• జుట్టుని నచ్చినట్టు జడ వేసుకోవడం కాదు...వయసుని బట్టి అల్లుకునేవారు
• ఆడపిల్లలు రెండు జడలు వేసుకుంటే ఆమె ఇంకా చిన్న పిల్ల అని, పెళ్లి కాలేదని అర్ధం. ఆ అమ్మాయిలో జీవేశ్వర సంబంధం విడి విడిగా ఉందని అర్థం
• పెళ్లైన మహిళలు మొత్తం జుట్టుని ఒకటే జడగా వేసుకునే వారు. అంటే ఆమె తన జీవేశ్వరుడిని చేరి వివాహం చేసుకుని భర్తతో కలిసి ఉంటోందని అర్ధం
• జుట్టుని ముడి వేసుకుని కొప్పులా పెట్టుకుందంటే ఆమెకు సంతానం కూడా ఉందని, అన్ని బాధ్యతలను మోస్తూ గుట్టుగా ముడుచుకుంది అర్ధం
• ఒక జడ వేసుకున్నా, రెండు జడలు వేసుకున్నా.. చివరకు కొప్పు పెట్టుకున్నా కూడా జుట్టుని మూడు పాయలు గా విడతీసి త్రివేణీసంగమం లా కలుపుతూ అల్లేవారు. ఈ మూడు పాయలకు రకరకాల అర్ధాలు చెబుతారు పెద్దలు.

                1.  తానూ, భర్త, తన సంతానం అని ఈ మూడు పాయలకు అర్ధం 

                2. సత్వ, రజ, తమో గుణాలు 

                3.జీవుడు, ఈశ్వరుడు, ప్రకృతి అన్న అర్ధాలు కూడా ఉన్నాయంటారు. 

అమ్మాయిలు వేసుకున్న జడని బట్టి వారు పెళ్లైన వారా, పెళ్లికానివారా, పిల్లలు ఉన్నారా-లేరా అనే విషయం తెలిసిపోయేది. హిందువులు పాటించే ప్రతి పద్ధతిలో ఇంత అర్థం ఉంది కాబట్టే మన సంస్కృతి సంప్రదాయాలపై విదేశీయులకు మక్కువ పెరుగుతోంది.  

జుట్టు విరబోసుకుంటే
జుట్టు విరబోసుకుంటే పిశాచాలకు ఆహ్వానం పలకడమే అంటారు పండితులు. తలకి స్నానం చేసిన తర్వాత కూడా జుట్టు ఆరేలోగా కనీసం చివర్లైనా ముడివేయాలంటారు. జుట్టు విరబోసుకుని, క్లిప్పులు పెట్టుకుని దేవాలయానికి వెళ్లారాదంటారు. అలా చేస్తే జ్యేష్టా దేవి మీ వెంటే ఉంటుందట. మరి దేవతా ప్రతిమల్లో అమ్మవారు జుట్టు విరబోసుకుని ఉంటారెందుకు అనే క్వశ్చన్ రావొచ్చు... దానికి సమాధానం ఏంటంటే..ఏ దేవతా రూపమైన ఆది పరాశక్తి స్వరూపమే. దేవీ భాగవత అంతర్భాగంగా చూస్తే పరాశక్తి నిర్గుణ స్వరూపం. సత్వ,రజో,తమో గుణాలు ఆమెలో ఉండవు.  అమ్మవారు కామాన్ని హరించేది..అందుకే దేవతలకు ఈ నియమం వర్తించదు.