Crime News: తెలంగాణలో దారుణం - బాలికపై నలుగురు మైనర్ల సామూహిక అత్యాచారం

Telangana News: తెలంగాణలో దారుణాలు వెలుగుచూశాయి. వికారాబాద్ జిల్లాలో ఓ బాలికపై నలుగురు మైనర్లు అఘాయిత్యానికి పాల్పడగా.. సంగారెడ్డి జిల్లాలో ఇన్ స్టా పరిచయంతో ఓ యువకుడు బాలికపై అత్యాచారానికి పాల్పడ్డాడు.

తెలంగాణలో దారుణాలు

Source : ABP Desam

Abused On Minor Girl In Vikarabad: ఎన్ని కఠిన చట్టాలు తెచ్చినా మృగాళ్ల తీరు మారడం లేదు. రోజూ ఎక్కడో ఓ చోట మహిళలు, బాలికలపై లైంగిక వేధింపుల ఘటనలు వెలుగుచూస్తూనే ఉన్నాయి. తెలంగాణలో దారుణాలు చోటు చేసుకున్నాయి. ఓ చోట మైనర్‌పై నలుగురు మైనర్లే అఘాయిత్యానికి ఒడిగట్టగా.. మరో చోట ఇన్ స్టాలో పరిచయమైన ఓ యువకుడు బాలికపై అత్యాచారానికి పాల్పడ్డాడు. వికారాబాద్ జిల్లాలో (Vikarabad District) ఓ మైనర్‌పై అత్యాచార ఘటన తీవ్ర కలకలం రేపింది. పోలీసులు తెలిపిన వివరాల ప్రకారం.. జిల్లాలోని దోమ పోలీస్ స్టేషన్ పరిధిలో ఈ దారుణం చోటు చేసుకుంది. నలుగురు మైనర్లు 8వ తరగతి బాలికపై అత్యాచారానికి పాల్పడ్డారు. ఈ ఘటనపై బాలిక తల్లిదండ్రులు పోలీసులకు ఫిర్యాదు చేశారు. దీంతో నలుగురిని అదుపులోకి తీసుకున్నారు. దీనిపై కేసు నమోదు చేసి దర్యాప్తు చేస్తున్నారు. ఘటనపై మరిన్ని వివరాలు తెలియాల్సి ఉంది.

ఇన్ స్టాలో పరిచయం.. మైనర్‌పై అత్యాచారం

మరోవైపు, సోషల్ మీడియా పరిచయం ఓ బాలిక కొంపముంచింది. ఇన్ స్టాలో పరిచయమై ప్రేమ పేరుతో ఓ బాలికపై అఘాయిత్యానికి పాల్పడ్డాడు ఓ యువకుడు. పోలీసులు తెలిపిన వివరాల ప్రకారం.. వికారాబాద్ జిల్లా బషీరాబాద్ మండలం జివంగి గ్రామానికి చెందిన యువకుడు (19), సంగారెడ్డి జిల్లా (Sangareddy District) న్యాల్కల్‌కు చెందిన ఓ బాలిక (16)కు ఇన్ స్టాలో పరిచయం ఏర్పడింది. 7 నెలలుగా ప్రేమ పేరుతో ఇన్ స్టాలో బాలికతో ఛాటింగ్, కాల్స్ చేశాడు. అయితే, ఇటీవల యువకుడు బాలిక గ్రామానికి వచ్చి ఆమెను నిర్మానుష్య ప్రదేశానికి తీసుకెళ్లి అత్యాచారానికి పాల్పడ్డాడు. దీనిపై పోలీసులకు ఫిర్యాదు చేయడంతో అసలు విషయం వెలుగులోకి వచ్చింది. దీంతో యువకుడిని పోలీసులు అరెస్ట్ చేశారు. కేసు నమోదు చేసి దర్యాప్తు చేస్తున్నారు.