Tapsee Pannu wedding: తాప్సీ పన్ను పెళ్లంట - ఎప్పుడు, ఎక్కడో తెలుసా?

హీరోయిన్ తాప్సీ పన్ను, బ్యాడ్మింటన్ ప్లేయర్ మథియస్ బో ల పదేళ్ల ప్రేమ బంధం పెళ్లిగా మారటానికి అంతా సిద్ధమయింది. మరి వారి డెస్టినేషన్ వెడ్డింగ్, మరిన్ని పెళ్ళి వివరాలు తెలుసుకుందామా?

Image Credit: Tapsee Pannu/Instagram

హీరోయిన్ తాప్సీ పన్ను త్వరలోనే పెళ్లి పీటలు ఎక్కనుంది. ప్రియుడు, బ్యాడ్మింటన్ ప్లేయర్ మథియస్ బో‌ను పెళ్లి చేసుకోనుంది. వీరిద్దరు పదేళ్లుగా ప్రేమ బంధంలో ఉన్నట్టు తాప్సీ పన్ను గతేడాది బయటపెట్టింది. కాగా, వీరి వివాహం ఉదయ్‌పూర్‌లో కేవలం కుటుంబ సభ్యుల మధ్య జరగనుంది. దీనికి బాలీవుడ్ నటులెవర్నీ పిలవటం లేదని తెలిసింది.

సిఖ్-క్రిస్టియన్ సాంప్రదాయంలో పెళ్లి

వీరి పెళ్లి సిఖ్, క్రిస్టియన్ సాంప్రదాయాల్లో జరగనున్నట్లు సమాచారం. పదేళ్లుగా తాప్సీ పన్ను ఈ డానిష్ బ్యాడ్మింటన్ ప్లేయర్ మథియస్ బో డేటింగ్‌లో ఉంది. మార్చి నెలలో ముహూర్తం ఫిక్స్ అయినట్లు సమాచారం.

డిల్లీకి చెందిన తాప్సీ తెలుగుతో పాటు పలు భాషల్లో నటించినప్పటికీ, పెద్దగా గుర్తింపు లేక బాలివుడ్ లో సెటిల్ అయ్యింది. తర్వాత ఎంతో మంది స్టార్ హీరోలతో, పాన్ ఇండియా చిత్రాల్లోనూ నటించింది. ఈ మధ్య 'డంకీ' మూవీతో ప్రేక్షకుల ముందుకు వచ్చింది. అయితే, ఈ మూవీకి యావరేజ్ టాక్ వచ్చింది. తాప్సీ పన్ను తెలుగులో 'ఝుమ్మంది నాదం' సినిమాతో హీరోయిన్ గా పరిచయం అయ్యారు.

గతేడాది జనవరిలో తన డ్రీం వెడ్డింగ్ ఎలా జరగాలో తాప్సీ చెప్పుకొచ్చింది. తన పెళ్ళిలో ఆటపాటలు, చాలా రకాల తిను పదార్థాలు ఉండబోతున్నట్టు చెప్పింది. ‘‘పెళ్లి జీవితంలో ఒక్కసారి జరిగే వేడుక. ఇందులో ఎటువంటి డ్రామాలు లేకుండా, చాలా సాధారణంగా జరుపుకోవాలి. ఎలాగూ ప్రొఫెషనల్ జీవితంలో కావల్సినంత డ్రామా ఉంటుంది’’ అని ఈ తరం పెళ్లికూతుర్లను ఉద్దేశించి చెప్పుకొచ్చింది. ఇంకా, తన పెళ్లిలో అర్ధరాత్రిళ్ల వరకు ఎలాంటి సంప్రదాయ కార్యక్రమాలు చేయబోవటం లేదని తాప్సీ తెలిపింది.

తాప్సీ పెళ్లికూతురు లుక్ ఎలా ఉందబోతోందంటే..

తన వెడ్డింగ్ లుక్ గురించి మాట్లాడుతూ, తనకు హెవీ హెయిర్ స్టైల్స్ నచ్చవని, చాలా సాధారణంగా జుట్టు వేసుకొవటానికి ఇష్టపడతానని, కొంతమంది పెళ్ళికూతుర్లు అంతంత మేకప్ లు వేసుకొని తయారవడం చూస్తే జాలి కలుగుతుందని, అంతగా రెడీ అయ్యి, ఫొటోల్లో వేరే మనిషిలాగా కనపడితే తమను తాము ఎలా చూసుకోగలరని ఆమె ఆశ్చర్యపోయారు. "ఈ జ్ఞాపకాలు కేవలం ఆ ఒక్కరోజు కోసం కాదు, జీవితాంతం గుర్తుండిపోయేవి కదా? ఫొటోలు చూసుకొని మనల్ని మనం గుర్తుపట్టలేకుండా ఉంటే ఎలా?" అని అన్నారామె.

తనకంటూ ఉన్నతమైన అభిప్రాయాలతో ఉంటూ, సందర్భాన్ని బట్టి తన ఫెమినిజం గొంతు వినిపిస్తుంది తాప్సీ. ‘పింక్’ లాంటి సినిమాల్లో బిగ్ బీతో నటించి, మంచి పేరు సంపాదించుకున్నారు. ఇటు ఆరోగ్యం, జీవనవిధానంకు సంబంధించిన ఎన్నో విషయాల మీద ఆమె మాట్లాడుతుంది.