Amazon: ఐ ఫోన్ ఆర్డరిస్తే ఐక్యూ ఫోన్ డెలివరీ - అమెజాన్‌ను కోర్టుకు లాగిన కర్నూలు వాసి !
Kurnool: ఐఫోన్ ఆర్డర్‌కు బదులు IQ ఫోన్ డెలివరీ చేయడంతో కర్నూలు వాసి కోర్టుకెళ్లారు. దీంతో అమెజాన్‌కు నాన్-బెయిలబుల్ వారెంట్ జారీ అయింది.
Non bailable warrant for Amazon : ప్రముఖ ఈ-కామర్స్ సంస్థ అమెజాన్‌పై కర్నూల్ జిల్లా కన్స్యూమర్ ఫోరం సంచలన తీర్పు ఇచ్చింది. ఆన్‌లైన్‌లో ఐఫోన్ 15 ప్లస్ ఆర్డర్ చేసిన బాధితుడికి బదులుగా IQ ఫోన్ డెలివరీ చేసినందుకు, అమెజాన్ సంస్థకు నాన్-బెయిలబుల్ వారెంట్ జారీ చేసింది. బాధితుడికి రూ.80 వేలు రిఫండ్ చేసి, అదనంగా రూ.25 వేలు చెల్లించాలని ఆదేశించిన ఫోరం, సంస్థ ఆదేశాలను పాటించకపోవడంతో ఈ చర్య తీసుకుంది.
కర్నూల్ జిల్లాకు చెందిన వీరేష్ అనే వ్యక్తి అమెజాన్ వెబ్‌సైట్‌లో రూ.80 వేలు చెల్లించి ఐఫోన్ 15 ప్లస్ మొబైల్ ఫోన్ ఆర్డర్ చేశాడు. అయితే, డెలివరీలో ఐఫోన్‌కు బదులుగా IQ బ్రాండ్ ఫోన్ వచ్చింది. ఈ తప్పుడు డెలివరీపై బాధితుడు అమెజాన్ కస్టమర్ కేర్ సెంటర్‌ను సంప్రదించాడు. అక్కడ సరైన స్పందన లభించకపోవడంతో, వినియోగదారుల హక్కుల రక్షణ కోసం కర్నూల్ జిల్లా కన్స్యూమర్ ఫోరాన్ని ఆశ్రయించాడు.
కన్స్యూమర్ ఫోరం బాధితుడి ఫిర్యాదుపై విచారణ చేపట్టింది. విచారణలో అమెజాన్ సంస్థ నిర్లక్ష్యంగా వ్యవహరించినట్లు తేలింది. దీంతో, ఫోరం బాధితుడికి ఐఫోన్ 15 ప్లస్ డెలివరీ చేయాలని లేదా రూ.80 వేలు రిఫండ్ చేయాలని ఆదేశించింది. అంతే కాకుండా, మానసిక వేదన , సమయం వృధా చేసినందుకు అదనంగా రూ.25 వేలు చెల్లించాలని తీర్పు ఇచ్చింది. అయితే, అమెజాన్ సంస్థ ఈ ఆదేశాలను పట్టించుకోకుండా నిర్లక్ష్యంగా వ్యవహరించింది. దీంతో, బాధితుడు మరోసారి ఫోరాన్ని సంప్రదించాడు.
ఫోరం అమెజాన్ సంస్థకు నాన్-బెయిలబుల్ వారెంట్ జారీ చేసింది. ఇది సంస్థకు భారీ షాక్‌గా మారింది. తదుపరి విచారణను నవంబర్ 21కి వాయిదా వేసిన ఫోరం, అమెజాన్ ప్రతినిధులు హాజరు కావాలని ఆదేశించింది. ఈ వారెంట్ జారీతో అమెజాన్ సంస్థ ఇప్పుడు చట్టపరమైన చిక్కుల్లో పడింది.
ఆన్‌లైన్ కొనుగోళ్లలో వస్తువుల మార్పిడి, తప్పుడు డెలివరీలు పెరుగుతున్నాయని ఫిర్యాదులు వస్తున్న సమయంలో ఈ తీర్పు ఇతర బాధితులకు ప్రేరణగా నిలుస్తోంది. అమెజాన్ సంస్థ నుంచి ఇంతవరకు అధికారిక ప్రతిస్పందన రాలేదు, కానీ నవంబర్ 21 విచారణలో సంస్థ ప్రతినిధులు హాజరై ఆదేశాలను అమలు చేయాల్సి ఉంది.
టాప్ హెడ్ లైన్స్
ట్రెండింగ్ వార్తలు
