Kalinga Teaser: ‘కళింగ’ టీజర్ - తన చెవిని తానే కోసుకు తినేసే అమ్మాయి.. అసలు ఆ అడవి కథేంటి? ఆ గుహలో ఎవరున్నారు?

Kalinga Teaser: ధృవ వాయు దర్శకత్వం వహించడంతో పాటు తానే హీరోగా నటించిన ‘కళింగ’ సినిమా టీజర్ తాజాగా విడుదలయ్యింది. ఈ టీజర్ చూస్తుంటే గ్రామంలోని మూఢనమ్మకాల నేపథ్యంలో తెరకెక్కిన మూవీ అని అర్థమవుతోంది.

కళింగ పోస్టర్ (Image Credit: Dhruva Vaayu/Instagram)

Source : Dhruva Vaayu/Instagram

Kalinga Teaser Out Now: ఒక గ్రామం, అక్కడి ప్రజలు, వారి నమ్మకాలు.. ఇలాంటి కాన్సెప్ట్‌తో తెరకెక్కుతున్న సినిమాలు బ్లాక్‌బస్టర్ హిట్ అవుతున్నాయి. అందుకే ఇలాంటి కాన్సెప్ట్ ఉన్న చిత్రాలను ప్యాన్ ఇండియా స్థాయిలో విడుదల చేయడానికి మేకర్స్ ముందుకొస్తున్నారు. ఆ లిస్ట్‌లో మరో తెలుగు సినిమా యాడ్ అవ్వనుంది. అదే ‘కళింగ’. తాజాగా ఈ సినిమా టీజర్ విడుదలయ్యింది. టీజర్‌ను బట్టి చూస్తేనే ఈ సినిమాలో ఎన్నో డిస్టర్బింగ్ సీన్స్ ఉన్నాయని అర్థమవుతోంది. ‘కళింగ’ను ధృవ వాయు డైరెక్ట్ చేయడం మాత్రమే కాకుండా ఇందులో తానే హీరోగా నటించి అందరినీ ఆశ్చర్యపరచనున్నాడు.

సంపద చుట్టూ కథ..

‘కళింగ’ టీజర్ ఓపెన్ చేయగానే ఒక దట్టమైన అడవి, అందులో పారే జలపాతం కనిపిస్తాయి. చీకట్లో తన మనవరాలు మల్లిని వెతుక్కుంటూ వెళ్తాడు ఒక తాత. అప్పుడే తన మనవరాలు.. తన చెవిని తానే కోసుకొని తినడం చూసి భయపడి పారిపోతాడు. అలా టీజర్ మొదట్లోనే ఈ సినిమా ఏ రేంజ్‌లో డిస్టర్బింగ్‌గా ఉండబోతుందో చూపించాడు ధృవ వాయు. ఆ తర్వాత అదే తాత ఆ అడవి కథ ఏంటో వివరిస్తాడు. ‘‘చీకటి అడవిలో నీకొక కథ చెప్తా.. ఒక రాజ్యాన్ని ఒక రాజు పాలించేవాడు. ఆ వంశం నుంచి తీసుకొచ్చిన సంపద ఈ అడవిలో ఎక్కడో ఉంది’’ అంటూ కథను ముగిస్తాడు.

తాగుబోతు హీరో..

‘కళింగ’ టీజర్‌లో గ్రామంలో నివసించే అల్లరి యువకుడి పాత్రలో ధృవ వాయు పరిచయమవుతాడు. ఏదో పీడకల రావడంతో తను ఉలిక్కిపడి లేస్తాడు. ‘‘వాడు తాగుబోతే. అలాంటి వాడికి నా బిడ్డను ఇచ్చి పెళ్లి చేయమంటున్నావా’’ అంటూ హీరోయిన్ తండ్రి చెప్పే డైలాగ్‌తో హీరో క్యారెక్టర్ ఏంటో ఆడియన్స్‌కు క్లారిటీ వస్తుంది. అప్పుడే పద్దు అనే పాత్రలో హీరోయిన్ ప్రగ్యా నయన్ ఎంట్రీ ఇస్తుంది. హీరో, హీరోయిన్ ఒకరినొకరు ప్రేమించుకుంటూ ఉంటారు. ఆ తర్వాత అడవిలో ఒక పూజను పూర్తి చేసిన తర్వాత ‘‘ఎవ్వరూ వెనక్కి తిరిగి చూడొద్దు’’ అని పూజారి చెప్పినా అది వినకుండా ఒక వ్యక్తి తిరిగిచూస్తాడు. దీంతో ఏదో శక్తి వారందరినీ వెంటాడుతుంది.

ఇదొక పద్మవ్యూహం..

‘కళింగ’ టీజర్‌లో ‘‘ఈ పొలిమేర కథేంటి’’ అని ఒక వ్యక్తి అడగగా.. ‘‘సంస్థానం అనేది ఒక పద్మవ్యూహం. అందులోకి వెళ్లడమే తప్పా రావడం ఉండదు’’ అని మరొక వ్యక్తి చెప్తాడు. ఈ టీజర్‌లో భయపెట్టే షాట్స్ ఎక్కువగా ఉన్నాయి. చేతబడి చక్రంలో బొమ్మ, శవాన్ని పాతిపెట్టే ముందు జరిగే పూజలు, గుహలో రహస్యం.. ఇలాంటి షాట్స్.. ‘కళింగ’ టీజర్‌లో చాలానే ఉన్నాయి. ఇవన్నీ చూస్తుంటే స్టోరీ ఏంటో రివీల్ చేయకపోయినా ఈ మూవీపై ఆసక్తిని క్రియేట్ చేయడంలో ధృవ వాయు సక్సెస్ అయ్యాడని ప్రేక్షకులు అంటున్నారు. ఇక ఈ టీజర్ చివర్లో ఒక వింత ఆకారం గుహ నుంచి బయటికి రావడం కూడా చూపించారు మేకర్స్. కానీ అదేంటో స్పష్టంగా చూపించలేదు.