Shah Rukh Khan: ఇక నా వయస్సుకు తగిన మూవీస్ చేస్తా, నెక్ట్స్ మూవీపై షారుఖ్ క్రేజీ అప్డేట్

Shah Rukh Khan Next Movie: ప్రస్తుతం ‘డంకీ’ చిత్రం ఇచ్చిన సక్సెస్‌ను ఎంజాయ్ చేస్తున్నాడు బాలీవుడ్ బాద్‌షా షారుఖ్ ఖాన్. ఇంతలోనే తన తరువాతి సినిమా అప్డేట్ ఇచ్చి ఫ్యాన్స్‌ను డబుల్ హ్యాపీ చేశాడు.

Image Credit: Shah Rukh Khan/Instagram

దాదాపుగా టైర్ 1 హీరోలంతా ఏడాదికి ఒక్క సినిమాను విడుదల చేయడమే చాలా కష్టం. ఎప్పుడో ఒకసారి రెండు సినిమాలతో కూడా ఫ్యాన్స్‌ను అలరిస్తూ ఉంటారు. అలాంటిది ఈ కాలంలో టైర్ 1 హీరోలు ఏడాది మూడు సినిమాలతో రావడం, అది కూడా ఆ మూడు సినిమాలతో బ్లాక్‌బస్టర్ హిట్స్ సాధించడం అనేది అద్భుతం అనే చెప్పాలి. బాలీవుడ్‌ బాద్‌షా షారుఖ్ ఖాన్.. ఆ అద్భుతాన్ని నిజం చేసి చూపించాడు. 2023లో మొత్తం మూడు చిత్రాలతో ప్రేక్షకుల ముందుకు వచ్చాడు షారుఖ్. మొదటి రెండు చిత్రాలు బ్లాక్‌బస్టర్ అయ్యి.. మూడో చిత్రం ‘డంకీ’ పాజిటివ్ టాక్‌తో థియేటర్లలో రన్ అవుతోంది. అప్పుడే తన తరువాతి సినిమాపై క్రేజీ అప్డేట్ బయటపెట్టాడు షారుఖ్.

వయసుకు తగిన పాత్ర..

2023లో ‘పఠాన్’, ‘జవాన్’ చిత్రాలతో హిట్ కొట్టిన తర్వాత రాజ్‌కుమార్ హిరానీతో కలిసి ‘డంకీ’ చేశాడు షారుఖ్ ఖాన్. డిసెంబర్ 21న ‘డంకీ’ మూవీ థియేటర్లలో విడుదలయ్యి సక్సెస్‌ఫుల్‌గా రన్ అవుతున్న కారణంగా షారుఖ్ పలు ప్రమోషన్స్ కార్యక్రమాల్లో పాల్గొంటున్నాడు. అదే క్రమంలో ఒక ఇంటర్వ్యూలో పాల్గొన్న బాలీవుడ్ బాద్‌షా.. తన తరువాతి సినిమా గురించి క్రేజీ అప్డేట్ ఇచ్చాడు. ‘‘మార్చి, ఏప్రిల్‌లో కొత్త సినిమాను ప్రారంభిస్తాను. నా వయసుకు తగిన సినిమాను చేసే ప్రయత్నంలో ఉన్నాను. అందులో కూడా నేనే హీరోగా నటిస్తాను’’ అని బయటపెట్టాడు షారుఖ్. దీంతో ఫ్యాన్స్‌లో మరింత ఆతృత పెరిగిపోయింది.

వాటితో పోలిస్తే కొంచెం తక్కువ..

రాజ్‌కుమార్ హిరానీలాంటి సెన్సేషనల్ డైరెక్టర్‌తో ఇప్పటివరకు షారుఖ్ కలిసి పనిచేయలేదు. అందుకే వీరిద్దరి కాంబినేషన్‌లో తెరకెక్కిన ‘డంకీ’పై ప్రేక్షకులు ఎన్నో అంచనాలు పెట్టుకున్నారు. ఈ మూవీకి ప్రేక్షకుల నుండి పాజిటివ్ టాక్ వచ్చినా.. కొందరు మాత్రం ఆశించినంత రేంజ్‌లో లేదని విమర్శిస్తున్నారు. రాజ్‌కుమార్ హిరానీ తెరకెక్కించింది తక్కువ సినిమాలే అయినా.. అవన్నీ బాలీవుడ్‌లో ఒక రేంజ్ మార్క్‌ను సెట్ చేశాయి. వాటన్నింటితో పోలిస్తే.. ‘డంకీ’ కాస్త తక్కువ అని పలువురు ప్రేక్షకులు.. తమ రివ్యూలను అందిస్తున్నారు. కానీ నటన విషయంలో ఎవ్వరూ.. ఎవ్వరికీ తీసిపోలేదని, షారుఖ్‌తో పాటు విక్కీ కౌశల్, తాప్సీ కూడా అద్భుతంగా నటించారని ఆడియన్స్ అభిప్రాయం వ్యక్తం చేస్తున్నారు.

‘డంకీ’ కలెక్షన్స్‌పై ఎఫెక్ట్..

ప్రస్తుతం మూవీ టీమ్ అంతా ‘డంకీ’ సక్సెస్‌ను ఎంజాయ్ చేస్తోంది. ముంబాయ్‌లోని గెయ్టీ గ్యాలక్సీ‌లో పడిన మార్నింగ్ షోను చాలా గ్రాండ్‌గా సెలబ్రేట్ చేసుకున్నారు ఫ్యాన్స్. దానికి సంబంధించిన వీడియోలు సోషల్ మీడియాలో వైరల్ అయ్యాయి కూడా. దీన్ని బట్టి చూస్తే విడుదల రోజే.. దాదాపు రూ.30 కోట్ల కలెక్షన్స్ రాబట్టిందట ‘డంకీ’. ఇక ‘డంకీ’ విడుదలయిన ఒక్కరోజు గ్యాప్‌లోనే ‘సలార్’ కూడా ప్రేక్షకుల ముందుకు రావడంతో దీని కలెక్షన్స్‌పై ప్రభావం పడే అవకాశం ఉందని ఇండస్ట్రీ నిపుణులు భావిస్తున్నారు. పైగా ‘డంకీ’కి వస్తున్న మిక్స్‌డ్ రివ్యూస్ వల్ల మూవీ లవర్స్.. తమ మొదటి ప్రాధాన్యతను ‘సలార్’కే ఇచ్చే అవకాశం ఉంది. ఒకవేళ ‘డంకీ’కి పూర్తిగా పాజిటివ్ టాక్ వచ్చి ఉంటే.. ‘సలార్’ కలెక్షన్స్‌కు గండిపడేది. కానీ అలా జరగలేదు.