WhatsApp Username Feature:భారత్‌లో వాట్సాప్ 'యూజర్‌నేమ్' ఫీచర్‌పై నిషేధం! 3 రోజుల్లోగా స్పందించాలని మెటాకు కేంద్రం నోటీసు!

WhatsApp Username Feature:వాట్సాప్ యూజర్‌నేమ్ ఫీచర్ విషయంలో కేంద్ర ప్రభుత్వం చాలా కఠినంగా వ్యవహరిస్తోంది. ప్రస్తుతం, ఈ ఫీచర్‌ను ప్రారంభించవద్దని కేంద్ర ప్రభుత్వం వాట్సాప్‌ను ఆదేశించింది.

భారత్‌లో వాట్సాప్ 'యూజర్‌నేమ్' ఫీచర్‌పై నిషేధం! 3 రోజుల్లోగా స్పందించాలని మెటాకు కేంద్రం నోటీసు!

Source : pinterest

Show Quick Read

Key points generated by AI, verified by newsroom

• వాట్సాప్ యూజర్‌నేమ్ ఫీచర్‌ను కేంద్రం తాత్కాలికంగా నిలిపివేసింది.
• ఆన్‌లైన్ మోసాలు పెరుగుతాయని ప్రభుత్వం తీవ్ర ఆందోళన వ్యక్తం చేసింది.
• భారత చట్టాలకు ఎలా వర్తిస్తుందో వివరించాలని మెటాను కోరింది.
• అయితే, ఈ ఫీచర్ భద్రతను పెంచుతుందని వాట్సాప్ పేర్కొంది.

WhatsApp Username Feature:వాట్సాప్ కొత్త ఫీచర్‌పై కేంద్ర ప్రభుత్వం కఠిన వైఖరి తీసుకుంటోంది. వాట్సాప్ యూజర్‌నేమ్ ఫీచర్‌ను త్వరలో ప్రారంభించాలని భావించగా, కేంద్ర ప్రభుత్వం ప్రస్తుతం దానిని నిరోధించింది. మూడు రోజుల్లోగా మెటా నుంచి వివరణాత్మక స్పందన ఇవ్వాలని కూడా ప్రభుత్వం కోరింది. దీనివల్ల ఆన్‌లైన్ మోసాల కేసులు పెరుగుతాయని ప్రభుత్వం వాదిస్తోంది.

మొబైల్ నంబర్లకు బదులుగా కేవలం యూజర్‌నేమ్‌లతో చాట్ చేయడానికి ప్రజలను అనుమతించడం వల్ల నకిలీ ఖాతాలు, ఆన్‌లైన్ మోసాలు, ఫిషింగ్, డిజిటల్ అరెస్టులు, నకిలీ ఐడీలతో చేసే మోసాలు పెరిగే అవకాశం ఉందని కేంద్రం భావిస్తోంది. వ్యక్తులు, ప్రభుత్వ సంస్థలు లేదా బ్యాంకుల యూజర్‌నేమ్‌లను పోలిన యూజర్‌నేమ్‌లను సృష్టించడం ద్వారా నేరగాళ్లు ప్రజలను సులభంగా మోసం చేయగలరని కూడా ఆ నోటీసులో పేర్కొంది. 

ప్రభుత్వం మెటాను ఏం అడిగింది?

ఈ ఫీచర్ ఐటీ చట్టం 2000, ఐటీ నిబంధనలు 2021తో సహా భారతీయ చట్టాలకు ఎలా అనుగుణంగా ఉందో వివరించాలని ప్రభుత్వం మెటాను కోరింది. అవసరమైతే, చట్టాన్ని అమలు చేసే ఏజెన్సీలు ఒక సందేశాన్ని పంపినవారిని ఎలా గుర్తించగలవో కూడా స్పష్టం చేయాలని కోరింది. ఈ విషయంపై సంతృప్తికరమైన చర్చ పూర్తయ్యే వరకు భారత్‌లో వాట్సాప్ యూజర్‌నేమ్ ఫీచర్‌ను విడుదల చేయకూడదని ప్రభుత్వం స్పష్టంగా చెప్పింది.

వాట్సాప్ ఏబీపీ న్యూస్‌కు ఏం చెప్పింది?

