Bapatla Crime News: బావ పొట్టిగా ఉన్నాడని చంపేసిన బావమరిది- పెళ్లైన పది రోజులకే దారుణం
Bapatla Crime News: బాపట్ల జిల్లాల్లో దారుణం జరిగింది. తన సోదరిని పెళ్లి చేసుకున్న వ్యక్తి పొట్టిగా ఉన్నాడనే కారణంతో బావమరిది చంపేశాడు.
Bapatla Crime News: కులం, మతం, ఆస్తి కోసం జరిగిన పరువు హత్యల గురించి వినే ఉంటారు. ఇప్పుడు బాపట్ల జిల్లాలో జరిగిన హత్య హైట్కు సంబంధించింది. తన సోదరిని పెళ్లి చేసుకున్న వ్యక్తి పొట్టిగా ఉన్నాడనే కారణంతో బావను చంపేశాడో బావమరిది. ఈ దారుణం గురించి తెలిసిన స్థానికులతోపాటు పోలీసులు కూడా షాక్ అయ్యారు. పెళ్లి అయిన పది రోజులకే ఇలా జరగడం అందర్నీ ఇరు కుటుంబాల వాళ్లను విషాదంలోకి నెట్టింది.
బాపట్ల జిల్లా వేమూరు మండలం ఏడవురు గ్రామానికి చెందిన కుర్రా గణేష్, తెనాలి ప్రాంతానికి చెందిన కీర్తి అంజనీ దేవి ప్రేమించుకున్నారు. చాలా కాలంగా సాగుతున్న వీళ్ల ప్రేమను పెద్దలకు చెప్పారు. గణేష్ పొట్టిగా ఉన్నాడని కీర్తి పేరెంట్స్ పెళ్లికి నిరాకరించారు. వారు ఒప్పుకుంటారని చాలా కాలంగా ఎదురు చూశారు. అయినా పెద్దల మనసులు కరగలేదు. చివరకు పది రోజుల క్రితం అమరావతిలోని దేవాలయంలో గణేష్ కీర్తి జంట వివాహం చేసుకున్నారు. దీనికి స్నేహితులు సహకరించారు.
కొత్తగా పెళ్లి చేసుకున్న కీర్తి గణేష్ పది రోజుల నుంచి ఆనందంగా ఉన్నారు. కానీ కీర్తి సోదరుడు మాత్రం విషయం తెలుసుకున్నప్పటి నుంచి పగతో రగిలిపోయాడు. తమకు ఇష్టం లేని వ్యక్తిని పెళ్లి చేసుకుందని తన పరిచయస్తుల వద్ద పదే పదే ప్రస్తావించారు. మాయ మాటలు చెప్పి గణేష్ తన సోదరిని వలలో వేసుకున్నాడని కీర్తి సోదరుడు దుర్గారావు అనేవాడు. అలా గణేష్ పై విమర్శలు చేస్తూ వచ్చాడు. వాళ్లు కనిపిస్తే మాత్రం ఏం చేస్తానో తెలియదని వార్నింగ్ ఇచ్చే వాడు.
దుర్గారావు బెదిరింపులు గురించి తెలుసుకున్న కీర్తి గణేష్ తమ ప్రాణాలకు ముప్పు ఉందని భావించారు. అందుకే పోలీసులను ఆశ్రయించాడు. తనకు కీర్తి ఫ్యామిలీ నుంచి ప్రాణహాని ఉందని ఫిర్యాదు చేశారు. ప్రేమ వివాహాల సమయంలో ఇలాంటివి సర్వసాధారణంగా జరుగుతుంటాయనే కారణంతో పోలీసులు వారికి నచ్చజెప్పి పంపించారు. కాని ఇలా ఫిర్యాదు చేసిన కొన్ని రోజుల వ్యవధిలోనే గణేష్ను దుర్గారావు చంపేశాడు.
గుడిలో సింపుల్గా పెళ్లి చేసుకున్న గణేష్ తన పెళ్లి విందును గ్రాండ్గా చేయాలని నిర్ణయించాడు. తన వద్ద ఉన్న బంగారాన్ని బ్యాంకులో తాకట్టు పెట్టాడు. ఆ డబ్బులతో ధూంధాంగా పెళ్లి విందు ఇవ్వాలని కలలు కంటూ వస్తున్నాడు. బ్యాంకు నుంచి ఇంటికి వస్తున్న దారిలో దుర్గారావు తన స్నేహితులతో వచ్చి గణేష్ను అడ్డగించారు. తమ ఇష్టాఇష్టాలతో పని లేకుండా కీర్తిని మాయ మాటలు చెప్పి పెళ్లి చేసుకుంటావా అని ప్రశ్నించాడు. కొట్టడం మొదలు పెట్టాడు. మాటా మాట పెరిగి గణేష్ను అత్యంత కిరాతకంగా హత్య చేశాడు.
ఈ దారుణాన్ని చూసిన స్థానికులు నివ్వెర పోయారు. బావ పొట్టిగా ఉన్నాడనే ఒకే ఒక్క కారణంతో హత్య చేయడం ఏంటని ఆశ్చర్యం వ్యక్తం చేస్తున్నారు. హత్య గురించి సమాచారం అందుకున్న పోలీసులు ఘటనా స్థలానికి చేరుకొని విచారణ చేపట్టారు. దుర్గారావు అతని స్నేహితులను అదుపులోకి తీసుకున్నారు. పొట్టిగా ఉన్నాడనే కారణంతోనే పెళ్లికి అంగీకరించలేదని అయినా తన చెల్లికి మాయమాటలు చెప్పి పెళ్లి చేసుకున్నాడని అందుకే హత్య చేసినట్టు నేరాన్ని దుర్గారావు అంగీకరించాడు. బావమరిది బావ బతుకు కోరతాడని అంటారు. కానీ ఇక్కడ కేవలం ఎత్తు తక్కువగా ఉన్నాడనే కారణంతోనే బావను బావమరిది హత్య చేయడంతో అంతా షాక్ అయ్యారు.
టాప్ హెడ్ లైన్స్
ట్రెండింగ్ వార్తలు
