BiggBoss 6 Telugu: నవ్వుతూ రేవంత్‌కి, శ్రీహాన్‌కి మధ్య గొడవ పెట్టేసిన నాగార్జున

BiggBoss 6 Telugu: అన్ని బిగ్‌బాస్ సీజన్లలో బెస్ట్ హోస్ట్ ఎవరంటే నాగార్జున పేరే చెబుతారు ఎక్కువ మంది.

(Image credit: Star maa)

BiggBoss 6 Telugu: సాఫీగా సాగితే బిగ్ బాస్ హౌస్ ఎందుకవుతుంది? అంతా సవ్యంగా ఉంటే కంటెంట్ ఎక్కడ నుంచి వస్తుంది? మొన్నటి వరకు ఫిట్టింగ్ మాస్టర్ బిగ్ బాస్ ఏదో ఒక టాస్కులు, నామినేషన్లు ఇచ్చి ఆడించారు. చివరి రెండు వారాలు పెద్దగా గొడవలు ఉండవు. రేవంత్ లాంటి వాళ్లు ఇద్దరు ఉంటే గొడవలు బాగా అయ్యేవి. కానీ ఒక్కటే ఉన్నాడు. అతను వీలైనంతవరకు గొడవలు బాగానే పడ్డాడు. అవి చాలవన్నట్టు నాగార్జున కూడా ఇంటి సభ్యుల మధ్య గొడవలు పెట్టడానికి ప్రయత్నిస్తున్నారు. ఈ ప్రోమో చూస్తే ఎవరికైనా అలాగే అనిపిస్తుంది. 

ప్రోమోలో ఏముందంటే...నాగార్జున పూలరంగడులా రెడీ అయి ‘సై సై సయ్యారే’ పాటతో వేదిక మీదకు వచ్చేశారు. తరువాత అందరినీ కన్ఫెషన్ రూమ్‌కి రమ్మన్నారు. శ్రీసత్య ‘మళ్లీ దయ్యాల టాస్కా?’ అంది. మోస్ట్ ఎంటర్టైనింగ్ సీజన్ ఆఫ్ ద సీజన్ అని ఒక వీడియో వేశారు. అందులో రేవంత్ ‘ఎవరైనా భయపడతారు’ అని దెయ్యాల టాస్కు గురించి అన్నారు. దానికి ఆదిరెడ్డి ‘నేను, శ్రీహాన్ భయపడలేదు’ అని ఓవరాక్షన్ చేశారు. తరువాత దెయ్యాల గదిలోకి వెళ్లాక వారిద్దరూ ఎలా భయపడాలో లోపల చూపించారు. అలాగే శ్రీసత్య, ఇనాయ కూడా భయపడింది చూపించారు. రేవంత్ వీడియో వేయలేదు. దానికి ‘నా వీడియో వేయలేదు సర్’ అన్నాడు. దానికి నాగార్జున ‘నువ్వు భయపడలేదు కదా’ అన్నారు. దానికి రేవంత్ ‘వాంటెడ్లీ భయపడలేం కదా సర్’ అన్నాడు. ఆ వెంటనే నాగార్జున ‘అంటే శ్రీహాన్ కావాలనే భయపడ్డాడని అంటున్నావా’ అని అడిగారు. దానికి రేవంత్ దండం పెట్టేశాడు.

నువ్వు పెద్ద ఫ్లిప్పర్
నాగార్జున ఒక టాస్కు ఇచ్చారు. ప్రతి ఒక్కరు అవతలి వారి కన్నా తామెందుకు బెటరో చెబుతూ క్యాంపెయిన్ చేసుకోవాలని చెప్పారు. రేవంత్ - శ్రీహాన్ తో మొదలుపెట్టారు. ఇద్దరూ తమ తమ పాయింట్లు చెప్పుకున్నారు. మధ్యలో నాగార్జున శ్రీహాన్‌తో ‘రేవంత్ ఫ్లిప్పర్ అన్నావ్ ఆ పాయింట్?’ అని గుర్తు చేశారు. దానికి శ్రీహాన్ అలా అనలేదు సర్ అన్నాడు. దానికి నాగార్జున ‘మొన్న ఆదిరెడ్డితో అన్నావ్ కదా’ అన్నారు. దానికి రేవంత్ ‘నాకు తెలుసు సర్. శ్రీహాన్ నా వెనకాల మాట్లాడతాడని’ అన్నాడు. రేవంత్‌కు కారణం దొరకడమే ఆలస్యం, వెంటనే కోపం వచ్చేస్తుంది. ఫ్లిప్పర్ డైలాగుతో రేవంత్ ముఖం ఎర్రగా మారిపోయింది. ఈ లోపు నాగార్జున ఆదిరెడ్డి నీకు చెప్పాడా లేదా అని అడిగారు. దానికి ఆదిరెడ్డి ‘ఫ్లిప్పర్ అనే మాట గుర్తు లేదు సర్’ అన్నాడు. వెంటనే నాగార్జున ‘నిన్ను మించిన ఫ్లిప్పర్ లేడు ఆదిరెడ్డి’ అన్నారు నాగార్జున. ప్రశాంతంగా ఉన్న ఇంట్లో భలే ఫిట్టింగ్ పెట్టారు నాగార్జున. 

కాగా ఈవారం షాకింగ్ ఎలిమినేషన్ జరిగినట్టు సమాచారం. టాప్ 3 కంటెస్టెంట్ అనుకున్న ఇనాయ బయటికి వెళుతున్నట్టు తెలుస్తోంది.