Constable Dies in Road Accident: డ్యూటీకి వెళ్తుండగా రోడ్డు ప్రమాదం.. అక్కడికక్కడే కానిస్టేబుల్ మృతి- వికారాబాద్ జిల్లాలో ఘటన

వికారాబాద్ జిల్లా లక్ష్మీ నారాయణపూర్ వద్ద నిర్మాణంలో ఉన్న బ్రిడ్జి గుంతలోకి బైకు దూసుకుపోవడంతో, హైదరాబాద్‌లో విధులు నిర్వహిస్తున్న కానిస్టేబుల్ అక్కడికక్కడే మృతి చెందారు.

రోడ్డు ప్రమాదంలో కానిస్టేబుల్ మృతి

Source : Abp desam

యాలాల: డ్యూటీకి వెళ్తున్న కానిస్టేబుల్ రోడ్డు ప్రమాదంలో మృతిచెందడంతో విషాదం నెలకొంది. వికారాబాద్ జిల్లా యాలాల మండల పరిధిలోని లక్ష్మీ నారాయణపూర్ వద్ద ఘోర రోడ్డు ప్రమాదం జరిగింది. ఈ ప్రమాదంలో నర్సింలు (30) అనే పోలీస్ కానిస్టేబుల్ అక్కడికక్కడే మృతి చెందారు. హైదరాబాద్‌లో కానిస్టేబుల్‌గా విధులు నిర్వహిస్తున్న ఆయన, సోమవారం ఉదయం డ్యూటీకి వెళ్తుండగా ఈ విషాద ఘటన చోటుచేసుకుంది.

ప్రమాదం ఎలా జరిగింది..

లక్ష్మీ నారాయణపూర్ వద్ద జాతీయ రహదారిపై ప్రస్తుతం ఒక బ్రిడ్జి నిర్మాణం జరుగుతోంది. అయితే, మార్గమధ్యంలో కానిస్టేబుల్ నర్సింలు నడుపుతున్న టూ వీలర్ ప్రమాదవశాత్తు అదుపు తప్పి నిర్మాణంలో ఉన్న ఆ బ్రిడ్జి గుంతలోకి దూసుకుపోయింది. ఈ ప్రమాద తీవ్రత ఎక్కువగా ఉండటంతో ఆయన అక్కడికక్కడే మృతిచెందాడు. సమాచారం అందుకున్న పోలీసులు ఘటన స్థలానికి చేరుకుని వివరాలు సేకరిస్తున్నారు.

లారీ ఢీకొని ఒకే కుటుంబానికి చెందిన ముగ్గురు మృతి

వికారాబాద్ జిల్లా పెద్దేముల్ మండలం తట్టెపల్లి గ్రామ శివారులో ఆదివారం సాయంత్రం చోటుచేసుకున్న ఘోర రోడ్డు ప్రమాదం ఒక కుటుంబాన్ని చిన్నాభిన్నం చేసింది. లారీ స్కూటీని బలంగా ఢీకొన్న ఈ ఘటనలో భార్యాభర్తలతో పాటు వారి కుమార్తె అక్కడికక్కడే ప్రాణాలు కోల్పోయారు. ఈ విషాద ఘటన స్థానికంగా విషాదాన్ని నింపింది.

పోలీసులు తెలిపిన వివరాల ప్రకారం.. రుక్మాపూర్ గ్రామానికి చెందిన పావని (35), ఆమె భర్త కవిరాజ్ (40) తమ పిల్లలు కీర్తన (11), కార్తీక్ (13)తో కలిసి జహీరాబాద్‌లో నివసిస్తున్నారు. మే ఒకటో తేదీన జరగనున్న పావని సోదరుడి వివాహం కోసం వీరంతా ఆదివారం తమ స్వగ్రామం రుక్మాపూర్‌కు వెళ్లి, తిరిగి వస్తుండగా తట్టెపల్లి వద్ద ఎదురుగా వచ్చిన లారీ వీరి స్కూటీని ఢీకొట్టింది. ఈ ప్రమాదంలో పావని, కవిరాజ్, కీర్తన దుర్మరణం చెందగా, కుమారుడు కార్తీక్ స్వల్ప గాయాలతో ప్రాణాలతో బయటపడ్డాడు. గాయపడిన బాలుడిని చికిత్స నిమిత్తం తాండూరు ప్రభుత్వ ఆసుపత్రికి తరలించారు. లారీ డ్రైవర్ మహమ్మద్ షరీఫ్‌పై కేసు నమోదు చేసి దర్యాప్తు చేస్తున్నట్లు పెద్దేముల్ ఎస్సై ప్రశాంత్ వర్ధన్ తెలిపారు.

మరిన్ని చదవండి

పల్నాడులో లాయర్ హత్య కేసులో ట్విస్ట్.. వివాహేతర సంబంధం కోసం కానిస్టేబుల్ దారుణం!

గుట్టు విప్పిన డైరీ! గుజరాత్‌లో దోసెలు తిని చనిపోయిన అక్కాచెల్లెలు కేసులో కీలక మలుపు!