Bladder Pain in Women : మూత్రాశయం నొప్పిని మహిళలు ఎందుకు నిర్లక్ష్యం చేస్తారు? UTIకు, బ్లాడర్ పెయిన్​ లక్షణాలు, వ్యత్యాసం ఇవే

Bladder Pain or UTI : మూత్రాశయం నొప్పిని చాలామంది మహిళలు నిర్లక్ష్యం చేస్తారని.. యూరినరీ ట్రాక్ట్ ఇన్‌ఫెక్షన్‌కు, బ్లాడర్ పెయిన్​ మధ్య తేడ గుర్తించక ఇబ్బందులు ఎదుర్కొంటారని వైద్యులు చెప్తున్నారు.

యూరినరీ ట్రాక్ట్ ఇన్‌ఫెక్షన్‌కు, బ్లాడర్ పెయిన్​కి మధ్య తేడాలివే

Source : Pexels

Frequent Urination and Bladder Pain in Women : చాలామంది మహిళలు మూత్రాశయం నొప్పితో నెలలు, కొన్నిసార్లు ఏళ్లపాటు కూడా బాధపడుతుంటారు. అయినప్పటికీ అసలు సమస్య ఏమిటో గుర్తించడానికి చాలా సమయం పడుతుంది. దీనికి ప్రధాన కారణం ఇంటర్‌స్టీషియల్ సిస్టైటిస్/బ్లాడర్ పెయిన్ సిండ్రోమ్ (Interstitial Cystitis/Bladder Pain Syndrome - IC/BPS) లక్షణాలు సాధారణంగా కనిపించే ఇతర వ్యాధుల లక్షణాలతో పోలి ఉండటమేనని యశోద హాస్పిటల్స్, హైదరాబాద్‌కు చెందిన సీనియర్ కన్సల్టెంట్ యూరాలజిస్ట్ డాక్టర్ ఎం. గోపిచంద్ తెలిపారు.

ఈ సమస్యను చాలామంది యూరినరీ ట్రాక్ట్ ఇన్‌ఫెక్షన్ (UTI), ఓవర్‌యాక్టివ్ బ్లాడర్ లేదా స్త్రీల గైనకాలజీ సమస్యగా భావించి చికిత్స తీసుకుంటారని వెల్లడించారు. దీంతో అసలు సమస్య గుర్తించే సరికి ఆలస్యం అవుతుందని తెలిపారు. ఇన్‌ఫెక్షన్ లేకపోయినా పలుమార్లు యాంటీబయాటిక్స్ వాడాల్సిన పరిస్థితి ఏర్పడుతుంది. అందుకే మూత్రాశయం నొప్పిని ఎప్పుడూ సాధారణ సమస్యగా తీసుకోవద్దని డాక్టర్ గోపిచంద్ హెచ్చరిస్తున్నారు.

బ్లాడర్ పెయిన్ సిండ్రోమ్ లక్షణాలు ఇవే..

బ్లాడర్ పెయిన్ సమస్య ఉంటే కొన్ని లక్షణాలు కనిపిస్తాయి. మూత్రాశయం లేదా పెల్విక్ ప్రాంతంలో నొప్పి, ఒత్తిడి లేదా అసౌకర్యం.. పగలు, రాత్రి తరచుగా మూత్రానికి వెళ్లాల్సి రావడం.. ఒక్కసారిగా మూత్రం చేయాలనే తీవ్రమైన కోరిక కలగడం కానీ ప్రతిసారి చాలా తక్కువ పరిమాణంలో మాత్రమే మూత్రం వస్తుంది. మూత్రాశయం నిండినప్పుడు నొప్పి ఎక్కువగా ఉండి.. మూత్ర విసర్జన తర్వాత తగ్గిపోతుంది. కొంతమంది మహిళల్లో శృంగార సమయంలో నొప్పిగా ఉంటుంది.

యూరినరీ ట్రాక్ట్ ఇన్‌ఫెక్షన్‌కు, బ్లాడర్ పెయిన్​కి మధ్య తేడాలివే

సాధారణ యూరినరీ ట్రాక్ట్ ఇన్‌ఫెక్షన్ (UTI) బ్యాక్టీరియా వల్ల వస్తుంది. కానీ బ్లాడర్ పెయిన్ సిండ్రోమ్‌కు బ్యాక్టీరియా కారణం కాదని డాక్టర్ గోపిచంద్ తెలిపారు. అందువల్ల మూత్ర పరీక్షల్లో ఇన్‌ఫెక్షన్ ఉన్నట్లు సాధారణంగా కనిపించదన్నారు. ఈ వ్యాధికి ఖచ్చితమైన కారణం ఇప్పటికీ పూర్తిగా తెలియదు. అయితే.. మూత్రాశయం లోపలి పొరలో మార్పులు రావడం, నరాల సంకేతాలు అసాధారణంగా పనిచేయడం, ఆటో ఇమ్యూన్ వ్యాధులు, అలర్జీలు, దీర్ఘకాలిక వాపు వంటి అంశాలు దీనికి కారణం కావచ్చని నిపుణులు చెబుతున్నారు.

