చిన్న టైటిళ్లు, పెద్ద హిట్లు - కొత్త సినిమాలదీ ఇదే బాట, హిట్ కొడతారా?

ఇటీవల కాలంలో 'చిన్న టైటిల్స్' తో పాన్ ఇండియా హిట్లు సాధించిన సినిమాలు చాలా ఉన్నాయి. 'పుష్ప' KGF 2, చార్లీ, విక్రమ్, RRR, కాంతారా, పఠాన్ వంటి చిత్రాలు భారీ వసూళ్లను సాధించాయి.

Image Credit: Twitter

ఎంత మంచి కంటెంట్ ఉన్న సినిమా అయినా, భారీ బడ్జెట్ ఖర్చు చేసి తీసిన చిత్రమైనా, దానికి సరైన టైటిల్ పెట్టడం అనేది ఎంతో ముఖ్యం. ఎందుకంటే ఏ మూవీ అయినా ప్రేక్షకుల్లోకి వెళ్ళేది టైటిల్‌తోనే కాబట్టి. జనాల్లోకి వెళ్లిపోయిన RRR & 'ప్రాజెక్ట్ K' వంటి వర్కింగ్ టైటిల్స్ నే శీర్షికలుగా ఫిక్స్ చేశారంటే, టైటిల్ ప్రాధాన్యత ఏంటనేది అర్థం చేసుకోవచ్చు. 

అందుకే ఫిలిం మేకర్స్ బాగా ఆలోచించి తమ సినిమాలకి సరిపోయే క్యాచీ 'టైటిల్స్' ను పెట్టాలని చూస్తుంటారు. ముందుగానే పలు పేర్లను రిజిస్టర్ చేయించి పెట్టుకుంటుంటారు. కానీ ఈ రోజుల్లో ఓ సినిమాకు సరిగ్గా సూట్ అయ్యే టైటిల్ పెట్టాలంటే మేకర్స్ కు కష్టమైపోతోంది.

కొందరు సెంటిమెంట్ గా అచ్చ తెలుగు పేర్లను టైటిల్స్ గా పెట్టడానికి ఆసక్తి కనబరిస్తే.. మరికొందరు ట్రెండీ ఇంగ్లీష్ టైటిల్స్ ను, తెలుగు-ఇంగ్లీష్ కలబోసిన 'టింగ్లిష్' టైటిల్స్ ను ఖరారు చేసుకుంటున్నారు. వారిలో చాలామంది క్యాచీగా ఉండేలా రెండు మూడు అక్షరాలు ఉండేలా, చిన్న చిన్న టైటిల్స్ పెడుతున్నారు. 

ఇటీవల కాలంలో 'చిన్న టైటిల్స్'తో పాన్ ఇండియా హిట్లు సాధించిన సినిమాలు చాలా ఉన్నాయి. స్టైలిష్ స్టార్ అల్లు అర్జున్, డైరెక్టర్ సుకుమార్ కాంబోలో వచ్చిన 'పుష్ప' మూవీ బాలీవుడ్ బాక్సాఫీసు వద్ద సంచలనం సృష్టించింది. ఎస్ ఎస్ రాజమౌళి దర్శకత్వంలో యంగ్ టైగర్ ఎన్టీఆర్, మెగా పవర్ స్టార్ రామ్ చరణ్ కలిసి నటించిన RRR మూవీ ప్రపంచ వ్యాప్తంగా భారీ కలెక్షన్స్ రాబట్టి, బిగ్గెస్ట్ బ్లాక్ బస్టర్ గా నిలిచింది.

రాకింగ్ స్టార్ యశ్, డైరెక్టర్ ప్రశాంత్ నీల్ కాంబినేషన్ లో తెరకెక్కిన KGF సీక్వెల్ చిత్రం పాన్ ఇండియా వైడ్ ఎంతటి ఘన విజయం సాధించిందో ప్రత్యేకంగా చెప్పాల్సిన అవసరం లేదు. కన్నడ హీరో రక్షిత్ శెట్టి నటించిన 'చార్లీ'.. ఆయన సోదరుడు రిషబ్ శెట్టి చేసిన 'కాంతారా' చిత్రాలు జాతీయ స్థాయిలో భారీ వసూళ్లను రాబట్టాయి. విశ్వనటుడు కమల్ హాసన్, లోకేశ్ కనగరాజ్ కాంబోలో వచ్చిన 'విక్రమ్' చిత్రం బ్లాక్ బస్టర్ హిట్ గా నిలిచింది. రీసెంట్ గా బాలీవుడ్ హీరో షారుక్ ఖాన్ సైతం 'పఠాన్' సినిమాతో భారీ విజయాన్ని ఖాతాలో వేసుకున్నారు.

రానున్న రోజుల్లో చిన్న టైటిల్స్ తో మరికొన్ని పెద్ద సినిమాలు ప్రేక్షకులని అలరించడానికి వస్తున్నాయి. యంగ్ రెబల్ స్టార్ ప్రభాస్ హీరోగా 'సలార్', 'స్పిరిట్' వంటి సినిమాలు తెరకెక్కుతున్నాయి. సూపర్ స్టార్ రజినీ కాంత్ 'జైలర్', యూత్ స్టార్ అఖిల్ అక్కినేని 'ఏజెంట్', నేచురల్ స్టార్ నాని 'దసరా' సినిమాలు రిలీజ్ కు రెడీ అవుతున్నాయి. బన్నీ 'పుష్ప 2', తలపతి విజయ్ 'లియో' చిత్రాలు సెట్స్ మీద ఉన్నాయి. షారుఖ్ ఖాన్ 'జవాన్' , 'డుంకీ' సినిమాలు చేస్తుంటే, మరో బాలీవుడ్ స్టార్ సల్మాన్ ఖాన్ 'టైగర్' చిత్రంతో రాబోతున్నారు. మరి వీటిల్లో ఏవేవి బాక్సాఫీస్ హిట్స్ గా నిలుస్తాయో చూడాలి.