Hrithik Roshan: హృతిక్ రోషన్ తో సమంత.. క్రేజీ ప్రాజెక్ట్ సెట్ కానుందా..?

తాజాగా హృతిక్ రోషన్.. సమంతతో కలిసి తీసుకున్న ఫొటోలు సోషల్ మీడియాలో చక్కర్లు కొడుతోంది.

Written By : ABP Desam | Updated at : 24 Dec 2021 12:08 PM (IST)

హృతిక్ రోషన్ తో సమంత..

బాలీవుడ్ స్టార్ హీరో హృతిక్ రోషన్ కి ఉన్న ఫ్యాన్ ఫాలోయింగ్ గురించి ప్రత్యేకంగా చెప్పనక్కర్లేదు. ఒక్క ఇండియాలోనేకాకుండా.. ప్రపంచవ్యాప్తంగా ఆయనకు అభిమానులు ఉన్నాయి. ఇప్పుడు ఆయన ఫ్యాన్స్ కి కిక్కిచ్చే వార్త ఒకటి సోషల్ మీడియాలో చక్కర్లు కొడుతోంది. త్వరలోనే హృతిక్ హాలీవుడ్ లో ఎంట్రీ ఇవ్వబోతున్నట్లు సమాచారం. ఇంటర్నేషనల్ స్టార్ ఆయిన సమంత లాక్‌వుడ్‌తో కలిసి హృతిక్ సినిమా చేయబోతున్నట్లు వార్తలొస్తున్నాయి.

తాజాగా హృతిక్ రోషన్.. సమంతతో కలిసి తీసుకున్న ఫొటోలు సోషల్ మీడియాలో చక్కర్లు కొడుతోంది. ఈ ఫొటోలను సమంత లాక్‌వుడ్‌ తన ఇన్స్టాగ్రామ్ లో షేర్ చేసింది. సినిమా ఫ్యామిలీ నుంచి వచ్చిన ఈ నటుడిని కలుసుకోవడం ఎంతో ఆనందంగా ఉందని.. యాక్షన్ ను ఇష్టపడే పెద్ద సూపర్ స్టార్ హృతిక్ రోషన్ అంటూ ఫొటోలకు క్యాప్షన్ ఇచ్చింది.

సమంత లాక్‌వుడ్‌ అమెరికాకు చెందిన మోడల్, నటి. తన కెరీర్ లో ఎన్నో హిట్ సినిమాల్లో నటించింది ఈ బ్యూటీ. 'షూట్ ది హీరో' అనే సినిమా ఈమెకి మంచి క్రేజ్ ను తీసుకొచ్చింది. కొన్నిరోజులుగా ఆమె ముంబైలోనే ఉంటుంది. ఒక ప్రాజెక్ట్ కోసమే ఆమె ఇక్కడ ఉన్నట్లు వార్తలు వచ్చాయి. ఇప్పుడామె హృతిక్ రోషన్ తో కలిసి సినిమా చేయబోతున్నట్లు బాలీవుడ్ లో ప్రచారం జరుగుతోంది. మరి దీనిపై హృతిక్ స్పందిస్తాడేమో చూడాలి.

ఇక హృతిక్ సినిమాల విషయానికొస్తే.. ప్రస్తుతం ఆయన 'విక్రమ్ వేద' రీమేక్ లో నటిస్తున్నారు. ఇందులో హృతిక్ తో పాటు సైఫ్ అలీఖాన్ కూడా నటిస్తున్నారు. దీంతో పాటు 'ఫైటర్' అనే మరో సినిమాలో నటిస్తున్నారు హృతిక్. ఈ సినిమా 2023లో విడుదల కానుంది.