Vizag Gold Chain Theft Case: చైన్ స్నాచర్లుగా మారిన తల్లీకొడుకులు -యూట్యూబ్ చూసి దిగిపోయారు..కానీ దొరికిపోయారు!

Vizag Chain Snatching: అప్పుల బాధల నుంచి గట్టెక్కేందుకు సులువుగా డబ్బు సంపాదించడం ఎలా అని వెతికిన ఒక ఇల్లాలు.. చివరకు కొడుకుతో కలిసి చైన్ స్నాచర్‌గా మారింది. చివరికి ఇద్దరూ పోలీసులకు చిక్కారు.

చైన్ స్నాచర్లుగా మారిన తల్లీకొడుకులు -యూట్యూబ్ చూసి దిగిపోయారు..కానీ దొరికిపోయారు!

Source : x

Visakhapatnam Chain Snatching Mother Son Arrested:   ఆర్థిక ఇబ్బందులు, అప్పుల బాధల నుంచి గట్టెక్కడానికి సాధారణంగా ఎవరైనా కష్టపడి పనిచేయడమో లేదా తెలిసిన వారి సహాయం కోరడమో చేస్తారు. కానీ, విశాఖపట్నానికి చెందిన ఒక ఇల్లాలు మాత్రం అడ్డదారి తొక్కింది. అప్పుల ఊబి నుంచి బయటపడటానికి మార్గం కనిపించక మొదట ఆత్మహత్య చేసుకోవాలనుకున్న ఆమె.. చివరి నిమిషంలో స్మార్ట్‌ఫోన్ తీసి యూట్యూబ్  ఓపెన్ చేసింది. అక్కడ కనిపించిన ఒక క్రైమ్ ఐడియా ఆమె జీవితాన్నే మార్చేసింది. విలాసవంతమైన జీవితంపై ఉన్న మోజుతో, సులభంగా డబ్బు సంపాదించాలనే దురాశతో కన్న కొడుకును సైతం నేరస్తుడిగా మార్చింది. చివరకు పక్కా ప్లాన్‌తో చైన్ స్నాచింగ్‌కు పాల్పడి పోలీసుల చేతికి చిక్కి కటకటాలపాలైంది.

విలాసాల కోసం అప్పుల పాలైన మహిళ

 విశాఖపట్నంలోని రామా టాకీస్ ప్రాంతంలో మాదివాడ ధనలక్ష్మి, ఆమె భర్త గోపికృష్ణ, కుమారుడు అక్షిత్‌తో కలిసి నివాసం ఉంటున్నారు. భర్త గోపీకృష్ణ ప్రైవేట్ కార్ డ్రైవర్‌గా పనిచేస్తూ కుటుంబాన్ని పోషిస్తున్నాడు. ప్రైవేట్ ఉద్యోగంలో వచ్చే పరిమిత ఆదాయంతో ఇల్లు గడవడం కష్టంగా ఉన్నా.. ధనలక్ష్మికి మాత్రం విలాసవంతమైన జీవితం గడపాలనే కోరిక బలంగా ఉండేది. ఈ క్రమంలోనే ఆమె పరిచయస్తుల నుంచి భారీగా చిట్టీలు వేయించింది. అయితే వాటి నిర్వహణలో ఘోరంగా విఫలమైంది. దానికి తోడు ఒక ఫ్లాట్ కొనుగోలు చేసి, దానికి సంబంధించిన నెలవారీ ఈఎంఐ  కట్టలేక అప్పుల్లో మునిగిపోయింది. అప్పు ఇచ్చిన వారు రోజువారీగా ఇంటి చుట్టూ తిరుగుతూ ఒత్తిడి చేయడంతో, ఆ అవమానాన్ని భరించలేక భర్త గోపీకృష్ణ ఇల్లు వదిలి వెళ్లిపోయాడు. దీంతో ఇంట్లో ఒంటరిగా మిగిలిన ధనలక్ష్మి మానసికంగా కుంగిపోయింది.
  
