Honey Ants: తేనెటీగలే కాదు చీమలు కూడా తేనెను తయారు చేస్తాయి, ఈ తేనే ఎంతో ఖరీదు

తేనె అనగానే తేనెటీగలే గుర్తొస్తాయి. కానీ కొన్ని చీమలు కూడా తేనెను తయారు చేస్తాయి.

(Image credit: Wikipedia)

ప్రపంచంలో ఎప్పటికీ చెడిపోని పదార్థం ఉందంటే అది తేనె మాత్రమే. తేనె అనగానే అందరూ తేనెటీగలు మాత్రమే తేనెను తయారు చేస్తాయని అనుకుంటారు. నిజానికి కొన్ని రకాల చీమలు కూడా తేనెను తయారు చేస్తాయి. ఈ విషయం చాలా తక్కువ మందికే తెలుసు. మన దేశంలో తేనెటీగలు తయారుచేసిన తేనెనే అధికంగా వినియోగిస్తాం. కానీ ఆస్ట్రేలియాలో చీమలు తయారు చేసిన తేనెను అధికంగా వినియోగిస్తారు. ఈ తేనే ఖరీదు కూడా చాలా ఎక్కువ. ఈ తేనెలో యాంటీబ్యాక్టీరియల్, యాంటీ ఫంగల్ లక్షణాలు అధికంగా ఉంటాయి. ఈ చీమలను హనీపాట్ చీమలు అంటారు. ఇవి తేనెను ఉత్పత్తి చేస్తాయి కాబట్టే వాటికి హనీపాట్ అనే పేరు వచ్చింది. ఈ చీమలు పశ్చిమ ఆస్ట్రేలియాలోని ఎడారి ప్రాంతాల్లో అధికంగా ఉంటాయి. ఇవి తమ పొత్తికడుపులో చివరన గాలి బుడగ లాంటి భాగాల్లో తేనెను ఉత్పత్తి చేసి దాస్తాయి. తమ గూడు నుంచి వేలాడుతూ కనిపిస్తాయి. వాటికి ఆహారం దొరకనప్పుడు ఈ తేనెనే తిరిగి తిని జీవిస్తాయి. ఒక చీమ పొట్ట నుంచి తేనెను మరో చీమ వెలికి తీస్తుంది. చీమలు తమ తేనెను తాము బయటికి తీసుకోలేవు.

 ఈ చీమలు చూడడానికి చాలా ఆసక్తికరంగా ఉంటాయి. ఆ తేనెను సేకరించి ఎక్కువ ధరకు అమ్ముతూ ఉంటారు. ఎందుకంటే ఆ తేనెలో యాంటీ బ్యాక్టీరియల్, యాంటీ ఫంగల్ లక్షణాలతో పాటు మన శరీరానికి, మానసిక ఆరోగ్యానికి మేలు చేసే ఎన్నో సమ్మేళనాలు ఉన్నాయి. ఈ తేనెలో యాంటీ మైక్రో బయల్ పెప్టైడ్, మిథైల్ గ్లైక్సాల్ సమ్మేళనం, హైడ్రోజన్ పెరాక్సైడ్ వంటివి అధికంగా ఉంటాయి. అందుకే ఈ చీమల నుంచి తీసే తేనెను ఆస్ట్రేలియన్ ప్రజలు ఔషధంగా భావిస్తారు. దెబ్బలు, గాయాలు తగిలిన చోట ఆయింట్‌మెంట్‌లా పూస్తారు. అయితే సాధారణ తేనెతో పోలిస్తే ఈ తేనే చాలా తక్కువ తీపి ఉంటుంది . 

ఈ తేనె తాగడం వల్ల అనేక రకాల ఇన్ఫెక్షన్ల నుంచి మనల్ని మనం కాపాడుకోవచ్చు. ముఖ్యంగా అతి త్వరగా సోకే జలుబు దగ్గు వంటి వాటినుంచి ఇది ఉపశమనం లభిస్తుంది. రోగనిరోధక శక్తిని కూడా పెంచి, అంటువ్యాధుల బారిన పడకుండా చేస్తుంది. ఈ చీమల నుంచి తేనెను సేకరించడం కాస్తా క్లిష్టమైన ప్రక్రియ. అందుకే ఇది ఎక్కువగా అందుబాటులో ఉండదు. ఆస్ట్రేలియాతో పాటూ మరికొన్ని దేశాల్లో ఈ చీమలు కనిపిస్తాయి. 

గమనిక: పలు అధ్యయనాలు, పరిశోధనల నుంచి సేకరించిన సమాచారాన్ని ఇక్కడ యథావిధిగా అందించాం. ఇది వైద్య నిపుణుల సూచనలకు ప్రత్యామ్నాయం కాదు. తప్పకుండా వైద్యుడు లేదా ఆహార నిపుణుల సలహా తీసుకున్న తర్వాతే ఈ ఆహారాన్ని మీ డైట్‌లో చేర్చుకోవాలి. ఈ సమాచారం కేవలం మీ అవగాహన కోసమే.