Cockroach Telugu Movie: నేరస్తుడితో ప్రేమలో పడిన వేశ్య... బోల్డ్ కాన్సెప్ట్‌తో 'కాక్రోచ్' - దర్శకుడు సునీల్ కుమార్ రెడ్డి ఏం చెప్పారంటే?

Director P Sunil Kumar Reddy: వాస్తవ కథలు తీసుకుని సహజత్వానికి దగ్గరగా సినిమాలు తెరకెక్కించే దర్శకులలో పి సునీల్ కుమార్ రెడ్డి ఒకరు. ఆయన తాజా సినిమా 'కాక్రోచ్' మార్చి 6న విడుదల కానుంది.

చీకటి కోణంలో నేరస్థుల జీవితాలతో 'కాక్రోచ్'... దర్శకుడు సునీల్ కుమార్ రెడ్డి సంచలన చిత్రం విడుదల ఎప్పుడంటే?

Source : ABPLIVE AI

సమాజంలో జరిగిన వాస్తవ ఘటనలు, సంఘటనలే కథాంశాలుగా సినిమా తీసే దర్శకులు అరుదుగా ఉంటారు. అటువంటి ఫిల్మ్ మేకర్ పి సునీల్ కుమార్ రెడ్డి (Director P Sunil Kumar Reddy). 'సొంతూరు', 'గంగపుత్రులు', 'ఒక రొమాంటిక్ క్రైమ్ కథ', 'రొమాంటిక్ క్రిమినల్స్', 'ఒక రొమాంటిక్ ప్రేమ కథ', 'గల్ఫ్' వంటి సినిమాలతో తెలుగు ప్రేక్షకులలో తనకంటూ ప్రత్యేక గుర్తింపు తెచ్చుకున్నారు. ఆయన దర్శకత్వం వహించిన తాజా సినిమా 'కాక్రోచ్' (Cockroach Telugu Movie). మార్చి 6న థియేటర్లలోకి రానుంది. ఈ నేపథ్యంలో సినిమా గురించి దర్శకుడు చెప్పిన విశేషాలు... 

• నేను విశాఖలో విలేకరిగా పని చేసిన సమయంలో సొంతంగా ఓ పత్రిక నిర్వహించా. అప్పుడు పోలీసులు, నేరస్తులతో మాట్లాడేవాడిని. వాళ్ళు చెప్పే కొన్ని విషయాలు ఎంతో ఆసక్తి కలిగించేవి. నేరస్తులతో కలిసి కొందరు పోలీసులు క్రైమ్స్ చేసేవారు. ఆ నేపథ్యంతో సినిమా రూపొందిస్తే బాగుంటుందని 'కాక్రోచ్' చేశా. నేరస్తులపై మనకు ఓ అభిప్రాయం ఉంటుంది. వాళ్ళ జీవితాలను దగ్గరగా చూశాక నా అభిప్రాయం పూర్తిగా మారింది. ఎందుకంటే... డాక్టర్ చదివి వైద్య సేవ చేయాలనుకున్న వాళ్ళూ ఉన్నారు. కుటుంబ, వ్యక్తిగత జీవితాల్లో జరిగిన కొన్ని ఘటనల వల్ల నేరస్తులుగా మారిన వాళ్ళు ఉన్నారు. అటువంటి వ్యక్తులే ఈ 'కాక్రోచ్'కు స్ఫూర్తి. 
• సినిమాల్లో ఎక్కువగా మన సమాజంలోని పువ్వుల్లాంటి జీవితాలే చూపించారు. కానీ పూలమొక్క దగ్గర మట్టిని, పువ్వు చుట్టూ ఉండే ముళ్ళు లాంటి జీవితాలను ఎవరూ చూపించలేదు. 'కాక్రోచ్'లో వాటిని చూపించే ప్రయత్నం చేశా. కొందరు నేరస్తులు, వేశ్య మధ్య జరిగిన ప్రేమ కథతో 'కాక్రోచ్'ను బోల్డ్ & హార్డ్ హిట్టింగ్‌గా రూపొందించా. పిల్లలు, సున్నిత మనస్కుల కోసం సినిమా తీయలేదని ముందు నుంచి నేను, మా చిత్ర బృందం చెబుతున్నాం. సెన్సార్ నుంచి 'ఎ' సర్టిఫికెట్ వచ్చింది. మా మూవీని రివైజింగ్ కమిటీకి పంపించారు. అక్కడ నా దృక్పథం ఏమిటో స్పష్టంగా చెప్పాను. వేశ్య వృత్తిలో ఉన్న మహిళ తన ప్రొఫెషన్ గురించి గర్వంగా చెప్పుకుంటుందని నేను ఇచ్చిన వివరణ తర్వాత సర్టిఫికెట్ జారీ చేశారు.

• 'కాక్రోచ్'లో పాత్రలు భావోద్వేగాల పరంగా మాత్రమే కాదు... శారీరకంగా కూడా ధృడంగా ఉండాలి. అందుకని ఫైటర్లను నటులుగా పరిచయం చేస్తున్నా. ఫైటర్స్ అసోసియేషన్ నుంచి కొందరిని ఎంపిక చేసి మా సినిమాలో క్రిమినల్ పాత్రలకు ఎంపిక చేశాం. డార్క్ బ్యాక్ డ్రాప్ లో సాగే ఈ సినిమా రెగ్యులర్ సినిమాలకు భిన్నంగా ఉంటుంది. ఇప్పుడు చిన్న సినిమాల ముందున్న అతిపెద్ద సవాల్... థియేటర్లకు ప్రేక్షకుల రప్పించడం. అయితే కొన్ని సినిమాలు విజయాలు సాధించడంతో మాలో ధైర్యం వచ్చింది. థియేటర్లలో ప్రేక్షకులకు మంచి ఎక్స్‌పీరియన్స్‌ ఇస్తుందీ సినిమా. 
• 'కాక్రోచ్' తర్వాత మరొక మూడు సినిమాలు లైనులో ఉన్నారు. మలయాళంలో నేను ఓ సినిమా చేశాను. అలాగే, నిర్మాత చదలవాడ శ్రీనివాసరావు గారికి మరో సినిమా చేశాను. అది విడుదలకు సిద్ధంగా ఉంది. హిందీలో సల్మాన్ ఖాన్ సోదరుడు అర్బాజ్ ఖాన్ సినిమాకు వర్క్ చేశాను.