 యూట్యూబ్‌లో  ఈజీ మనీ  సెర్చ్

ఆర్థిక ఇబ్బందుల నుంచి ఎలాగైనా బయటపడాలని ధనలక్ష్మి యూట్యూబ్‌లో  How to earn money fast  అని సెర్చ్ చేసింది. ఆ క్రమంలో ఆమెకు చైన్ స్నాచింగ్ ఎలా చేయాలి, ఎలా తప్పించుకోవాలి అనే క్రైమ్ వీడియోలు కనిపించాయి. దాంతో ఆమె మనసు నేరం వైపు మళ్లింది. 
యూట్యూబ్ చూసి దొంగతనం చేయాలని ఫిక్స్ అయిన ధనలక్ష్మి.. డిగ్రీ చదువుతున్న తన కుమారుడు అక్షిత్‌ను ఇందుకు వాడుకోవాలని చూసింది. మొదట నిరాకరించినప్పటికీ, తల్లి తీవ్రంగా బలవంతం చేయడంతో అక్షిత్ కూడా ఈ చైన్ స్నాచింగ్ ప్లాన్‌కు ఒప్పుకున్నాడు. పోలీసులకు ఎలాంటి అనుమానం రాకుండా, ఎక్కడా దొరకకూడదని తల్లి కొడుకులు ఇద్దరూ కలిసి పక్కా వ్యూహం రచించారు. దొంగతనానికి ఉపయోగించే ద్విచక్ర వాహనం వెనుక వైపు ఉన్న నంబర్ ప్లేట్‌ను పూర్తిగా తొలగించారు. ముందు భాగంలో ఉన్న నంబర్ కనిపించకుండా దానికి ఒక రిబ్బన్ కట్టారు. ఇక గుర్తింపు దొరకకుండా ఉండేందుకు కొడుకు అక్షిత్ తలకు టోపీ, ముఖానికి మాస్క్ ధరించగా.. తల్లి ధనలక్ష్మి తన ముఖాన్ని చున్నీతో పూర్తిగా కప్పేసుకుంది.

మొదటి స్నాచింగ్ లోనేదొరికిపోయారు !  

ఈ పక్కా స్కెచ్‌తో గత నెల 27వ తేదీ సాయంత్రం ఇద్దరూ కలిసి పెందుర్తి సుజాతనగర్ పరిధిలో బైక్‌పై తిరుగుతూ ఒంటరి మహిళల కోసం వేట ప్రారంభించారు. ఆ సమయంలో అక్కడ ఒంటరిగా నడుచుకుంటూ వెళ్తున్న కిలపర్తి చెల్లయ్యమ్మ అనే వృద్ధురాలిని టార్గెట్ చేశారు. ఆమె దగ్గరకు వెళ్లి ఏదో అడ్రస్ అడుగుతున్నట్లు నటిస్తూ నమ్మబలికారు. వృద్ధురాలు అడ్రస్ చెప్తుండగా.. ఒక్కసారిగా ఆమె మెడలోని 5 తులాల బంగారు నల్లపూసల దండ, పుస్తెలతాడును అత్యంత వేగంగా తెంచుకుని బైక్‌పై దూసుకెళ్లారు. బాధితురాలి ఫిర్యాదుతో రంగంలోకి దిగిన పెందుర్తి నేర విభావం, వెస్ట్ సబ్ డివిజన్ క్రైమ్ పోలీసులు ఈ కేసును ఛాలెంజ్‌గా తీసుకున్నారు. నిందితులు సీసీ కెమెరాలకు చిక్కకుండా తెలివిగా తిరిగినప్పటికీ.. సాంకేతిక పరిజ్ఞానం ఆధారంగా బైక్ ప్రయాణించిన దారిని క్షుణ్ణంగా ట్రేస్ చేసిన పోలీసులు, స్వల్ప వ్యవధిలోనే ధనలక్ష్మి, అక్షిత్‌లను గుర్తించి అరెస్ట్ చేశారు. దొంగిలించిన సొమ్మును స్వాధీనం చేసుకుని, ప్రస్తుతం ఆ తల్లి కొడుకులిద్దరినీ రిమాండ్‌కు తరలించారు.  

మరిన్ని చదవండి

కదిరి ప్రభుత్వ ఆసుపత్రిలో దారుణ హత్య.. కత్తితో భార్య గొంతు కోసిన భర్త

ఆదిలాబాద్ జిల్లాలో చోరీ సొత్తు కొనుగోలు, రవాణా చేస్తున్న ముఠా అరెస్ట్! రిమాండ్‌కు ఆరుగురు నిందితులు