ఇలా అయితే ఇండియా నుంచి వెళ్లిపోతాం, ఐటీ రూల్స్‌పై వాట్సాప్ తీవ్ర అసహనం

WhatsApp: ఐటీ చట్టంలోని రూల్స్‌పై తీవ్ర అసహనం వ్యక్తం చేసిన వాట్సాప్ ఇలా అయితే ఇండియా నుంచి వెళ్లిపోవాల్సి ఉంటుందని తేల్చి చెప్పింది.

ఐటీ చట్టంలోని రూల్స్‌పై తీవ్ర అసహనం వ్యక్తం చేసిన వాట్సాప్ ఇలా అయితే ఇండియా నుంచి వెళ్లిపోవాల్సి ఉంటుందని తేల్చి చెప్పింది. (Image Credits: Freepik)

WhatsApp Threatens to Exit India: వాట్సాప్ సంచలన వ్యాఖ్యలు చేసింది. తమ యాప్‌లోని ఎన్‌క్రిప్షన్‌ని బ్రేక్‌ చేయాలని చెబితే భారత్‌లో ఇకపై సేవలు అందించడం కష్టమే అని తేల్చి చెప్పింది. ఢిల్లీహైకోర్టులో ఐటీ చట్టంలో సవరణలను సవాల్ చేస్తూ వేసిన పిటిషన్‌ విచారణ సమయంలో వాట్సాప్ ఈ వ్యాఖ్యలు చేసింది. 2021 నాటి ఐటీ చట్టంలోని డిజిటల్ మీడియా ఎథిక్స్ కోడ్‌కి సంబంధించిన నిబంధనలను మెటా సవాల్ చేసింది. సోషల్ మీడియా ప్లాట్‌ఫామ్ ఏదైనా మెసేజింగ్ సర్వీస్‌లు అందిస్తుంటే అందులోని మెసేజ్‌లు ఎక్కడి నుంచి వచ్చాయో గుర్తించాలని ఈ నిబంధనలు తేల్చి చెబుతున్నాయి. అంటే...మెసేజ్‌ల మూలాలను గుర్తించడం. కంప్యూటర్ రీసోర్స్‌ల ద్వారా ఆరిజినేటర్‌ని గుర్తించాలని ఐటీ చట్టంలో స్పష్టంగా ప్రస్తావించారు. అయితే...దీనిపై వాట్సాప్‌ అసహనం వ్యక్తం చేస్తోంది. ఈ సంస్థ తరపున వాదించిన అడ్వకేట్ తేజస్ కరియా కీలక వ్యాఖ్యలు చేశారు. ప్రైవసీ ఉంటుందనే కారణంగానే చాలా మంది వాట్సాప్‌ని వినియోగిస్తున్నారని, ఇందులో End to End Encryption ఉంటుందని తేల్చి చెప్పారు. ఈ నిబంధన ప్రకారం మెసేజ్‌ల మూలాలు గుర్తించాలంటే ఈ ఎన్‌క్రిప్షన్‌ని బ్రేక్ చేయాల్సి ఉంటుందని కోర్టుకి వెల్లడించారు. 

అదే జరిగితే భారత్‌లో సేవలు కొనసాగించలేమని స్పష్టం చేశారు. ఈ నిబంధన వినియోగదారుల వ్యక్తిగత గోప్యతకి భంగం కలిగిస్తోందని వాదించారు. ఎలాంటి సంప్రదింపులు జరపకుండానే చట్టంలో ఇలాంటి రూల్స్ పెట్టారని అసహనం వ్యక్తం చేశారు. ఈ చట్టంలో ఉన్నట్టుగా చేయాలంటే వాట్సాప్‌ ఏటా లక్షలాది మెసేజ్‌లను స్టోర్ చేయాల్సి ఉంటుందని వాట్సాప్ తరపున న్యాయవాది వాదించారు. ఎప్పుడు ఏ మెసేజ్‌ని డీక్రిప్ట్ చేయమని చెబుతారో తెలియనప్పుడు, అన్ని మెసేజ్‌లనూ స్టోర్ చేయాల్సి ఉంటుందని తేల్చి చెప్పారు. అంతకు ముందు చట్టంలో ఇలాంటి నిబంధన లేదని వాదించారు. ఆ సమయంలో ధర్మాసనం ఆయనను ప్రశ్నించింది. ఇలాంటి నిబంధన ఇంకెక్కడైనా ఉందా అని అడిగింది. ప్రపంచంలో ఎక్కడా ఇలాంటి రూల్ లేదని తేజస్ కరియా స్పష్టం చేశారు.