Vizag Data Center Pollution Controversy: హైదరాబాద్‌లో డేటాసెంటర్లు మంచివి అయితే విశాఖలో కాలుష్యమా? - ఇలా ఎందుకు ఉద్యమాలు జరుగుతున్నాయి?
Andhra Pradesh Data Centers: విశాఖలో డేటా సెంటర్లపై పర్యావరణ నిరసనలు, తెలంగాణలో మద్దతు. ఏపీలో పెట్టుబడులను అడ్డుకునే రాజకీయాలు నడుస్తున్నాయా?
AP Politics Investments vs Protests 2026: విశాఖపట్నంలో ప్రతిపాదిత బిగ్ డేటా సెంటర్లు కాలుష్యానికి, నీటి కొరతకు దారితీస్తాయంటూ కొన్ని పర్యావరణ పరిరక్షణ సంఘాలు, ప్రతిపక్ష మద్దతుదారులు సెమినార్లు, నిరసనలు నిర్వహిస్తుండటం హాట్ టాపిక్‌గా మారింది. అదే సమయంలో, హైదరాబాద్‌తో పాటు పరిసర ప్రాంతాల్లో విస్తరిస్తున్న భారీ డేటా సెంటర్లకు తెలంగాణలో పెద్దగా వ్యతిరేకత కనిపించడం లేదు. ఒకే రకమైన ప్రాజెక్టులకు రెండు పొరుగు రాష్ట్రాల్లో ఈ స్థాయిలో భిన్నమైన వాతావరణం కనిపించడం వెనుక సాంకేతిక కారకాల కంటే రాజకీయ , సామాజిక సమీకరణాలే ఎక్కువగా పనిచేస్తున్నాయని భావిస్తున్నారు.
డేటా సెంటర్లకు అవసరమైన వాటిపై తప్పుడు ప్రచారాలు
ముఖ్యంగా విశాఖలో స్థానిక భౌగోళిక పరిస్థితులు, నీటి వనరుల లభ్యతపై వస్తున్న ఆందోళనలను కొందరు కాలుష్య కోణంలో చిత్రీకరించే ప్రయత్నం చేస్తున్నారు. డేటా సెంటర్ల నిర్వహణకు భారీగా సర్వర్ల కూలింగ్ కోసం నీరు, నిరంతర విద్యుత్ అవసరమవుతాయి. ఇప్పటికే తాగునీటి సరఫరాపై ఒత్తిడి ఉన్న వైజాగ్ నగరంలో ప్రైవేట్ ప్రాజెక్టులకు నీటి కేటాయింపులు చేస్తే భవిష్యత్తులో స్థానిక ప్రజలకు ఇబ్బందులు వస్తాయని, ప్రాజెక్టుల వల్ల స్థానికంగా ఉద్యోగావకాశాలు తక్కువగా ఉంటాయనే ప్రచారాన్ని కొన్ని సంఘాలు ముందు వరుసలో నిలబెడుతున్నాయి. అయితే, ప్రభుత్వం మాత్రం ఈ వాదనలను తీవ్రంగా ఖండిస్తూ.. పొలవరం పారిశ్రామిక కేటాయింపుల ద్వారా డేటా సెంటర్లకు ప్రత్యేకంగా నీటిని ఇస్తామని, తాగునీటి సరఫరాకు ఎలాంటి ముప్పు ఉండదని స్పష్టం చేస్తోంది.
హైదరాబాద్‌లో భారీ డేటా సెంటర్
అయితే తెలంగాణ విషయానికి వస్తే, హైదరాబాద్ ఇప్పటికే ప్రపంచ స్థాయి పారిశ్రామిక, ఐటీ మౌలిక వసతులతో సిద్ధంగా ఉంది. హైదరాబాద్ చుట్టుపక్కల డ్రై లాండ్స్ ఎక్కువగా ఉండటం, కృష్ణా-గోదావరి నీటి కేటాయింపుల నెట్‌వర్క్ వ్యవస్థీకృతంగా ఉండటంతో అక్కడ పర్యావరణ ముప్పు అనే ప్రచారం రూపుదిద్దుకోలేదు. పైగా గత దశాబ్ద కాలంగా హైటెక్ ఐటీ హబ్‌గా ఎదిగిన హైదరాబాద్‌లో డేటా సెంటర్ల నిర్మాణం అనేది అభివృద్ధిలో ఒక భాగమనే స్పృహ ప్రజల్లో బాగా పాతుకుపోయింది. ప్రతిపక్షాలు కూడా పెట్టుబడుల కల్పన, ఉపాధి ప్రాజెక్టులపై నిరసనలు చేయడం ద్వారా పొలిటికల్ మైలేజ్ రాదని భావించి మౌనంగా ఉంటున్నాయి.
ఏపీలో పెట్టుబడులపై వ్యతిరేక ప్రచారం
ఆంధ్రప్రదేశ్‌లో మాత్రం పెట్టుబడుల చుట్టూ క్రమం తప్పకుండా పొలిటికల్ నెరేటివ్ నడవడం పాత ముచ్చటే. గతంలో కూడా విశాఖపట్నం, అమరావతి, రాయలసీమకు వచ్చే భారీ ప్రాజెక్టుల విషయంలో అధికార-ప్రతిపక్షాల మధ్య తీవ్ర స్థాయి రాజకీయం నడిచింది. ప్రభుత్వం మారినప్పుడల్లా ముందటి నిబంధనలను సవరించడం , ప్రాజెక్టులపై రీ-లాంఛ్ లేదా విచారణలు జరిపించిన చరిత్ర ఉంది. ఈ రాజకీయ అస్థిరత వల్లే కొందరు వైజాగ్ డేటా సెంటర్ల కాలుష్యం, సోర్సెస్ కరిగిపోతున్నాయంటూ ప్రచారం చేసి ప్రభుత్వంపై విమర్శలు చేయడానికి ఈ వేదికను వాడుకుంటున్నారనే ఆరోపణలు వస్తున్నాయి.
ఇన్వెస్టర్లతో మైండ్ గేమ్ ఏపీకే నష్టం
ప్రకృతి వనరుల సంరక్షణకు ప్రాధాన్యం ఇవ్వడం సమంజసమే అయినప్పటికీ, ఏపీకి వచ్చే గ్లోబల్ ఇన్వెస్ట్‌మెంట్లను అడ్డుకునే విధంగా కాలుష్య భయాలు సృష్టించడం వల్ల రాష్ట్ర ఇమేజ్ దెబ్బతినే ప్రమాదం ఉంది. సాంకేతికంగా చూస్తే, ఆధునిక డేటా సెంటర్లు ఎయిర్-కూలింగ్ విధానాలు, రీసైకిల్డ్ వాటర్ , గ్రీన్ ఎనర్జీని ఎక్కువగా వాడుతున్నాయి. అందువల్ల, ప్రభుత్వం పారదర్శకంగా పర్యావరణ నివేదికలను ప్రజల ముందుకు తెచ్చి, మైండ్ గేమ్‌లు , రాజకీయ విమర్శలకు చెక్ పెట్టకపోతే.. ఏపీకి రావాల్సిన గ్లోబల్ ఐటీ దిగ్గజాలు పక్క రాష్ట్రాలకు తరలిపోయే ప్రమాదం ముంచుకొస్తుంది.
టాప్ హెడ్ లైన్స్
ట్రెండింగ్ వార్తలు
