Salman khan Marriage: ఈ రోజుల్లో అది కష్టం - సల్మాన్ ఖాన్ పెళ్లిపై తండ్రి ఆసక్తికర వ్యాఖ్యలు

Salman khan Marriage: బాలీవుడ్ కండల వీరుడు సల్మాన్ ఖాన్ పెళ్లిపై ఆయన తండ్రి సలీం కీలక వ్యాఖ్యలు చేశారు. ఈ రోజుల్లో తన కొడుకు కోరుకునే లక్షణాలున్న అమ్మాయి దొరకడం కష్టమన్నారు.

సల్మాన్ ఖాన్ (Image Credit: Instagram)

Salman khan Marriage: బాలీవుడ్ మోస్ట్ ఎలిజిబుల్ బ్యాచిలర్లలో సీనియర్ స్టార్ హీరో సల్మాన్ ఖాన్ ముందు వరుసలో ఉంటారు. కండల వీరుడి ప్రస్తుత వయస్సు 58 ఏళ్లు. మరో రెండేళ్లలో షష్టి పూర్తి హీరోగా మారబోతున్న తమ అభిమాన హీరో ఎప్పుడు పెళ్ళి వార్త చెబుతారా అని ఫ్యాన్స్ కళ్ళు కాయలు కాచేలా ఎదురు చూస్తున్నారు. తోటి హీరోలు, అతని సోదరులు పెళ్లిళ్లు చేసుకుని పిల్లా పాపలతో హాయిగా జీవిస్తున్నారు కానీ.. సల్లూ భాయ్ మాత్రం ఇంకా ఒంటరి జీవితాన్నే గడుపుతున్నారు. అయితే సల్మాన్ ఎందుకు వివాహం చేసుకోలేదనే విషయంపై ఆయన తండ్రి సలీమ్‌ ఖాన్ మాట్లాడిన ఓ వీడియో ఇప్పుడు సోషల్ మీడియాలో చక్కర్లు కొడుతోంది.

సింపుల్‌ గా ఉంటాడు కాబట్టే సల్మాన్‌ ఖాన్ అందరికీ నచ్చుతాడని తండ్రి సలీం ఖాన్ అంటున్నారు. ఏ అమ్మాయినైనా సల్మాన్ త్వరగా ఇష్టపడతాడు కానీ, పెళ్ళి చేసుకొనే ధైర్యం మాత్రం తన కొడుక్కి లేదని పేర్కొన్నారు. తన లైఫ్ లోకి వచ్చే అమ్మాయి తన తల్లి మాదిరిగా ఫ్యామిలీని చూసుకుంటుందో లేదో అని ఎప్పుడూ ఆలోచిస్తుంటాడని సల్మాన్ తండ్రి తెలిపారు. తన కొడుకు ప్రతీ అమ్మాయిలో తన అమ్మలాంటి లక్షణాలను వెతుకుతాడని చెప్పారు. తను పెళ్లి చేసుకునే అమ్మాయి తన తల్లిలాగే భర్త పిల్లలకు అంకితం అవ్వాలని కోరుకుంటాడని.. ఇంటి పనుల్లో కుటుంబ సభ్యులకు సాయం చెయ్యాలని అనుకుంటాడనన్నారు. ఈరోజుల్లో అలాంటి అమ్మాయిలు దొరకడం అంత ఈజీ కాదని, అందుకే సల్మాన్‌ ఇప్పటిదాకా పెళ్ళి చేసుకోలేదని తండ్రి సలీమ్‌ ఖాన్ ఆ వీడియోలో చెప్పుకొచ్చారు.

నిజానికి సల్మాన్ ఖాన్ లవ్, ఎఫైర్స్ గురించి అనేక వార్తలు ప్రచారంలో ఉన్నాయి. ఇన్నేళ్ల సినీ కెరీర్ లో ఆయనకు ఎందరో హీరోయిన్లతో సంబంధాలు ఉన్నట్లుగా రూమర్స్ వినిపించాయి. ఫలానా హీరోయిన్ తో డేటింగ్ చేస్తున్నాడని, ఫలానా అమ్మాయితో పెళ్ళి పీటలు ఎక్కబోతున్నాడని, రహస్యంగా వివాహం కూడా చేసుకున్నాడని.. ఇలా నిత్యం ఏదొక పుకారు బీ టౌన్ లో చక్కర్లు కొడుతూనే ఉండేది. ఐశ్వర్య రాయ్, కత్రీనా కైఫ్, ప్రియాంక చోప్రా, జియా ఖాన్.. ఇలా చెప్పుకుంటే సల్మాన్ లిస్టులో అనేక మంది ముద్దుగుమ్మల పేర్లు వినిపిస్తూ ఉంటాయి. కరోనా లాక్ డౌన్ లో రొమేనియన్‌ బ్యూటీ మోడల్ కమ్ ప్లేబ్యాక్ సింగర్ లూలియా వంటూర్‌ ను సీక్రెట్ మ్యారేజ్ చేసుకున్నట్లు అప్పట్లో బాలీవుడ్ మీడియా కోడై కూసింది. కానీ వీటిల్లో ఏదీ నిజం కాలేదు.

సల్మాన్ ఖాన్ గతంలో ఓ మూవీ ప్రమోషన్‌లో తన ప్రేమ కథలు, బ్రేకప్ ల గురించి మాట్లాడుతూ.. తన జీవితంలోకి సరైన అమ్మాయి వచ్చినప్పుడు పెళ్ళి చేసుకుంటానని అన్నారు. తన మాజీ ప్రియురాల్లు అందరూ మంచి వారేనని, వాళ్ల సైడ్ నుంచి ఎలాంటి తప్పు లేదని తెలిపారు. తను వాళ్లను సరిగ్గా చూసుకోలేనేమోనన్న భయంతోనే తనకు బ్రేకప్‌ చెప్పి ఉంటారని, వాళ్లు ఎక్కడున్నా హ్యాపీగా ఉండాలని కోరుకుంటానని చెప్పారు. తన లవ్ స్టోరీలన్నీ తనతోనే సమాధి అవుతాయన్నారు సల్మాన్. మరో సందర్భంలో తనకు పెళ్లి వద్దు కానీ, పిల్లలు మాత్రం కావాలన్నారు. ఒక పాపను పెంచుకోవాలి అనుకుంటున్నాని, అందుకు లీగల్ గా మన చట్టాలు అంగీకరిస్తాయో లేదో తెలియదని సల్మాన్ అన్నారు.

ఇక సినిమా విషయానికొస్తే, ఇటీవలి కాలంలో సల్మాన్ ఖాన్ రంజ్ కు తగ్గ సక్సెస్ సాధించలేకపోతున్నారు. రాధే, కిసీకా భాయ్ కిసీకి జాన్, టైగర్-3 వంటి సినిమాలు బాక్సాఫీసు దగ్గర బోల్తా కొట్టాయి. అతిథి పాత్ర పోషించిన 'పఠాన్' మూవీ మాత్రం హిట్టయింది. సల్మాన్ ప్రస్తుతం మురగదాస్ దర్శకత్వంలో 'సికిందర్' అనే సినిమాలో నటిస్తున్నారు.