Karimnagar Jeevan Reddy: బీఆర్ఎస్లో కేకే పదవి జీవన్ రెడ్డికి - కోడలికి టిక్కెట్ కూడా - సీనియర్కు తగ్గ డీలేనా?
Jeevan Reddy: జీవన్ రెడ్డి వంటి ఉద్ధండుడైన నేతను పార్టీలోకి ఆహ్వానించేందుకు బీఆర్ఎస్ అధినేత కేసీఆర్ భారీ ఆఫర్లు ప్రకటించినట్లు తెలుస్తోంది. సెక్రటరీ జనరల్ పదవితో పాటు ఆయన కోడలికి టిక్కెట్ ఆఫర్ చేశారు
Jeevan Reddy BRS: తెలంగాణ రాజకీయాల్లో అత్యంత సీనియర్ నేత, దశాబ్దాల కాలం పాటు కాంగ్రెస్ జెండా మోసిన తాటిపర్తి జీవన్ రెడ్డి పార్టీని వీడటం ఇప్పుడు రాష్ట్ర రాజకీయాల్లో పెను సంచలనంగా మారింది. దాదాపు 42 ఏళ్ల సుదీర్ఘ రాజకీయ ప్రస్థానం తర్వాత, కాంగ్రెస్ సీనియర్ నేత జీవన్ రెడ్డి ఆ పార్టీకి గుడ్ బై చెప్పారు. కేవలం పార్టీని వీడటమే కాకుండా, తన తదుపరి రాజకీయ ప్రయాణాన్ని భారత్ రాష్ట్ర సమితి తో కొనసాగించాలని ఆయన నిర్ణయించుకున్నట్లు విశ్వసనీయ సమాచారం. ముఖ్యంగా జగిత్యాల రాజకీయాల్లో తన ప్రత్యర్థిగా ఉన్న సంజయ్ కుమార్ను కాంగ్రెస్లోకి చేర్చుకోవడం, తన అనుచరుడి హత్య జరిగినప్పుడు ప్రభుత్వం స్పందించిన తీరుపై తీవ్ర మనస్తాపానికి గురైన జీవన్ రెడ్డి.. గౌరవం లేని చోట ఉండలేను అని తెగేసి చెప్పారు.
బీఆర్ఎస్ బంపర్ ఆఫర్ - కేకే పోస్టు జీవన్ రెడ్డికి?
జీవన్ రెడ్డి వంటి ఉద్ధండుడైన నేతను పార్టీలోకి ఆహ్వానించేందుకు బీఆర్ఎస్ అధినేత కేసీఆర్ భారీ ఆఫర్లు ప్రకటించినట్లు తెలుస్తోంది. గతంలో కె. కేశవరావు నిర్వహించిన సెక్రటరీ జనరల్ పదవిని జీవన్ రెడ్డికి అప్పగించాలని గులాబీ బాధ్యులు భావిస్తున్నారు. పార్టీలో ఆయన సీనియారిటీకి తగిన గుర్తింపు ఇవ్వడం ద్వారా, కాంగ్రెస్ బాధితులందరికీ బీఆర్ఎస్ అండగా ఉంటుందనే సంకేతాన్ని పంపాలని కేసీఆర్ వ్యూహంగా కనిపిస్తోంది. అంతేకాకుండా, ఆయన చిన్న కోడలికి వచ్చే ఎన్నికల్లో అసెంబ్లీ టిక్కెట్ ఇచ్చేందుకు కూడా పార్టీ సుముఖత వ్యక్తం చేసినట్లు సమాచారం.
బీజేపీ ఆఫర్ ఇచ్చినా.. ప్రాంతీయ పార్టీకే మొగ్గు
జీవన్ రెడ్డిని తమ పార్టీలోకి లాగేందుకు భారతీయ జనతా పార్టీ కూడా గట్టిగానే ప్రయత్నించింది. అయితే, జాతీయ పార్టీల తీరుపై విరక్తి చెందిన ఆయన, ప్రాంతీయ పార్టీలోనే తనకు మరియు తన అనుచరులకు సరైన రక్షణ ఉంటుందని భావిస్తున్నారు. ముఖ్యంగా ఈటల రాజేందర్ వంటి బలమైన నేతలు బీజేపీలో చేరిన తర్వాత అక్కడ ఎదుర్కొంటున్న పరిస్థితులు, వారి ప్రాధాన్యత తగ్గడాన్ని జీవన్ రెడ్డి నిశితంగా గమనించినట్లు తెలుస్తోంది. జాతీయ పార్టీల్లో చేరి దిక్కులేకుండా పోవడం కంటే, ప్రాంతీయ పార్టీలో ఉండి సొంత గడ్డపై పోరాడటమే మిన్న అనే అభిప్రాయానికి ఆయన వచ్చినట్లు సన్నిహితులు చెబుతున్నారు.
రేవంత్ రెడ్డిపై యుద్ధం ప్రకటించిన సీనియర్
తన రాజీనామా సమయంలో జీవన్ రెడ్డి ముఖ్యమంత్రి రేవంత్ రెడ్డిపై ఘాటు విమర్శలు చేశారు. పదేళ్లు ప్రతిపక్షంలో ఉండి లాఠీ దెబ్బలు తిన్న కార్యకర్తలను కాదని, పార్టీని ఇబ్బంది పెట్టిన బీఆర్ఎస్ ఎమ్మెల్యేలను చేర్చుకోవడాన్ని ఆయన తప్పుపట్టారు. తాను కేవలం పదవుల కోసం ఆశపడటం లేదని, ఆత్మగౌరవం కోసమే ఈ నిర్ణయం తీసుకున్నానని స్పష్టం చేశారు. జగిత్యాల కోటలో ఇకపై కాంగ్రెస్కు వ్యతిరేకంగా ఆయన చేసే పోరాటం ఆసక్తికరంగా మారనుంది. జీవన్ రెడ్డి నిష్క్రమణ కాంగ్రెస్కు, ముఖ్యంగా ఉత్తర తెలంగాణలో పెద్ద దెబ్బ అనే చెప్పాలి. ఉమ్మడి కరీంనగర్ జిల్లాలో ఆయనకు ఉన్న పట్టు, సామాజిక వర్గ సమీకరణాలు బీఆర్ఎస్కు ప్లస్ అయ్యే అవకాశం ఉంది.
టాప్ హెడ్ లైన్స్
ట్రెండింగ్ వార్తలు
