Hamare Baarah Movie: 'హమారే బారా' మూవీపై కొనసాగుతున్న దుమారం, విడుదలపై నిషేధం విధించిన ప్రభుత్వం

'హమారే బారా' సినిమాపై దేశ వ్యాప్తంగా ఆందోళనలు కొనసాగుతున్నాయి. ముస్లీంల మనోభావాలను దెబ్బతీసేలా ఉందనే విమర్శలు వెల్లువెత్తుతున్నాయి. ఈ నేపథ్యంలో కర్నాటక సర్కారు ఈ మూవీ విడుదలను నిషేధించింది.

'హమారే బారా' సినిమా(Photo Credit: X)

Hamare Baarah Movie Controversy: ముస్లీం మహిళలు ఎదుర్కొంటున్న ఇబ్బందులను బేస్ చేసుకుని తెరకెక్కిన తాజా చిత్రం ‘హమారే బారా‘. ఈ సినిమాపై దేశ వ్యాప్తంగా ఆందోళనలు కొనసాగుతున్నాయి. ఈ చిత్రం ముస్లీం మహిళలను, ఇస్లాం మతాన్ని కించపరిచేలా ఉందంటూ ముస్లీంలు రగడ చేస్తున్నాయి. మరోవైపు ఈ సినిమా విడుదలపై ఇప్పటికే బాంబే హైకోర్టు స్టే ఇచ్చింది. తాజాగా కర్నాటక సర్కారు కూడా ఈ సినిమా విడుదలపై నిషేధం విధిచింది.

కోర్టు చిక్కుల్లో ‘హమారే బారా‘ చిత్రం

కమల్ చంద్ర దర్శకత్వం వహించిన ‘హమారే బారా‘ సినిమాలో అన్నూ కపూర్ ప్రధాన పాత్ర పోషించారు. కొద్ది వారాల క్రితమే ఈ సినిమా ట్రైలర్ విడుదల అయ్యింది. అప్పటి నుంచి ఈ సినిమాపై వివాదం కొనసాగుతోంది. ఈ సినిమా తెరకెక్కించిన విధానాన్ని తప్పుబడుతూ కొంత మంది ముస్లీంలు బాంబే హైకోర్టును ఆశ్రయించారు. ఈ కేసుపై విచారణ జరిపిన న్యాయస్థానం విడుదలపై స్టే విధించింది. జూన్ 14 వరకు రిలీజ్ చేయకూడదని ఆదేశించింది. తదుపరి విచారణను జూన్ 10కి వాయిదా వేసింది. ఈ చిత్రంలో ఇస్లాంను కించపరచడంతో పాటు చెడుగా చిత్రీకరించాని పిటీషనర్ ఆరోపించారు. మరోవైపు ఈ సినిమాకు ఇప్పటికే సెన్సార్ బోర్డు సర్టిఫికేట్ జారీ చేసింది. కొన్ని డైలాగులకు కట్ చెప్తూ U/A సర్టిఫికేట్ ఇచ్చింది. ఇదే విషయాన్ని సెన్సార్ బోర్డు కోర్టుకు తెలిపింది. 

‘హమారే బారా‘ సినిమా విడుదలను నిషేధించిన కర్నాటక సర్కారు

తాజాగా ‘హమారా బారా‘ సినిమా విషయంలో కర్నాటక సర్కారు కీలక నిర్ణయం తీసుకుంది. ఈ సినిమా విడుదలను నిషేధిస్తున్నట్లు వెల్లడించింది. కర్ణాటక సినిమా రెగ్యులేషన్ యాక్ట్ 1964లోని సెక్షన్ 15 (1), 15 (5) ప్రకారం, ఆ రాష్ట్రంలో  విడుదలను బ్యాన్ చేస్తూ సర్కారు ఉత్తర్వులు జారీ చేసింది. మత సామరస్యానికి ముప్పు వాటిల్లుతుందనే కారణంగానే ఈ సినిమా ప్రదర్శనపై నిషేధం విధిస్తున్నట్లు కర్నాటక ప్రభుత్వం తెలిపింది.   

ఏ మతాన్ని చెడుగా చూపించలేదు- చిత్రబృందం

‘హమారే బారా‘ సినిమాపై వస్తున్న విమర్శలపై చిత్రబృందం స్పందించింది. ఈ సినిమాలో ఏ మతం గురించి, వ్యక్తుల గురించి చెడుగా చూపించలేదని వెల్లడించింది. సినిమా చూడకముందే ఓ నిర్ణయానికి రావడం సరికాదని ఈ మూవీలో ప్రధాన పాత్ర పోషించిన అన్నూ కపూర్ వెల్లడించారు. “దయచేసి ‘హమారే బారా‘ సినిమా గురించి చెడుగా ప్రచారం చేయకండి. ఈ సినిమాను చూసిన తర్వాత మీ అభిప్రయాన్ని చెప్పండి. ఈ సినిమాలో మతాలను, వ్యక్తులను కించపరచలేదు. ప్రతి ఒక్కరు ఈ సినిమా చూడవచ్చు. మహిళా సాధికారత గురించి చెప్పడంతో పాటు జనాభా నియంత్రణ గురించి ఈ సినిమాలో వివరించాం” అని తెలిపారు. మరోవైపు తమకు హత్యా బెదిరింపులు వస్తున్నాయని ‘హమారే బారా‘ చిత్రబృందం ఇప్పటికే పోలీసులకు ఫిర్యాదు చేసింది. ఈ సినిమా జూన్ 7న విడుదల కావాల్సి ఉన్నా పలు వివాదాలు వెంటాడుతున్నాయి. ఈ చిత్రంలో అన్నూ కపూర్, పార్థ్ సమతాన్, అశ్విని కల్సేకర్, మనోజ్ జోషి, పరితోష్ త్రిపాఠి, రాహుల్ బగ్గా కీలక పాత్రలు పోషించారు.