Bharat Jodo Yatra: కింద పడిపోయిన పాప- ఆప్యాయంగా దగ్గరకు తీసుకున్న సోనియా, రాహుల్!

Bharat Jodo Yatra: కాంగ్రెస్ అధినేత్రి సోనియా గాంధీ, రాహుల్ గాంధీ.. కింద పడిపోయిన ఓ పాపను పైకి లేపి, పలకరిస్తోన్న ఓ వీడియో సోషల్ మీడియాలో వైరల్ అవుతోంది.

(Image Source: Twitter)

త్రBharat Jodo Yatra: భారత్ జోడో యాత్ర.. కర్ణాటకలో కొనసాగుతోంది. కాంగ్రెస్ అధినేత్రి సోనియా గాంధీ గురువారం ఈ యాత్రలో పాల్గొన్నారు. కుమారుడు రాహుల్ గాంధీతో కలిసి ఆమె పాదయాత్ర చేస్తున్నారు. అయితే ఆ సమయంలో జనం ఎక్కువగా ఉండటంతో ఓ చిన్న పాప కింద పడిపోయింది. ఇది గమనించిన సోనియా, రాహుల్ గాంధీ వెంటనే స్పందించి ఆ పాపను పైకి లేపి దగ్గరకు తీసుకున్నారు.

We care! pic.twitter.com/Jbx7T261yL

— Congress (@INCIndia) October 6, 2022

ఇదీ జరిగింది

మండ్య జిల్లాలో కవాతులో భారీ రద్దీ కారణంగా ఓ బాలిక కింద పడిపోయింది. ఇది గమనించిన సోనియా గాంధీ, రాహుల్ గాంధీ వెంటనే ఆగిపోయారు. ఆ బాలికను పైకి లేపిన సోనియా గాంధీ.. "ఏమైనా దెబ్బ తగిలిందా అంటూ" ఆ పాపను నిమిరారు.

త్రివర్ణ పతాకం పట్టుకున్న ఆ పాపను రాహుల్ గాంధీ దగ్గరకు తీసుకున్నారు. "ఏం పర్లేదు కదా" అని అడిగారు. ఈ వీడియోను కాంగ్రెస్ తన అధికారిక ట్విట్టర్ హ్యాండిల్‌లో పోస్ట్ చేసింది. ఈ వీడియో సోషల్ మీడియాలో వైరల్ అవుతోంది.

షూ లేస్

రాహుల్‌తో కలిసి సోనియా గాంధీ కూడా జోడో యాత్రలో పాలు పంచుకున్నారు.  ఆ సమయంలో ఆమె వేసుకున్న షూ లేస్ ఊడిపోయింది. దీంతో పక్కనే ఉన్న రాహుల్.. అమ్మ సోనియా గాంధీ షూ లేస్ కట్టారు.  సోనియా నవ్వులు చిందిస్తూ తన కుమారుడిని చూశారు. తల్లీ కొడుకుల అనుబంధానికి నిదర్శనంగా నిలిచిన ఈ వీడియో ఇప్పుడు సోషల్ మీడియాలో వైరల్‌గా మారింది. "కాంగ్రెస్ పార్టీకి యువరాజైనా.. సోనియాకు మాత్రం రాహుల్ కొడుకే" అంటూ నెటిజన్లు ప్రశంసిస్తున్నారు.

#Watch | As Sonia Gandhi joins the #BharatJodoYatra, video of Rahul Gandhi tying her shoe laces goes viral on social media. pic.twitter.com/hRKM4Zg2uK

— ABP LIVE (@abplive) October 6, 2022

భారత్ జోడో యాత్రలో భాగంగా రాహుల్ గాంధీ.. పలువురు కార్యకర్తలు, ప్రజలతో మమేకమవుతున్నారు. ఇటీవల గాంధీ జయంతి సందర్భంగా రాహుల్ గాంధీ కీలక వ్యాఖ్యలు చేశారు.

" సత్యం, అహింస మార్గంలో నడవడాన్ని మనకు బాపూజీ నేర్పించారు. ప్రేమ, కరుణ, సద్భావం, మానవత్వం అర్థాలను వివరించారు. గాంధీ జయంతి సందర్భంగా ఓ ప్రతిజ్ఞ చేస్తున్నాం. బాపూజీ ఏ విధంగా అయితే అన్యాయానికి వ్యతిరేకంగా దేశాన్ని ఏకతాటిపైకి తీసుకొచ్చారో, అదే విధంగా ఇప్పుడు మేం భారత దేశాన్ని ఏకం చేస్తాం.                                                              "

-రాహుల్ గాంధీ, కాంగ్రెస్ అగ్రనేత