Sadan Hasan: అలీ ఫ్యామిలీ నుంచి మరొక హీరో - 'ప్రణయ గోదారి' సాంగ్ విడుదల చేసిన కోటి

Pranaya Godari Movie: ప్రముఖ హాస్య నటుడు, హీరో అలీ ఫ్యామిలీ నుంచి మరొక హీరో వస్తున్నాడు. ఆయన బంధువు సదన్ హాసన్ 'ప్రయాణ గోదావరి' సినిమాతో హీరోగా పరిచయం అవుతున్నాడు. అందులో పాటను కోటి విడుదల చేశారు.

'ప్రణయ గోదారి' సినిమాలో సదన్ హాసన్, ప్రియాంక ప్రసాద్

టాలీవుడ్ టాప్ కమెడియన్, ఒకప్పటి హీరో అలీ బంధువు సదన్ హాసన్ హీరోగా పరిచయం అవుతున్నారు. 'ప్రణయ గోదారి' సినిమాలో ఆయన కథానాయకుడిగా నటిస్తున్నారు. ఈ చిత్రానికి పీఎల్ విఘ్నేష్ దర్శకత్వం వహిస్తున్నారు. ఇదొక ఫీల్ గుడ్ ఎంటర్టైనర్.

Music Director Koti launched Pranaya Godari song: 'ప్రణయ గోదారి' సినిమాలో 'కలలో కలలో' అంటూ సాగే గీతాన్ని ఇటీవల ప్రముఖ సంగీత దర్శకుడు కోటి చేతుల మీదుగా విడుదల చేశారు. అనంతరం ఆయన మాట్లాడుతూ... ''ఈ పాట చూస్తే... ఒక ఫ్రెష్ ఫీలింగ్ కలిగింది. అన్ని వర్గాల ప్రేక్షకులను మెప్పించేలా పాటను చిత్రీకరించారు. సాహిత్యం, బాణీ, నటీనటుల వేషధారణ అంతా పల్లెటూరి నేపథ్యం ప్రతిబింబించేలా ఉన్నాయి. చిత్ర బృందం అందరికీ ఆల్ ది బెస్ట్'' అని చెప్పారు.

'ప్రణయ గోదారి' సినిమాలో 'కలలో కలలో...' పాటను ప్రముఖ గాయకుడు శ్రీకృష్ణ ఆలపించారు. ఈ పాటకు మార్కండేయ సాహిత్యంతో పాటు సంగీతం అందించారు.

'ప్రణయ గోదారి'లో సదన్ హాసన్ సరసన ప్రియాంకా ప్రసాద్ కథానాయికగా నటించారు. ఇతర ప్రధాన పాత్రల్లో సునీల్ రావినూతల, '30 ఇయర్స్' పృథ్వీ, డైలాగ్ కింగ్ సాయి కుమార్ ప్రధాన పాత్రల్లో నటించారు. పిఎల్‌వి క్రియేషన్స్‌ పతాకంపై పారమళ్ళ లింగయ్య ప్రతిష్టాత్మకంగా నిర్మిస్తున్నారు.

'ప్రణయ గోదావరి' నిర్మాత పారమళ్ళ లింగయ్య మాట్లాడుతూ... ''ప్రస్తుతం పోస్ట్ ప్రొడక్షన్ పనులు శరవేగంగా జరుగుతున్నాయి. 'కలలో కలలో...' పాట ఇద్దరు ప్రేమికుల నేపథ్యంలో తెరకెక్కించాం. గోదావరి అందాలు, సహజమైన లొకేషన్లలో పాటను తెరకెక్కించాం'' అని చెప్పారు. 

'ప్రణయ గోదారి' చిత్రానికి ఛాయాగ్రహణం: ఈదర ప్రసాద్, నృత్య దర్శకత్వం: కళాధర్ - మోహన కృష్ణ - రజిని, కూర్పు: కొడగంటి వీక్షిత వేణు, కళా దర్శకత్వం: విజయకృష్ణ.