Hantavirus Causes : ప్రపంచాన్ని భయపెడుతోన్న హంటావైరస్.. లక్షణాలు, చికిత్స, పూర్తి వివరాలివే
Hantavirus Causes : కరోనా వైరస్ తర్వాత ఏ వైరస్ వచ్చినా ప్రజలు ఆందోళనకు గురి అవుతున్నారు. తాజాగా హంటావైరస్ తెరపైకి రావడంతో మళ్లీ ప్రజల్లో ఆందోళన మొదలైంది. వైరస్ గురించిన పూర్తి వివరాలు చూసేద్దాం.
- ఏప్రిల్-మే 2026లో క్రూజ్ షిప్లో హంటావైరస్ వ్యాప్తి చెందింది.
- హంటావైరస్ ఎలుకల ద్వారా మనుషులకు సోకే అరుదైన వైరస్.
- దీనికి వ్యాక్సిన్ లేదు, కానీ సపోర్టివ్ కేర్ తో ప్రాణాలు కాపాడవచ్చు.
- ఈ వైరస్ కరోనా వలె వేగంగా వ్యాపించదు, రిస్క్ తక్కువ.
Hantavirus Outbreak : ఏప్రిల్-మే 2026లో క్రూజ్ షిప్లో హంటావైరస్ వ్యాప్తి చెందడంతో ప్రపంచం మళ్లీ ఓ కొత్త వైరస్ పేరు వింటోంది. దీంతో కరోనా తర్వాత మరో మహమ్మారి వస్తుందా అనే భయంతో ఆందోళన పడుతున్నారు. ఈ వైరస్ ఎందకు ప్రమాదం? వ్యాప్తి ఎలా ఉంటుంది? నివారణ ఉందా? లేకుంటే మరో లాక్డౌన్ రానుందా? నిపుణులు ఏమంటున్నారో ఇప్పుడు చూసేద్దాం.
ఎక్కడ మొదలైందంటే..
ఏప్రిల్ 2026 నుంచి డచ్ క్రూజ్ షిప్ ఎంవీ హోండియస్పై హంటావైరస్ ప్రభావం మొదలైంది. ఈ నౌక అర్జెంటీనా నుంచి బయలుదేరి అంటార్కిటికా, దక్షిణ అట్లాంటిక్ దీవులను సందర్శిస్తోంది. వారి ప్రయాణంలోనే మే 6 నాటికి 5 నిర్ధారిత కేసులు.. 3 అనుమానిత కేసులు, 3 మరణాలు నమోదయ్యాయి. దీంతో ప్రపంచ ఆరోగ్య సంస్థ (WHO) మే 2వ తేదీన ఈ విషయాన్ని ప్రకటించింది. ఈ నౌకలో 147 మంది ప్రయాణికులు, సిబ్బంది ఉన్నారు.
హంటావైరస్ అంటే ఏమిటి?
హంటావైరస్ అనేది ఎలుకలు, ఇతర కొరకగలిగే జంతువులు మోసే ఒక జూనోటిక్ వైరస్. ఇది మనుషులకు అరుదుగా సోకుతుంది. కానీ సోకితే చాలా ప్రాణాంతకంగా మారుతుంది. అమెరికాలో వ్యాపించిన హంటావైరస్ కార్డియోపల్మోనరీ సిండ్రోమ్ అంటే ఊపిరితిత్తులు, హృదయాన్ని దెబ్బతీస్తుంది. యూరప్, ఆసియాలో ఈ వైరస్ ఎఫెక్ట్ కిడ్నీలను, రక్తనాళాలను దెబ్బతీసే హెమరేజిక్ జ్వరాన్ని కలిగిస్తుంది.
వ్యాప్తి ఎలా జరుగుతుందంటే..
సాధారణంగా హంటావైరస్ సంక్రమణ సోకిన ఎలుకల మూత్రం, విసర్జన లేదా లాలాజలంతో సంపర్కం ద్వారా జరుగుతుంది. అలాగే ఎలుక కరవడం వల్ల కూడా వ్యాపించవచ్చు. గాలి ద్వారా కూడా ఇది వ్యాపిస్తుంది. క్రూజ్ షిప్లో వ్యాపించిన వైరస్ Andes వైరస్ అని నిర్ధారించారు. ఇది ఒకే ఒక హంటావైరస్ వేరియంట్. ఇది మనిషి నుంచి మనిషికి వ్యాపించగలదు. కానీ అరుదుగా వ్యాపిస్తుంది.
లక్షణాలు ఇవే
హంటావైరస్ సంక్రమణ మొదట జలుబుగా మొదలవుతుంది. తర్వాత అలసట, జ్వరం, కండరాల నొప్పి, వికారం, వాంతుల లక్షణాలు బయటపడతాయి. కొందరిలో ఇది తీవ్రమైన, ప్రాణాంతక శ్వాస సమస్యగా మారుతుంది. లక్షణాలు సాధారణంగా సంపర్కం తర్వాత 1 నుంచి 8 వారాల మధ్య మొదలవుతాయి.
చికిత్స ఉందా?
హంటావైరస్కు ఇప్పటికీ వ్యాక్సిన్ లేదా నిర్దిష్ట మందు లేదు. వెంటిలేటర్ వంటి సపోర్టివ్ కేర్ అందుబాటులో ఉంటే ప్రాణాలు కాపాడవచ్చు. అందుకే తొందరగా వైద్య సహాయం తీసుకోవాలని WHO స్పష్టం చేసింది.
అయితే ఇక్కడ మంచి విషయం ఏంటంటే.. హంటావైరస్ కరోనా లాగా వేగంగా వ్యాపించదు. సాధారణ ప్రజలకు రిస్క్ చాలా తక్కువ. ముఖ్యంగా లక్షణాలు చూపించే వ్యక్తితో దగ్గరి, లైంగిక సంబంధం కలిగి ఉంటే మాత్రమే వ్యాపించే అవకాశం ఉంది.
గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.
Before You Go
Simple Yoga for Body Fat | చెడు కొవ్వును సింపుల్ యోగాసనాలతో దూరం చేయండి
టాప్ హెడ్ లైన్స్
ట్రెండింగ్ వార్తలు
