Animal fat : జంతువుల కొవ్వు ఆరోగ్యానికి ఎంత ప్రమాదమో తెలుసా? దీర్ఘకాలిక సమస్యలు తప్పవంటోన్న నిపుణులు

High cholesterol risks : తిరుపతి లడ్డూలో యానిమల్ ఫ్యాట్ కలిసిందంటూ ఈ మధ్య జరుగుతున్న రచ్చ గురించి తెలిసిందే. అయితే కేవలం అపవిత్రమే కాదు.. ఆరోగ్యానికి కూడా మంచిది కాదంటున్నారు ఆరోగ్య నిపుణులు. 

జంతువుల కొవ్వు ఆరోగ్యానికి అస్సలు మంచిది కాదట(Image Source : Pinterest)

Source : pinterest

Animal fat and cholesterol levels : తిరుపతి లడ్డూల్లో బీఫ్ ఫ్యాట్, ఫిష్ ఆయిల్స్, పంది ఫ్యాట్ కలిసిందంటూ తెలుగుదేశం ప్రభుత్వం ఆరోపణలు చేసి.. ఆధారాలను కూడా ప్రవేశపెట్టింది. అయితే ఇప్పటికే ఈ కల్తీ నెయ్యి వ్యవహారం పీక్స్​కి చేరుకుంది. పెద్దలు కూడా దీనిని ఓ తీవ్రమైన చర్యగా చెప్తున్నారు. తిరుపతి లడ్డూలు అపవిత్రం చేసి మనోభావాలు దెబ్బతినేలా చేశారంటూ వ్యాఖ్యానిస్తున్నారు. అయితే ఇవి కేవలం అపవిత్రమే కాదు ఆరోగ్యానికి కూడా అనర్థాలనే ఇస్తాయి అంటున్నారు వైద్యులు. ముఖ్యంగా గుండెకు ఇవి అత్యంత ప్రమాదమంటున్నారు కార్డియాలజిస్టులు. 

చెడు కొలెస్ట్రాల్ పెరుగుతుంది..

సాధారణంగా జంతువుల కొవ్వులలో ట్రైగ్లిజరైడ్స్, సంతృప్త కొవ్వులు పుష్కలంగా ఉంటాయి. ఇవి ఆరోగ్యానికి అస్సలు మంచిది కాదు. ఈ కొవ్వు రక్తంలోని కొలెస్ట్రాల్ స్థాయిలను పెద్ద మొత్తంలో పెంచడానికి దారి తీస్తుంది. అంతేకాకుండా గుండె, ఇతర అవయవాలల్లో అడ్డంకులు ఏర్పడేలా చేస్తుంది. కాలక్రమేణా జంతువుల కొవ్వు కాలేయ పనితీరును కూడా ప్రభావితం చేస్తుంది. అధిక కొవ్వు స్థాయిలను జీర్ణం చేసుకునేందుకు కాలేయంపై ఎక్కువ ప్రెజర్ పడుతుంది. 

లాభాల కంటే నష్టాలే ఎక్కువ

మాంసాహారాన్ని తరచుగా ప్రోటీన్లు, విటమిన్ బి12 కోసం చాలామంది తీసుకుంటారు. ఇతర వనరుల ద్వారా సులభంగా పొందలేని పోషకాలు చికెన్, చేపలు, బీఫ్, పంది మాంసం రూపంలో ఉంటాయి. అయితే వీటివల్ల ప్రయోజనాల కంటే నష్టాలే ఎక్కువ ఉంటాయంటున్నారు. ముఖ్యంగా రెడ్ మీట్​లో సంతృప్త కొవ్వులు ఎక్కువగా ఉంటాయి. ఇవి దీర్ఘకాలం తీసుకుంటే ప్రాణాంతకం కూడా అవుతుంది. గుండె సమస్యలు ఎక్కువైతాయి. అధిక కొలెస్ట్రాల్, రక్తపోటు ప్రమాదం కూడా పెరుగుతుందని చెప్తున్నారు. 

అలా తీసుకుంటే మంచిదే కానీ ఇలా..

ఫిష్ ఆయిల్ నేరుగా తీసుకుంటే మంచిదే కానీ.. దానిని షుగర్స్​తో కలిపినప్పుడు గుండె ఆరోగ్యంపై నెగిటివ్ ప్రభావాలను చూపిస్తుందంటున్నారు కార్డియాలజిస్ట్​లు. సాధారణంగా ఫిష్ ఆయిల్ గుండె ఆరోగ్యంపై సానుకూల ప్రభావం చూపిస్తుంది. చెడు కొవ్వును తగ్గించి గుండె ఆరోగ్యానికి మేలు చేయడంలో ఫిష్ ఆయిల్ మంచి బెనిఫిట్స్ అందిస్తుంది. కానీ షుగర్​తో కలిపి ఫిష్ ఆయిల్ తీసుకున్నప్పుడు చెడు కొలెస్ట్రాల్​ను ఇది పెంచుతుంది. దీనివల్ల గుండె సమస్యలు పెరుగుతాయి. ఫిష్ ఆయిల్​లోని అసంతృప్త కొవ్వులు.. సంతృప్త కొవ్వులతో కలిసినప్పుడు గుండె సమస్యలు ఎక్కువ అవుతాయని పలు పరిశోధనలు చెప్తున్నాయి. 

ఈ ఫ్యాట్స్ మంచివేనట

ఎక్కువకాలం చక్కెర ఎక్కువ కలిగిన ఫుడ్స్, యానిమల్ ఫ్యాట్స్ అధికంగా ఉండే ఆహారాలు తీసుకుంటే స్థూలకాయం, ఇన్సులిన్ నిరోధకత, దీర్ఘాకలిక ఆరోగ్య సమస్యలకు దారితీస్తాయి. ఇవి మధుమేహం, హృదయ, లివర్ సంబంధ వ్యాధులకు దారితీస్తుంది. అయితే సంతృప్తి కొవ్వులను హెల్తీ ఫ్యాట్స్​తో భర్తీ చేయడం వల్ల గుండె జబ్బుల ప్రమాదం గణనీయంగా తగ్గుతుందని చెప్తున్నారు. ఫ్యాట్స్​ని డైట్​లో కలిపి తీసుకోవాలనుకున్నప్పుడు కచ్చితంగా వైద్యులు లేదా నిపుణుల సలహాలు తీసుకోవాలి. అప్పుడే అనారోగ్య సమస్యలు లేకుండా హెల్తీగా ఉండొచ్చు.