Tirumala: క‌ల్ప‌వృక్ష వాహనంపై రాజమన్నార్ వైభోగం, దర్శించుకుంటే చాలు ఆకలిదప్పులుండవ్!

Chinna Sesha Vahana Seva: బ్రహ్మోత్సవాల్లో భాగంగా నాలుగోరోజు ఉదయం స్వామివారు క‌ల్ప‌వృక్ష వాహనంపై రాజమన్నార్ గా దర్శనమిచ్చారు.

Sri Malayappa in Rajamannar Alankaram on Kalpavriksha Vahanam.

తిరుమల శ్రీ వేంకటేశ్వరస్వామివారి బ్రహ్మోత్సవాల్లో నాలుగో రోజైన సెప్టెంబర్ 27 శనివారం ఉదయం మలయప్ప స్వామివారు ఉభయదేవేరులతో కలిసి రాజమన్నార్ అలంకారంలో క‌ల్ప‌వృక్ష వాహనంపై భక్తులను క‌టాక్షించారు.

వాహనం ముందు గజరాజులు నడుస్తుండగా, భక్తజన బృందాలు భజనలు, కోలాటాలు, జీయ్యంగార్ల ఘోష్టితో స్వామివారిని కీర్తిస్తుండగా, మంగళవాయిద్యాల నడుమ స్వామివారి వాహనసేవ కోలాహలంగా జరిగింది.

భక్తులు అడుగడుగునా కర్పూరహారతులు సమర్పించి శ్రీవారిని దర్శించుకున్నారు.

క్షీరసాగరమథనంలో విలువైన వస్తువులెన్నో ఉద్భవించాయి. వాటిలో క‌ల్ప‌వృక్షం ఒకటి. ఈ చెట్టు నీడన చేరిన వారికి ఆకలిదప్పులుండవు.

ఇతర వృక్షాలు తాము కాచిన ఫలాలు మాత్రమే ప్రసాదిస్తాయి. కానీ క‌ల్ప‌వృక్షం కోరుకున్న‌ ఫలాలన్నింటినీ ప్రసాదిస్తుంది.

క‌ల్ప‌వృక్ష‌ వాహనాన్ని అధిరోహించిన స్వామివారిని దర్శించుకుంటే ఆహారానికి లోటుండదని భక్తుల విశ్వాసం

నాలుగోరోజు రాత్రి 7 నుంచి 9 గంటల వరకు స‌ర్వ‌భూపాల వాహనంపై శ్రీవారు అభయం ఇస్తారు

తిరుమల శ్రీ వేంకటేశ్వరస్వామివారి బ్రహ్మోత్సవాల్లో భక్తుల సందడి

వాహ‌న‌సేవ‌లో తిరుమ‌ల పెద్ద‌జీయ‌ర్‌స్వామి, చిన్న‌జీయ‌ర్‌స్వామి, టీటీడీ ఛైర్మ‌న్ బీఆర్ నాయుడు, ఈవో శ్రీ అనిల్‌కుమార్ సింఘాల్‌, రాజ్యసభ సభ్యులు శ్రీ వేమిరెడ్డి ప్రభాకర్ రెడ్డి, ప‌లువురు బోర్డు స‌భ్యులు సహా ఇత‌ర అధికారులు పాల్గొన్నారు.