Type 2 Diabetes: మధుమేహం రోగులకు కొత్త ముప్పు - 3 రకాల క్యాన్సర్లతో ప్రమాదం తప్పదట, బ్రిటన్ పరిశోధకులు వెల్లడి

టైప్2 డయాబెటిస్ పేషెంట్లకు క్యాన్సర్ ముప్పు ఎక్కువగా ఉంటుందని తాజా పరిశోధనలో వెల్లడైంది. చెక్కెర వ్యాధిగ్రస్తుల్లో రొమ్ము, పేగు, ప్యాంక్రియాటిక్ క్యాన్సర్ల ప్రమాదం ఎక్కువగా ఉంటుందని తేలింది.

డయాబెటిస్ పేషెంట్లకు క్యాన్సర్ ముప్పు(Photo Credit: Pixabay.com)

Type 2 Diabetes: డయాబెటిస్ కారణంగా అనేక ఆరోగ్య సమస్యలు తలెత్తే అవకాశం ఉంటుంది. తాజాగా బ్రిటన్ పరిశోధకులు నిర్వహించిన స్టడీలో కీలక విషయాలు వెల్లడి అయ్యాయి. టైప్‌-2 డయాబెటిస్‌ తో బాధపడుతున్న వారిలో క్యాన్సర్‌ ముప్పు అధికంగా పొంచి ఉన్నదని తేలింది. అంతేకాదు, అడ్వాన్స్‌డ్‌ దశలో ఉన్న వారిలోనే ఈ క్యాన్సర్‌ నిర్ధారణ అవుతున్నదని యూకే పరిశోధకులు తెలిపారు. వీరిలో ఎక్కువగా రొమ్ము, పేగు, ప్యాంక్రియాటిక్ లాంటి క్యాన్సర్లు సోకుతున్నాయని గుర్తించారు. టైప్‌-2 డయాబెటిస్‌ రోగుల్లో ఈ క్యాన్సర్లు అసలు కణితి నుంచి శరీరంలోని ఇతర భాగాలకు వ్యాపించడం ప్రారంభమైన తర్వాత మాత్రమే నిర్ధారణ అవుతున్నదని తెలిపారు. 

డయాబెటిక్ పేషెంట్లలో క్యాన్సర్ కు కారణాలు ఏంటి?

జెనెటిక్ వేరియంట్లు, జెనెటిక్ సీక్వెన్స్ లలో తేడాలు, డయాబెటిస్ కలిసి క్యాన్సర్ కు కారణం అవుతున్నాయని యుకెకు చెందిన డాక్టర్ ఎలిజబెత్ రాబర్ట్‌సన్ వెల్లడించారు. వ్యక్తి ఆరోగ్యం మీద ఈ మూడు అంశాలు తీవ్ర ప్రభావం చూపిస్తున్నాయని తెలిపారు. "టైప్ 2 డయాబెటిస్ కారణంగా వ్యక్తులలో మూడు రకాల క్యాన్సర్లు సోకే అవకాశం ఉంది. ముఖ్యంగా రొమ్ము, కొలొరెక్టల్, ప్యాంక్రియాటిక్ క్యాన్సర్‌ సోకుతున్నట్లు గుర్తించాం. డయాబెటిస్ తో పాటు జన్యు పరమైన లోపాల కారణంగా క్యాన్సర్లు వ్యాప్తి చెందుతున్నాయి” అని వెల్లడించారు.

క్యాన్సర్ కారక జన్యువుల కోసం కొనసాగుతున్న పరిశోధన

యుకెలో ఐదు మిలియన్ల కంటే ఎక్కువ మంది డయాబెటిస్ తో బాధపడుతున్నట్లు పరిశోధకులు గుర్తించారు. గత 15 ఏళ్లలో డయాబెటిస్ కేసులు రెట్టింపు అవుతున్నట్లు తెలిపారు. వీరిలో 90 శాతం మందికి టైప్ 2 డయాబెటిస్ ఉన్నట్లు గుర్తించాయి. ఒబేసిటీ ఉన్నవారిలో టైప్ 2 డయాబెటిస్ వచ్చే ప్రమాదం ఏడు రెట్లు ఎక్కువగా ఉన్నట్లు తెలిపారు. బరువు తగ్గించుకునేందుకు తగినంత వ్యాయామం చేయకపోవడంతో పాటు జన్యు సమస్యల కారణంగా క్యాన్సర్ ప్రమాదం పెరుగుతున్నట్లు తెలిపారు.

అయితే, టైప్ 2 మధుమేహం, క్యాన్సర్ ప్రమాదం మధ్య సంబంధానికి దోహదపడే జన్యుపరమైన కారకాలు ఇప్పటీ సరిగా గుర్తించలేదని తెలిపారు లండన్‌లోని డయాబెటిస్ UK ప్రొఫెషనల్ కాన్ఫరెన్స్‌ లో ప్రొడ్యూస్ చేసిన తాజా అధ్యయనం, టైప్ 2 డయాబెటిస్‌తో బాధపడుతున్న కొంతమందికి క్యాన్సర్ ఎందుకు వస్తుందో గుర్తించేందుకు జన్యువులపై పరిశోధన నిర్వహిస్తున్నట్లు తెలిపారు.

ఇందుకు టైప్ 2 డయాబెటిస్, క్యాన్సర్‌తో బాధపడుతున్న వ్యక్తులతో సహా 36 వేల మంది నుంచి DNA డేటాను సేకరించి పరిశీలించారు. ఇందులో ఒక డిఎన్ఎ వేరియంట్ రొమ్ము క్యాన్సర్, మరొక డిఎన్ఎ వేరియంట్ రొమ్ము, పేగు, ప్యాంక్రియాటిక్ క్యాన్సర్ ప్రమాదానికి కారణం అవుతున్నట్లు గుర్తించారు. టైప్ 2 డయాబెటిస్ కారణంగానే ఈ క్యాన్సర్లు డెవలప్ అవుతున్నట్లు తెలిపారు.

త్వరలో క్యాన్సర్లకు కారణమయ్యే జన్యు కారకాల గుర్తింపు!

అయితే, త్వరలోనే డయాబెటిస్ ఉన్నవారిలో క్యాన్సర్లకు కారణమయ్యే జన్యు కారకాలను గుర్తించే అవకాశం ఉన్నట్లు పరిశోధకులు తెలిపారు. ఈ కారకాలను గుర్తించే డయాబెటిక్ పేషెంట్లలో క్యాన్సర్ ముప్పును రూపుమాపే అవకాశం ఉంటుందని వెల్లడించారు. ఆ దిశగా విస్తృతమైన పరిశోధనలు కొనసాగుతున్నట్లు తెలిపారు.