Sunil: కోలీవుడ్‌లో దూసుకుపోతున్న టాలీవుడ్ యాక్టర్ సునీల్!

టాలీవుడ్ యాక్టర్ సునీల్ ప్రస్తుతం పలు క్రేజీ ప్రాజెక్ట్స్ తో బిజీగా ఉన్నారు. తెలుగులోనే తమిళ్ చిత్రాల్లోనూ అవకాశాలు అందుకుంటూ దూసుకుపోతున్నారు.

సునీల్ (Image Credit: Sunil Instagram)

టాలీవుడ్ లో కమెడియన్ గా కెరీర్ ప్రారంభించి, ఈ క్రమంలో హీరో అవతారమెత్తిన నటుడు సునీల్. కొన్నేళ్ల పాటు తనదైన శైలి కామెడీతో ప్రేక్షకులను కడపుబ్బా నవ్వించిన ఆయన.. సెకండ్ ఇన్నింగ్స్ లో క్యారక్టర్ ఆర్టిస్టుగా అదరగొడుతున్నాడు. విభిన్నమైన పాత్రలను పోషిస్తూ తనలోని పరిపూర్ణ నటుడిని బయటకి తీస్తున్నాడు. కేవలం తెలుగులోనే కాదు తమిళ్ లోనూ వరుస అవకాశాలు అందుకుంటూ, బిజీ యాక్టర్ గా మారిపోయాడు.

హీరోగా వరుస పరాజయాలు పలకరించడంతో కొన్నేళ్ళు గ్యాప్ తీసుకున్న సునీల్.. 'కలర్ ఫోటో' సినిమాలో నెగటివ్ షేడ్స్ ఉన్న పాత్రలో నటించి విలనీ వేషాలు కూడా వేయగలనని నిరూపించాడు. దీంతో సుకుమార్ దర్శకత్వంలో అల్లు అర్జున్ హీరోగా తెరకెక్కిన 'పుష్ప: ది రైజ్' చిత్రంలో విలన్ గా నటించే ఛాన్స్ అందుకున్నాడు. ఇందులో మంగళం శ్రీను అనే ప్రతినాయకుడి పాత్రలో భయంకరమైన లుక్‌లో కనిపించి అందరినీ ఆశ్చర్య పరిచాడు. 

'పుష్ప పార్ట్ 1' మూవీలో సునీల్ నటనను ప్రశంసలు దక్కడమే కాదు, పాన్ ఇండియా స్థాయిలో అందరి దృష్టిని ఆకర్షించాడు. ఈ నేపథ్యంలో తమిళ్ చిత్రాల్లో అవకాశాలు అందుకున్నాడు. శివ కార్తికేయన్‌ హీరోగా నటించిన 'మావీరన్‌' మూవీలో కీలక పాత్ర ద్వారా కోలీవుడ్ లో ఎంట్రీ ఇచ్చారు. తెలుగు తమిళ భాషల్లో రిలీజైన ఈ సినిమా సునీల్ కి మంచి పేరు తెచ్చిపెట్టింది.

'మావీరన్' తర్వాత వెంటనే సూపర్ స్టార్ రజనీకాంత్ 'జైలర్' సినిమాలో నటించే అవకాశం దక్కించుకున్నాడు సునీల్. ఆయన పోషించిన బ్లాస్ట్ మోహన్ పాత్రకు విశేష ఆదరణ లభించింది. ఇటీవల విశాల్ హీరోగా తెరకెక్కిన 'మార్క్ ఆంటోని' మూవీలో ఏకాంబరం అనే పాత్రలో నటించి మరో సక్సెస్ రుచి చూశారు సునీల్. ఇలా డైరెక్ట్ తమిళ్ లో నటించిన మూడు సినిమాలూ విజయం సాధించడంతో కోలీవుడ్ లో క్రేజీ యాక్టర్ గా మారిపోయాడు.

సునీల్ ప్రస్తుతం కార్తీ హీరోగా నటిస్తున్న 'జపాన్' అనే తమిళ్ మూవీలో కీలక పాత్ర పోషిస్తున్నారు. ఇప్పటికే రిలీజైన టీజర్ లో అతని లుక్ ఆకట్టుకుంది. అంజలి ప్రధాన పాత్రలో రూపొందుతున్న 'ఈగై' చిత్రంలోనూ కనిపించబోతున్నారు. దీంతో పాటుగా రాఘవ లారెన్స్ తమ్ముడు ఎల్విన్ తో కలిసి 'బుల్లెట్' అనే సినిమా చేయనున్నారు. తమిళ చిత్రాలే కాదు కొన్ని పాన్ ఇండియా ప్రాజెక్ట్స్ కూడా సునీల్ చేతిలో ఉన్నాయి. 

స్టార్ డైరెక్టర్ శంకర్, రామ్ చరణ్ కాంబినేషన్ లో రాబోతున్న 'గేమ్ ఛేంజర్' మూవీలో నటిస్తున్నారు సునీల్. 'పుష్ప: పార్ట్ 2' చిత్రంలో మంగళం శ్రీనుగా కంటిన్యూ అవుతున్నారు. అలానే మహేష్ బాబు, త్రివిక్రమ్ శ్రీనివాస్ కలయికలో రూపొందే 'గుంటూరు కారం' సినిమాలోనూ నటిస్తున్నాడు. ఇవే కాకుండా మరికొన్ని చిత్రాలు చర్చల దశలో ఉన్నాయి. ఇలా సునీల్ పలు క్రేజీ ప్రాజెక్ట్స్ తో ఏడాది పొడవునా బిజీగా గడుపుతున్నారు. మరి ఈ సినిమాలు నటుడికి ఎలాంటి పేరు తెచ్చి పెడతాయో వేచి చూడాలి.

Join Us on Telegram: https://t.me/abpdesamofficial