Police Jobs: నిరుద్యోగులకు సీఎం గుడ్ న్యూస్, 15 రోజుల్లో 15 వేల పోలీసు ఉద్యోగాల భర్తీకి నోటిఫికేషన్

తెలంగాణలో రానున్న 15రోజుల్లో 15 వేల పోలీసుల ఉద్యోగాల భర్తీకి నోటిఫికేషన్ జారీ చేస్తామని సీఎం రేవంత్ రెడ్డి చెప్పారు. అదేవిధంగా 64 కొత్త ఖాళీలతో గ్రూప్-1 నోటిఫికేషన్ జారీ చేయనున్నట్లు వెల్లడించారు.

పోలీసు ఉద్యోగాలకు నోటిఫికేషన్

TS Police Recruitment: తెలంగాణలో రానున్న 15 రోజుల్లో 15 వేల పోలీసుల ఉద్యోగాల భర్తీకి నోటిఫికేషన్ జారీ చేస్తామని రాష్ట్ర ముఖ్యమంత్రి రేవంత్ రెడ్డి చెప్పారు. రాష్ట్రంలోని ఖాళీ పోస్టులను యుద్ధప్రాతిపదికన భర్తీ చేస్తామని సీఎం తెలిపారు. జాబ్‌ క్యాలెండర్‌ ప్రకారం ఉద్యోగాల భర్తీ పూర్తి చేస్తామని.. త్వరలోనే గ్రూప్‌-1 నోటిఫికేషన్‌ విడుదల చేస్తామని ప్రకటించారు. 64 కొత్త ఖాళీలతో గ్రూప్-1 నోటిఫికేషన్ జారీ చేయనున్నట్లు ఆయన వెల్లడించారు. గ్రూప్‌-1 ఉద్యోగాలకు అదనంగా రెండేళ్ల వయోపరిమితి అమలు చేయబోతున్నామని తెలిపారు. హైదరాబాద్‌లోని అంబేద్కర్ విగ్రహం వద్ద బుధవారం (జనవరి 7న) ముఖ్యమంత్రి రేవంత్ రెడ్డి సింగరేణిలో 441 మందికి ఉద్యోగ నియామక పత్రాలను అందజేశారు. ఈ సందర్భంగా 412 మందికి కారుణ్య నియామక పత్రాలు, 29 మందికి ఉద్యోగ నియామకాల పత్రాలను సీఎం అందజేశారు. వీరిలో బ‌దిలీ వ‌ర్కర్లు, జూనియ‌ర్ అసిస్టెంట్లు, మోటారు మెకానిక్‌లు ఉన్నారు. ప్రజాస్వామ్య స్పూర్తికి నిదర్శనంగా, అంబేడ్కర్ విగ్రహ సాక్షిగా నియామకాల పత్రాలను అందజేస్తున్నామని ముఖ్యమంత్రి వ్యాఖ్యానించారు. 

నిరుద్యోగులు పోటీ పరీక్షలకు సిద్దం కావాలి... 
రాష్ట్రంలోని 30 లక్షల నిరుద్యోగులు పోటీ పరీక్షలకు సిద్దం కావాలని సీఎం రేవంత్ రెడ్డి ఈ సందర్భంగా సూచించారు. తమ ప్రభుత్వం ఉద్యోగాల నియామకాల కోసం అన్నిరకాల ప్రయత్నాలు చేస్తుందని తెలిపారు. గడచిన పదేళ్లకాలంలో నిర్లక్ష్యానికి గురై వ్యవస్థపై విశ్వాసం కోల్పోయిన 32 లక్షల మంది నిరుద్యోగుల్లో విశ్వాసం నింపేందుకు తమ ప్రభుత్వం కార్యక్రమాలు చేపడుతుందని సీఎం అన్నారు. రానున్న 15 రోజుల్లో 15 వేల పోలీసుల ఉద్యోగాల భర్తీకి నోటిఫికేషన్ జారీ చేస్తామని రాష్ట్ర ముఖ్యమంత్రి రేవంత్ రెడ్డి చెప్పారు. అదేవిధంగా 64 కొత్త ఖాళీలతో గ్రూప్-1 నోటిఫికేషన్ జారీ చేయనున్నట్లు ఆయన వెల్లడించారు. 

వయోపరిమితి పెంపు..
పరీక్షల రద్దువల్ల ఉద్యోగార్థులు అవకాశాలు కోల్పోవద్దని, నిరుద్యోగులకు రెండేళ్ల వయోసడలింపు ఇస్తామని ముఖ్యమంత్రి తెలిపారు. ప్రభుత్వ ఉద్యోగాల భర్తీకి చర్యలు చేపడుతున్నామన్నారు. ఒక్కో సమస్యను పరిష్కరించుకుంటూ ముందుకు వెళ్తు్న్నామని సీఎం అన్నారు.

సింగరేణి కార్మికుల పాత్రను ఎవరూ తగ్గించలేరు..
తెలంగాణ సాధనలో సింగరేణి కార్మికుల పాత్రను ఎవరూ తగ్గించలేరని ఆయన స్పష్టం చేశారు. పార్టీలు తెలంగాణ సాదనలో వైఫల్యం చెందినా  కార్మికులు రాష్ట్రం కోసం అనేక పోరాటాలు చేశారని ఆయన గుర్తు చేసుకున్నారు. గత రాష్ట్ర ప్రభుత్వం సింగరేణిని ఖాయిలా పడేలా చేసిందని ఆయన అన్నారు. కేంద్రం కూడా సింగరేణి సంస్థకు అనేక అడ్డంకులు సృష్టించిందన్నారు.   గత ఎన్నికల్లో సింగరేణి ప్రాంతం కాంగ్రెస్‌కు అండగా నిలిచి ప్రజాప్రభుత్వ ఏర్పాటుకు సహకరించిందని ముఖ్యమంత్రి అన్నారు.  

80 శాతం ఉద్యోగాలు స్థానికులకే.. 
సింగరేణిలో 80 శాతం ఉద్యోగాలు స్థానికులకే  ఇవ్వాలని ఇటీవల ఆదేశించినట్లు సీఎం స్పష్టం చేశారు. సింగరేణి ప్రాంతంలో సూపర్ స్పెషాలిటీ ఆసుపత్రి నిర్మించే అంశంపై చర్చించి సానుకూల నిర్ణయం తీసుకుంటామని ముఖ్యమంత్రి తెలిపారు.  కారుణ్య నియామకాల వయోసడలింపు అంశాన్ని కూడా పరిశీలిస్తామన్నామని సీఎం రేవంత్ తెలిపారు.

ALSO READ:
కానిస్టేబుల్‌ నియామకాలకు ‘సుప్రీం’ గ్రీన్‌సిగ్నల్‌, త్వరలో నియామక పత్రాలు!
తెలంగాణలో కానిస్టేబుల్‌ ఉద్యోగాలకు ఎంపికైన 15,750 మంది అభ్యర్థులకు సుప్రీంకోర్టులో ఊరట లభించింది. పోలీసు నియామక మండలి (TSLPRB) సుప్రీంకోర్టులో వేసిన పిటిషన్‌కు సానుకూలంగా తీర్పు వచ్చినట్టు విశ్వసనీయ సమాచారం. దీంతో గతేడాది అక్టోబర్‌ 4న ప్రకటించిన కానిస్టేబుల్‌ ఫలితాలనే ఫైనల్‌ చేస్తూ.. టీఎస్‌ఎల్‌పీఆర్బీ నుంచి తుది ప్రకటన వెలువడనుంది.
పూర్తివివరాల కోసం క్లిక్ చేయండి..