Anemia Symptoms : మీలో ఈ లక్షణాలు కనిపిస్తున్నాయా? అయితే ఇది రక్తహీనత (Iron Deficiency) కావచ్చు, లైట్ తీసుకోకండి

Anemia Signs : మహిళల్లో అనీమియా ఎక్కువగా కనిపిస్తుంది. అయితే రక్తహీనత ఉన్నప్పుడు శరీరం కొన్ని లక్షణాలు ఇస్తుంది. అవి ఏంటో.. ఎప్పుడు వైద్య సహాయం తీసుకోవాలో ఇప్పుడు చూసేద్దాం.

రక్తహీనత లక్షణాలు ఇవే

Source : Gemini AI

Show Quick Read

Key points generated by AI, verified by newsroom

• రక్తహీనత వల్ల తరచుగా అలసట, చర్మం పాలిపోవడం సాధారణం.
• ఊపిరి ఆడకపోవడం, తలనొప్పి, చేతులు కాళ్లు చల్లబడతాయి.
• గుండె వేగంగా కొట్టుకోవడం, జుట్టు రాలితే వైద్యుడిని సంప్రదించాలి.

Anemia Warning Signs : శరీరంలో ఆరోగ్యకరమైన ఎర్ర రక్త కణాలు లేదా హిమోగ్లోబిన్ తగినంతగా లేకపోతే రక్తహీనత ఏర్పడుతుంది. ముఖ్యంగా ఐరన్ లోపం వల్ల వచ్చే అనీమియా ప్రారంభంలో స్వల్పంగా ఉంటుంది. కాబట్టి దాని లక్షణాలు పెద్దగా కనిపించకపోవచ్చు. అయితే ఐరన్ లోపం పెరిగేకొద్దీ అలసట, బలహీనత వంటి లక్షణాలు కనిపిస్తాయి. వాటిని నిర్లక్ష్యం చేయకుండా కారణాన్ని తెలుసుకోవడానికి వైద్యుడిని సంప్రదించడం మంచిది. మరి రక్తహీనత లక్షణాలు ఎలా ఉంటాయో.. వేటిని నిర్లక్ష్యం చేయకూడదో ఇప్పుడు తెలుసుకుందాం.

తరచుగా అలసట

ఎంత విశ్రాంతి తీసుకున్నా తరచుగా అలసటగా, నీరసంగా అనిపించడం అనీమియా సాధారణ లక్షణాల్లో ఒకటి. శరీర కణజాలాలకు ఆక్సిజన్ సరఫరా తగ్గడం వల్ల శక్తి తగ్గినట్లు అనిపించవచ్చు. 

పాలిపోయే చర్మం 

అనీమియా ఉన్నప్పుడు ముఖం, పెదవులు, నాలుక లేదా కంటి లోపలి భాగం సాధారణం కంటే పాలిపోయినట్లు కనిపించవచ్చు. అయితే స్కిన్ ఛేంజ్ అవ్వడానికి ఇది కూడా ఒక కారణం కావచ్చు. అలాగే చర్మం రంగులో మార్పులకు ఇతర కారణాలు కూడా ఉండొచ్చు.

ఊపిరి తీసుకోవడంలో ఇబ్బంది

మెట్లు ఎక్కడం, వేగంగా నడవడం లేదా వ్యాయామం చేయడం వంటి పనులు చేసినప్పుడు సాధారణం కంటే త్వరగా ఆయాసం రావచ్చు. శరీరానికి ఆక్సిజన్ సరఫరా తగ్గడం దీనికి ఒక కారణం కావచ్చు.

తల తిరగడం, తేలికగా అనిపించడం

అనీమియా తీవ్రత పెరిగినప్పుడు కొందరిలో తల తిరగడం, నిలబడినప్పుడు తూలుతున్నట్లు లేదా తేలికగా అనిపించడం వంటి లక్షణాలు కనిపించవచ్చు. ఇవి తరచుగా వస్తుంటే నిర్లక్ష్యం చేయకండి.

తలనొప్పి, ఏకాగ్రత తగ్గడం

ఆక్సిజన్ సరఫరా తగ్గడం వల్ల కొందరికి తలనొప్పి రావచ్చు. అలాగే చదవడం, పని చేయడం వంటి సమయంలో ఏకాగ్రత పెట్టడం కష్టంగా అనిపించవచ్చు. 

చేతులు, కాళ్లు చల్లగా మారడం

అనీమియా ఉన్న కొందరికి చేతులు, కాళ్లు తరచుగా చల్లగా అనిపించవచ్చు. ముఖ్యంగా ఇతర లక్షణాలతో పాటు ఈ సమస్య కూడా ఉంటే వైద్యుడిని సంప్రదించడం మంచిది.

గుండె వేగంగా కొట్టుకోవడం

శరీరానికి ఆక్సిజన్ సరఫరాను కొనసాగించేందుకు గుండె వేగంగా కొట్టుకోవాల్సి రావచ్చు. దీంతో గుండె దడ, వేగంగా కొట్టుకుంటున్నట్లు అనిపించడం వంటి లక్షణాలు కొందరిలో కనిపించవచ్చు.

జుట్టు రాలడం, గోర్లు పెళుసుగా మారడం

ఐరన్ లోపం ఎక్కువగా ఉన్నప్పుడు జుట్టు రాలడం, గోర్లు బలహీనంగా మారి సులభంగా విరిగిపోవడం వంటి మార్పులు కనిపిస్తాయి. అయితే వీటికి ఇతర పోషక లోపాలు, హార్మోన్ల సమస్యలు వంటి కారణాలు కూడా ఉండొచ్చు.

కాబట్టి మీలో ఈ లక్షణాలు కనిపిస్తే వెంటనే వైద్య సహాయం తీసుకోండి. ఐరన్ రిచ్ ఫుడ్స్ తీసుకోవడంతో పాటు.. వైద్యులు సూచించే టానిక్, ఐరన్ సప్లిమెంట్స్ రెగ్యులర్గా తీసుకోవాల్సి ఉంటుంది. అత్యవసర పరిస్థితుల్లో రక్తం ఎక్కించవచ్చు కూడా. కాబట్టి సమస్యను తేలికగా తీసుకోకూడదని చెప్తున్నారు నిపుణులు.

గమనిక : ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.

మరిన్ని చదవండి

జుట్టు ఎక్కువగా ఊడుతోందా? ఐరన్ లోపానికి ఇవే సంకేతాలు.. ఈ లక్షణాలను నిర్లక్ష్యం చేయకండి

మహిళల్లో ఐరన్, B12 లోపానికి ప్రధాన కారణాలు.. లక్షణాలు, నివారణ మార్గాలు ఇవే