ఈ వ్యాధిని ఎలా గుర్తిస్తారంటే..

ఈ సమస్యను నిర్ధారించడానికి ఒక్కటే పరీక్ష ఉండదు. అందువల్ల ముందుగా ఇతర వ్యాధులను తొలగించిన తర్వాతే వైద్యులు ఈ వ్యాధిని నిర్ధారిస్తారు. పదేపదే వచ్చే యూరిన్ ఇన్‌ఫెక్షన్లు, మూత్రాశయంలో రాళ్లు, ఎండోమెట్రియోసిస్, మూత్రాశయ క్యాన్సర్ వంటి సమస్యలు లేవని నిర్ధారించిన తర్వాత మాత్రమే బ్లాడర్ పెయిన్ సిండ్రోమ్‌గా నిర్ధారణ చేస్తారు.

బ్లాడర్ పెయిన్ చికిత్స ఉందా?

ఈ వ్యాధికి శాశ్వత చికిత్స లేకపోయినా, లక్షణాలను సమర్థవంతంగా నియంత్రించవచ్చని డాక్టర్ గోపిచంద్ తెలిపారు. ప్రతి రోగి పరిస్థితిని బట్టి చికిత్స ఉంటుందని తెలిపారు నిపుణులు. కాఫీ, ఆల్కహాల్, మసాలా ఎక్కువగా ఉండే ఆహారం, పుల్లటి పానీయాలకు దూరంగా ఉండాలని తెలిపారు. అలాగే పెల్విక్ ఫ్లోర్ ఫిజియోథెరపీ, బ్లాడర్ ట్రైనింగ్, ఒత్తిడిని తగ్గించే పద్ధతులు, అవసరమైతే మందులు, కొందరికి బ్లాడర్ ఇన్‌స్టిలేషన్ థెరపీ, నర్వ్ స్టిమ్యులేషన్, బొటాక్స్ థెరపీ చికిత్స చేస్తారు.

వైద్యుడిని ఎప్పుడు సంప్రదించాలంటే..

మూత్రాశయం నొప్పి లేదా తరచుగా మూత్రానికి వెళ్లాలనే సమస్య ఆరు వారాలకుపైగా కొనసాగితే కచ్చితంగా యూరాలజిస్ట్‌ను సంప్రదించాలి. చికిత్స తీసుకున్నా సమస్య తగ్గకపోతే.. మూత్ర పరీక్షల్లో ఇన్‌ఫెక్షన్ లేదని వచ్చినా లక్షణాలు కొనసాగినా.. వైద్య సహాయం తీసుకోవాలి. 

మూత్రాశయం నొప్పిని సాధారణ సమస్యగా భావించి నిర్లక్ష్యం చేయడం మంచిది కాదని వైద్యులు చెప్తున్నారు. ముఖ్యంగా ఇన్‌ఫెక్షన్ లేదని పరీక్షల్లో వచ్చినప్పటికీ నొప్పి, తరచూ మూత్రానికి వెళ్లాల్సి రావడం, మూత్రాశయం నిండినప్పుడు నొప్పి పెరగడం వంటి లక్షణాలు ఉంటే వెంటనే యూరాలజిస్ట్‌ను సంప్రదించాలని సూచిస్తున్నారు. ప్రారంభ దశలోనే సరైన నిర్ధారణ, తగిన చికిత్స తీసుకోవడం వల్ల జీవన నాణ్యత కూడా గణనీయంగా మెరుగుపడుతుందని అంటున్నారు. 

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.

మరిన్ని చదవండి

అతిగా ఆలోచించి సతమతమవుతున్నారా? ఓవర్‌థింకింగ్‌ను తగ్గించే 3 సులభమైన మార్గాలు ఇవే

మంచి నిద్ర కావాలంటే నైట్ రొటీన్ ఇలా సెట్ చేసుకోండి.. వైద్యులు సూచించే సింపుల్ అలవాట్లు ఇవే