యూజర్‌నేమ్ ఫీచర్‌కు సంబంధించి వాట్సాప్ ఏబీపీ న్యూస్‌కు నిర్దిష్ట సమాచారాన్ని అందించింది. ఈ ఫీచర్ యూజర్ ఐడీలను మరింత సురక్షితం చేస్తుందని కంపెనీ చెబుతోంది. ఒకే యూజర్‌నేమ్‌ను ఉపయోగించి పదేపదే సందేశాలు పంపడానికి ప్రయత్నించే వారిని బ్లాక్ చేయడంతోపాటు, నకిలీ గుర్తింపులు ఉన్న ఖాతాలను కూడా తొలగిస్తుంది. ఈ ఫీచర్ అందుబాటులోకి వచ్చి, ఎవరైనా మీ యూజర్‌నేమ్‌ను ఉపయోగించి మీకు మొదటిసారి సందేశం పంపినప్పుడు, ఆ ఖాతా కొత్తదా, వారు మీ కాంటాక్ట్స్‌లో ఉన్నారా,  మీకు ఏవైనా షేర్డ్ గ్రూపులు ఉన్నాయా అనే వివరాలను వాట్సాప్ తెలియజేస్తుంది.

యూజర్‌నేమ్ ద్వారా చాట్ చేసే సౌలభ్యం ఇంకా అందుబాటులోకి రాలేదని, ఈ ఏడాది దశలవారీగా దీనిని క్రమంగా విడుదల చేస్తామని మెటా ఏబీపీ న్యూస్‌కు తెలిపింది. "వాట్సాప్‌లో ప్రజలు తమకు నచ్చిన యూజర్‌నేమ్‌ను రిజర్వ్ చేసుకునే అవకాశాన్ని మేం ప్రకటించాం. యూజర్‌నేమ్ ద్వారా చాటింగ్ ఇంకా ప్రారంభం కాలేదు. ఈ సంవత్సరం దశలవారీగా క్రమంగా అందుబాటులోకి రానుంది. నకిలీ గుర్తింపులను నివారించడానికి, మేము ఇప్పటికే ప్రముఖులు, ప్రభుత్వ సంస్థలు, సెలబ్రిటీలు, ధృవీకరించిన మెటా ఖాతాల వంటి ప్రముఖ పేర్లను రిజర్వ్ చేశాం, తద్వారా వాటి అసలైన యజమానులు మాత్రమే వాటిని ఉపయోగించగలరు. ఒకేలా కనిపించే పేర్లు కూడా రిజర్వ్ అయ్యాయి." అని మెటా తెలిపింది.

మొబైల్ నంబర్ తప్పనిసరి: మెటా

"వాట్సాప్ ఉపయోగించడానికి వినియోగదారులకు మొబైల్ నంబర్లు ఇప్పటికీ అవసరమవుతాయి. ఆన్‌లైన్ మోసాలను నివారించడానికి యూజర్‌నేమ్ ఫీచర్‌కు అనేక సెక్యూరిటీ లేయర్స్‌ జోడించాం. మీకు మెసేజ్‌ పంపాలంటే, ఎవరికైనా మీ కచ్చితమైన యూజర్‌నేమ్ తెలిసి ఉండాలి. కొత్త ఖాతాలు సంప్రదించగల వ్యక్తుల సంఖ్యను మేం పరిమితం చేస్తాము," అని మెటా అన్నారు.

మెటా ఇలా వివరించింది, "యూజర్‌నేమ్‌లను ఊహించి చేసే ప్రయత్నాలను మేం అడ్డుకుంటాం, అలాగే నకిలీ ఐడీలను, సాధారణ దుర్వినియోగ పద్ధతులను గుర్తించి తొలగించడానికి మా వద్ద సిస్టమ్స్‌ ఉంటాయి. ఈ ఫీచర్ అందుబాటులోకి వచ్చినప్పుడు, ఎవరైనా మీ యూజర్‌నేమ్‌ను ఉపయోగించి మీకు మొదటిసారి మెసేజ్‌ పంపితే, అది కొత్త ఖాతా అయితే, వారు మీ కాంటాక్ట్స్‌లో ఉంటే, మీకు ఏవైనా షేర్డ్ గ్రూపులు ఉంటే, వారు వేరే దేశానికి చెందినవారైతే, ఆ వివరాలను మేము మీకు తెలియజేస్తాం." 

మరిన్ని చదవండి

వాట్సాప్ యూజర్ ఐడీతో చిక్కుల్లో మెటా! నోటీసులు పంపేందుకు సిద్ధమవుతున్న కేంద్ర ప్రభుత్వం!

వాట్సాప్‌లో సబ్‌స్క్రిప్షన్ ఆప్షన్ కాస్ట్ ఎంత? దీని వల్ల యూజ్ ఏంటీ? ఏయే ఫీచర్లు అందుబాటులో ఉన్నాయి?