FIFA Rights Scam: ఫిఫా రైట్స్ వెనుక పెద్దల స్కెచ్? హైదరాబాద్ స్టార్టప్ను ముంచేసిన అమెరికా మాయగాడు.. రంగంలోకి సీసీఎస్!
Corporate Crime: రూ. 670 కోట్ల ఫిఫా మీడియా హక్కుల వేలంలో హైదరాబాద్ స్టార్టప్ను ముంచేశారు ఓ అమెరికా ఇన్వెస్టర్. అయితే దీనిక పెద్ద స్కామ్ ఉందన్న అనుమానాలు వ్యక్తమవుతున్నాయి.
Hyderabad CCS Police FIFA Case: అంతర్జాతీయ ఫుట్బాల్ సమరం ప్రపంచకప్ మీడియా హక్కుల వేలంలో భాగ్యనగరానికి చెందిన ఒక స్టార్టప్ కంపెనీ చుట్టూ టాలీవుడ్ యాక్షన్ సినిమాను తలపించే రేంజ్లో సరికొత్త కార్పొరేట్ క్రైమ్ త్రిల్లర్ స్క్రిప్ట్ బయటపడింది. గ్లోబల్ మార్కెట్లో అడుగుపెట్టి చక్రం తిప్పాలని చూసిన ఒక హైదరాబాద్ సంస్థను, అమెరికా నుంచి వచ్చిన ఒక నకిలీ ఇన్వెస్టర్ ఫోర్జరీ పత్రాలతో నట్టేట ముంచిన వ్యవహారం ఇప్పుడు సంచలనంగా మారింది. రూ. 670 కోట్ల భారీ డీల్ కుదుర్చుకున్న సదరు స్టార్టప్ను ఆఖరి నిమిషంలో కుట్రపూరితంగా దెబ్బకొట్టారు. ఈ కేసులో సెంట్రల్ క్రైమ్ స్టేషన్ పోలీసులు రంగంలోకి దిగడంతో ఈ ఫుట్బాల్ స్కామ్ వ్యవహారం హాట్ టాపిక్ అవుతోంది.
హైదరాబాద్కు చెందిన మెటల్లాయిడ్ ప్రొడక్షన్స్ అధినేత ప్రీతీష్ కొల్లాటి, దేశీయ మీడియా దిగ్గజాలకు షాకిస్తూ ఫిఫా ఇండియన్ సబ్కాంటినెంట్ ప్రసార హక్కులను దక్కించుకున్నారు. మొదట ప్రభుత్వ రంగ సంస్థ అయిన ప్రసార భారతి తో కలిసి అంతా సజావుగానే సాగుతుందనుకున్న తరుణంలో సీన్ అడ్డం తిరిగింది. కొన్ని అదృశ్య శక్తుల నుంచి వచ్చిన రాజకీయ, కార్పొరేట్ ఒత్తిళ్ల కారణంగా ప్రసార భారతి ఆఖరి నిమిషంలో ఈ మెగా ఈవెంట్ నుంచి హఠాత్తుగా యూ-టర్న్ తీసుకుంది. ప్రభుత్వ రంగ సంస్థ ఇలా తప్పుకోవడంతో ఫండింగ్ కోసం హైదరాబాద్ యువ పారిశ్రామికవేత్త తీవ్ర ప్రయత్నాలు ప్రారంభించాల్సి వచ్చింది.
సరిగ్గా ఇదే సమయంలో ఈ స్టార్టప్ను టార్గెట్ చేస్తూ అవని ఎల్ఎల్సీ అధినేత దిలీప్ మస్కే అలియాస్ శామ్ అమెరికా నుంచి ఎంట్రీ ఇచ్చాడు. ఈ డీల్ కోసం తాను రూ. 400 కోట్ల పెట్టుబడి పెడతానంటూ నమ్మబలికి, అంతర్జాతీయంగా పేరున్న స్విట్జర్లాండ్ UBS బ్యాంక్ అకౌంట్ స్టేట్మెంట్లు, బ్యాంక్ ఆఫ్ మహారాష్ట్ర లెటర్లను తీసుకొచ్చి టేబుల్ మీద పెట్టాడు. అయితే, ఫిఫా స్క్రీనింగ్లో ఆ డాక్యుమెంట్లన్నీ పక్కా ఫోర్జరీ అని తేలిపోవడంతో కథ ఊహించని మలుపు తిరిగింది. నకిలీ పత్రాలు సమర్పించారనే ఆగ్రహంతో ఫిఫా సంస్థ హైదరాబాద్ కంపెనీ డీల్ను రద్దు చేయడమే కాకుండా, ఆ సంస్థను ఏకంగా బ్లాక్లిస్ట్లో పెట్టడంతో ప్రీతీష్ కొల్లాటి నెత్తిన పిడుగు పడినట్లయింది.
అయితే, ఫిఫా లాంటి అంతర్జాతీయ సంస్థలు సులభంగా పసిగట్టే నకిలీ పత్రాలను ఆ అమెరికా ఇన్వెస్టర్ కావాలనే ఎందుకు సబ్మిట్ చేశాడు? అనే కోణంలో విశ్లేషిస్తే దీని వెనుక బడా కార్పొరేట్ లాబీ ఉన్నట్లు అనుమానాలు బలపడుతున్నాయి. ఎందుకంటే, మెటల్లాయిడ్ ప్రొడక్షన్స్ డీల్ రద్దయిన వెంటనే.. మార్కెట్లో ఎగబడి కొంటారనుకున్న బడా సంస్థలన్నీ ఒక్కసారిగా సైలెంట్ అయిపోయాయి. చివరకు రేటు భారీగా పడిపోయాక, జీ ఎంటర్టైన్మెంట్ రంగంలోకి దిగి, మొదట అనుకున్న రూ. 670 కోట్ల ధర కంటే దాదాపు సగం రేటుకే, అంటే రూ. 330 కోట్ల నుంచి రూ. 500 కోట్ల లోపు ధరకే ఆ మెగా రైట్స్ను కారుచౌకగా ఎగరేసుకుపోయింది. ఒక స్టార్టప్ కంపెనీ అంత పెద్ద డీల్ సొంతం చేసుకుంటే తమ మార్కెట్ ఎక్కడ పడిపోతుందోనని భావించిన బడా మీడియా శక్తులు, ఒక మధ్యవర్తి ను వాడుకుని ఈ స్కెచ్ వేశాయా అనే చర్చ నడుస్తోంది.
ఈ మోసం కారణంగా రూ. 2 కోట్ల వరకు సొంత నగదు నష్టపోవడమే కాకుండా, అంతర్జాతీయంగా తన కంపెనీ ప్రతిష్ట దెబ్బతిందని ప్రీతీష్ కొల్లాటి పోలీసులను ఆశ్రయించారు. ఆయన ఇచ్చిన ఫిర్యాదుతో హైదరాబాద్ సీసీఎస్ పోలీసులు రంగంలోకి దిగి, అమెరికా మాయగాడు దిలీప్ మస్కేపై ఫోర్జరీ, చీటింగ్ కేసులు నమోదు చేసి దర్యాప్తు ముమ్మరం చేశారు.
టాప్ హెడ్ లైన్స్
ట్రెండింగ్ వార్తలు
