Bigg Boss 7 Day 15 Updates: ‘బిగ్ బాస్’ ఈ వారం నామినేషన్స్‌లో ఆ ఏడుగురు, చివర్లో పెద్దాయన అదిరిపోయే ట్విస్ట్!
బిగ్ బాస్ సీజన్ 7లో మూడోవారం నామినేషన్స్ ముగిశాయి. అందులో ఆ ఏడుగురు నామినేషన్స్‌లో ఉన్నారు.
బిగ్ బాస్ సీజన్ 7లో మూడో వారం నామినేషన్స్ ముగిశాయి. నామినేషన్స్‌కు సంబంధించి విడుదలయ్యే ప్రోమోల్లో ఉన్నంత మజా.. ఎపిసోడ్‌లో ఉండదు అని చాలామంది ప్రేక్షకులు భావిస్తూ ఉంటారు. నేడు (సెప్టెంబర్ 18న) ప్రసారమయిన ఎపిసోడ్ చూస్తుంటే అదే అనిపిస్తోంది. ప్రోమోలో నామినేషన్స్ వాడివేడిగా సాగినట్టు అనిపించినా.. ఎపిసోడ్‌లో మాత్రం కొందరి మధ్య మాత్రమే వాగ్వాదాలు జరిగాయి. ముఖ్యంగా దామిని, ప్రియాంక, శుభశ్రీ, యావర్.. ఈ ఎపిసోడ్‌కు హైలెట్‌గా నిలిచారు. నామినేషన్స్ ముగిసిన తర్వాత ఎవరెవరు నామినేట్ అయ్యారో బిగ్ బాస్ ప్రకటించారు. ఆ తర్వాత ఒక మంచి ట్విస్ట్ కూడా ఇచ్చారు.
వారి టార్గెట్ శుభశ్రీ..
బిగ్ బాస్ సీజన్ 7లో మూడో వారం నామినేషన్స్‌లో ఏడుగురు కంటెస్టెంట్స్ ఉన్నారు. వారే శుభశ్రీ, గౌతమ్, ప్రియాంక, దామిని, యావర్, రతిక, అమర్‌దీప్. శుభశ్రీ విషయానికొస్తే.. తను చాలావరకు ఇంటి పనుల్లో యాక్టివ్‌గా ఉండడం లేదని పలువురు కంటెస్టెంట్స్.. తనను నామినేట్ చేయడానికి ముందుకొచ్చారు. ఈ కారణానికి శుభశ్రీ అసలు ఒప్పుకోలేదు. తాను కూడా పనిచేస్తున్నానని వాదించడం మొదలుపెట్టింది. ముందుగా అమర్‌దీప్ వచ్చి ఈ కారణంతో నామినేట్ చేయడంతో తనతో వాగ్వాదానికి కూడా దిగింది. ఆ తర్వాత దామిని కూడా తనను కావాలని టార్గెట్ చేస్తుందంటూ వ్యాఖ్యలు చేసింది.
గత వారం జరిగిన టాస్క్ అనేది ఈ వారం పలువురు కంటెస్టెంట్స్.. నామినేషన్స్‌లో నిలబడేలా చేసింది. ముఖ్యంగా గౌతమ్ కృష్ణ, రతికకు అయితే అదే కారణం వల్ల నామినేషన్స్ పడ్డాయి. టీమ్ మాట వినకుండా మొండిగా ఉందని రతికను నామినేట్ చేశారు కంటెస్టెంట్స్. గౌతమ్ వల్లే టీమ్ మధ్య వివాదాలు వచ్చాయనే కారణంతో తనకు నామినేషన్స్ పడ్డాయి. ఇక రతిక, గౌతమ్‌లు కూడా ఒకరినొకరు ఇదే కారణంతో నామినేట్ చేసుకున్నారు. ప్రియాంక విషయానికొస్తే.. తను గేమ్ సరిగా ఆడలేదని కొందరు నామినేట్ చేశారు. ప్రిన్స్ యావర్ మాత్రం ప్రియాంక యాటిట్యూడ్ బాగా లేదంటూ తనను నామినేట్ చేశాడు. అమర్‌దీప్ ప్రవర్తన నచ్చలేదని తనను కూడా నామినేషన్స్‌లో పెట్టారు కంటెస్టెంట్స్.
తేజ అటు.. అమర్‌దీప్ ఇటు..
దామిని, ప్రిన్స్ యావర్ మధ్య నామినేషన్స్ విషయంలో పెద్ద గొడవే జరిగింది. ఇద్దరూ.. ఒకరిలోని తప్పులను మరొకరు వేలెత్తి చూపిస్తూ.. వాగ్వాదానికి దిగారు. ఇక తేజ పద్ధతి బాలేదంటూ తనను కూడా కొందరు కంటెస్టెంట్స్ నామినేట్ చేశారు. అలా కంటెస్టెంట్స్ నామినేషన్స్ ముగిసే సమయానికి శుభశ్రీ, గౌతమ్ కృష్ణ, ప్రియాంక, దామిని, యావర్, రతిక, టేస్టీ తేజ లిస్ట్‌లో ఉన్నారు. కానీ అక్కడే బిగ్ బాస్ ఒక ట్విస్ట్ ఇచ్చారు. సందీప్, శివాజీ దగ్గర పవర్ అస్త్రాలు ఉన్నాయి కాబట్టి.. వారిద్దరూ కలిసి ఇప్పటికే నామినేషన్స్‌లో ఉన్న ఒక కంటెస్టెంట్‌ను సేవ్ చేయవచ్చు. సేఫ్ జోన్‌లో ఒక కంటెస్టెంట్‌ను నామినేట్ చేయవచ్చు అని బిగ్ బాస్ తెలిపారు. దీంతో నామినేషన్స్‌లో ఉన్న తేజను సేవ్ చేసి అమర్‌దీప్‌ను నామినేట్ చేశారు సందీప్, శివాజీ. పవర్ అస్త్రా కోసం అవకాశం ఇచ్చినా కూడా అమర్‌దీప్ ఓడిపోయాడని కారణం చెప్పాడు సందీప్. దానికి ఇద్దరు కలిసి టార్గెట్ చేసినట్టుగా ఉందని అమర్‌దీప్ వ్యాఖ్యలు చేశాడు.
Join Us on Telegram: https://t.me/abpdesamofficial
టాప్ హెడ్ లైన్స్
ట్రెండింగ్ వార్తలు
