Elon Musk Tweet: పుతిన్‌కు ఎలాన్ మస్క్ ఛాలెంజ్- దమ్ముంటే సింగిల్‌గా యుద్ధం చేయాలని ట్వీట్

Elon Musk Tweet: రష్యా అధ్యక్షుడు వ్లాదిమిర్ పుతిన్‌కు ఎలాన్ మస్క్ ఓ ఛాలెంజ్ చేశారు. సింగిల్‌గా యుద్ధం చేయాలని ట్వీట్ చేశారు.

పుతిన్‌కు ఎలాన్ మస్క్ ఛాలెంజ్

Elon Musk Tweet: రష్యా అధ్యక్షుడు వ్లాదిమిర్ పుతిన్‌కు టెస్లా, స్పేస్ ఎక్స్ సీఈఓ ఎలాన్ మస్క్ సవాల్ విసిరారు. ఉక్రెయిన్ విషయంలో సింగిల్‌గా పోరాడాలని ఛాలెంజ్ చేశారు.

I hereby challenge
Владимир Путин
to single combat

Stakes are Україна

— Elon Musk (@elonmusk) March 14, 2022

" సింగిల్‌గా పోరాడాలని వ్లాదిమిర్ పుతిన్‌ను నేను ఛాలెంజ్ చేస్తున్నాను. ఉక్రెయిన్ వాసులే ఇందులో సైనికులు. ఈ యుద్ధానికి సిద్ధమా?                                                         "

- ఎలాన్ మస్క్, టెస్లా సీఈఓ

అయితే ఇది ఏ తరహా యుద్ధమనే దానిపై మస్క్ ఎలాంటి స్పష్టత ఇవ్వలేదు. 

నేనున్నానని

రష్యా దాడులతో ఉక్కిరిబిక్కిరవుతున్న ఉక్రెయిన్‌కు బిలియనీర్‌ ఎలాన్‌ మస్క్‌ బాసటగా నిలిచారు. స్టార్‌లింక్‌ శాటిలైట్‌ బ్రాడ్‌బ్యాండ్‌ సేవల్ని ప్రారంభించి నిరంతరాయ ఇంటర్నెట్‌ సేవలను ప్రజలకు అందుబాటులోకి తీసుకొచ్చారు. మరిన్ని టెర్మినళ్లను సైతం ప్రారంభిస్తామని హామీ ఇచ్చారు.

రష్యా దాడులు ప్రారంభమైన తర్వాత ఉక్రెయిన్‌లో ఇంటర్నెట్‌ సేవల్లో తీవ్ర అంతరాయం ఏర్పడుతోంది. ఈ సమయంలో అక్కడి ప్రజలకు కీలక సమాచారం చేరవేయడం ఎంతో కీలకం. ఇప్పుడు ఆన్‌లైన్‌ సేవలు అందుబాటులో లేకపోతే ఏం జరుగుతుందో తెలుసుకోలేక ప్రజలు ఆందోళనకు గురయ్యే అవకాశం ఉంది. ఈ తరుణంలో మస్క్‌ తనవంతుగా ఉక్రెనియన్లకు సాయంగా నిలవడంపై సామాజిక మాధ్యమాల్లో ప్రశంసలు వెల్లువెత్తాయి.

10 గంటల్లో

ఉక్రెయిన్‌ డిజిటల్‌ ట్రాన్సఫర్మేషన్‌ శాఖ మంత్రి మైఖైలో ఫెదొరోవ్‌.. స్టార్‌లింక్‌ సేవల్ని అందుబాటులోకి తీసుకురావాలని మస్క్‌కు విజ్ఞప్తి చేసిన 10 గంటల్లోనే ఆయన చర్యలు చేపట్టారు.

" మీరు అంగారక గ్రహంపై కాలనీలు నిర్మించాలని చూస్తున్నారు-ఇక్కడ రష్యా ఉక్రెయిన్‌ను ఆక్రమిస్తోంది; మీ రాకెట్లు అంతరిక్షం నుంచి సురక్షితంగా భూమిపై దిగుతున్నాయి- ఇక్కడ రష్యన్‌ రాకెట్లు ఉక్రెయిన్‌ పౌరులపై దాడి చేస్తున్నాయి ఉక్రెయిన్‌కు స్టార్‌లింక్‌ సేవల్ని అందించాలని కోరుతున్నాం "

-మైఖైలో ఫెదొరోవ్‌, డిజిటల్‌ ట్రాన్సఫర్మేషన్‌ శాఖ మంత్రి

ప్రపంచ నలుమూలలకు ఇంటర్నెట్ సేవల్ని అందించాలన్న లక్ష్యంతో ఎలాన్‌ మస్క్‌ స్టార్‌లింక్‌ నెట్‌వర్క్‌ను ప్రారంభించారు. అందులో భాగంగా భూ దిగువ కక్ష్యలో భారీ ఎత్తున కృత్రిమ ఉపగ్రహాలను ప్రయోగిస్తారు. ఇప్పటికే 2000 శాటిలైట్లను కక్ష్యలో నిలిపారు. ఇటీవలే మరో 50 ఉపగ్రహాలను కక్ష్యలోకి పంపారు.

టెరెస్ట్రియల్‌ ఇంటర్నెట్‌ సదుపాయం లేనిచోట ఇంటర్నెట్‌ సేవలు అందించేందుకు స్టార్‌లింక్‌ సహా చాలా సంస్థలు చిన్న చిన్న ఉపగ్రహాలను లో ఎర్త్‌ ఆర్బిట్‌లోకి పంపిస్తున్నాయి. లో లేటెన్సీ బ్రాడ్‌బ్యాండ్‌ ఇంటర్నెట్‌ సేవలు కల్పిస్తున్నాయి.