Brain Stroke: ఈ అలవాట్లే... మెదడు స్ట్రోక్‌కు కారణమవుతాయి

మన అలవాట్లే ఆరోగ్యాన్ని నిర్ణయిస్తాయి. కొన్ని రకాల హానికర అలవాట్లు బ్రెయిన్ స్ట్రోక్ వంటి తీవ్రమైన పరిస్థితులకు దారి తీస్తాయి.

(Image credit: Pixabay)

ఆధునిక జీవనశైలి అనేక రోగాలకు కారణం అవుతోంది. అనారోగ్యకరమైన ఆహారం, ఒత్తిడి, చెడు అలవాట్లు ఇవన్నీ ప్రాణాంతక వ్యాధులకు కారణం అవుతున్నాయి. వీటిలో  బ్రెయిన్ స్ట్రోక్  కూడా ఒకటి. మెదడులోని వివిధ భాగాలకు రక్త సరఫరాలో అంతరాయం ఏర్పడినప్పుడు, మెదడు కణజాలానికి ఆక్సిజన్, పోషకాలు అందక స్ట్రోక్ కి దారితీస్తుంది. ఇలాంటి పరిస్థితి రాకుండా ఉండాలంటే ఆరోగ్యపరంగా, ఆహారపరంగా చాలా జాగ్రత్తలు తీసుకోవాలి. కొన్ని రకాల అలవాట్లను వదిలేయాలి. ఎలాంటి వాటికి దూరంగా ఉండాలో జాన్ హాప్కిన్స్ మెడిసిన్ పరిశోధకులు వివరిస్తున్నారు. 

1. మహిళలు అధికంగా గర్భనిరోధక మాత్రలు వాడడం వల్ల వారిలో స్ట్రోక్ వచ్చే ప్రమాదం పెరుగుతుంది. గర్భనిరోధక మాత్ర లేదా ప్యాచ్ లలో ఈస్ట్రోజన్ హార్మోన్  అధికంగా ఉండి స్ట్రోక్ ప్రమాదాన్ని పెంచుతాయి. కాబట్టి గర్భనిరోధకంగా లూప్ లేదా కండోమ్ వంటి పద్ధతులు పాటించడం ఉత్తమం.

2.  ధూమపానం హానికరమని తెలిసినా చాలా మంది ఆ అలవాటును వదులుకోలేకపోతున్నారు. కనీసం తగ్గించుకున్నా ఎంతో కొంత ఆరోగ్యాన్ని కాపాడుకున్నవారు అవతారు. సిగరెట్ తాగడం వల్ల ఇస్కీమిక్ స్ట్రోక్ వచ్చే అవకాశం రెట్టింపు అవుతుంది. శ్వాసక్రియ పనితీరు కూడా ప్రభావితం అవుతుంది. గుండె ఆరోగ్యం చెడిపోతుంది. 

3. ఎలాంటి ఫిజికల్ యాక్టివిటీ లేకుండా గంటల తరబడి కూర్చునే వాళ్లకి కూడా ఆరోగ్యపరమైన సమస్యలు వస్తాయి. దీని వల్ల బరువు అధికంగా పెరగి కొన్ని పెద్ద జబ్బులకు కారణంగా మారుతుంది. ఇది బ్రెయిన్ స్ట్రోక్ ప్రమాదాన్ని పెంచుతుంది. అందుకే క్రమం తప్పకుండా వ్యాయామం చేయడం చాలా అవసరం. 

4. అతిగా ఆల్కహాల్ తాగడం వల్ల కూడా స్ట్రోక్ వచ్చే ప్రమాదం పెరుగుతుంది. కొంతమంది ఉదయం నుంచే తాగడం మొదలుపెడతారు. ఇలాంటి వారికి భవిష్యత్తులో స్ట్రోక్ వచ్చే ముప్పు ఎక్కువే. 

5. కొన్ని రకాల వైద్య పరిస్థితులు కూడా బ్రెయిన్ స్ట్రోక్ కు కారకాలుగా మారతాయి. అధిక రక్తపోటు, అధిక కొలెస్ట్రాల్, మధుమేహం, గుండె దడ వంటి వాటి వల్ల కూడా కలగవచ్చు. అయితే వీటిని చికిత్స ద్వారా నియంత్రించవచ్చు. కానీ కుటుంబచరిత్రలో బ్రెయిన్ స్ట్రోక్ ప్రమాదం ఉంటే అడ్డుకోవడం కష్టమే. 

ముఖ్య గమనిక: ఆరోగ్య నిపుణులు, పలు అధ్యయనాల్లో పేర్కొన్న అంశాలను ఇక్కడ యథావిధిగా అందించాం. మీకు ఎలాంటి సందేహాలు ఉన్నా వైద్యుడు లేదా ఆహార నిపుణులను సంప్రదించాలి. ఈ కథనం కేవలం మీ అవగాహన కోసమేనని గమనించగలరు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి