Health Insurance New Rule: ఐఆర్‎డీఏఐ కొత్త రూల్స్‌, మూడు గంటల్లోనే క్లెయిమ్‌ సెటిల్‌మెంట్‌

Health Insurance New Rule: ఆస్పత్రి నుంచి డిశ్చార్జి అయిన తర్వాత రోగి ఆరోగ్య బీమా క్లెయిమ్ సెటిల్‌మెంట్ కోసం వేచి చూడాల్సిన అవసరం లేదు. కొత్త రూల్ ప్రకారం ఇక మూడు గంటల్లో క్లెయిమ్ అవుతుంది.

ఐఆర్‎డీఏఐ కొత్త రూల్స్‌, మూడు గంటల్లోనే క్లెయిమ్‌ సెటిల్‌మెంట్‌

Health Insurance New Rule: చికిత్స కోసం ఆసుపత్రిలో చేరిన తర్వాత, చికిత్స ఖర్చులు ఆరోగ్య బీమా ద్వారా కవర్ చేయబడతాయి. ఆసుపత్రి నుండి డిశ్చార్జ్ అయిన తర్వాత కూడా రోగి ఆరోగ్య బీమా క్లెయిమ్ సెటిల్‌మెంట్ కోసం ఎదురుచూస్తూ ఉండాల్సి వస్తుంది.  అయితే క్లెయిమ్ సెటిల్మెంట్ సుదీర్ఘ ప్రక్రియ రోగిని.. అతని కుటుంబాన్ని చాలా ఇబ్బంది పెడుతుంది. చికిత్స ముగిసిన తర్వాత ఇంటికి వెళ్లేందుకు డాక్టర్ అనుమతి ఇస్తారు.. అయితే ఆరోగ్య బీమా క్లెయిమ్ సెటిల్‌మెంట్ కోసం తీసుకునే సమయం చాలా ఎక్కువ అవుతుంది. రోగి చాలా గంటలు ఆసుపత్రిలో వేచి ఉండవలసి వస్తుంది. కానీ ఇప్పుడు ఈ గంటల నిరీక్షణ ముగియనుంది. ఆరోగ్య బీమా క్లెయిమ్ సెటిల్మెంట్ నియమాలలో మార్పులు వచ్చాయి. 

ఇన్సూరెన్స్ రెగ్యులేటరీ అండ్ డెవలప్‌మెంట్ అథారిటీ ఆఫ్ ఇండియా (IRDAI) కొంత ఉపశమనం కలిగించింది. IRDAI ఆరోగ్య బీమా పాలసీల నియమాలలో కొన్ని పెద్ద మార్పులు చేసింది. ఆరోగ్య బీమాపై 55 సర్క్యులర్‌లను రద్దు చేస్తూ రెగ్యులేటర్ మాస్టర్ సర్క్యులర్‌ను జారీ చేసింది. మాస్టర్ సర్క్యులర్ ప్రకారం, ఆరోగ్య బీమా పాలసీని కొనుగోలు చేసే పాలసీదారు ఇప్పుడు మూడు గంటలలోపు క్లెయిమ్ సదుపాయాన్ని పొందుతారు.

3 గంటల్లో క్లెయిమ్ సెటిల్మెంట్ 
ఇన్సూరెన్స్ రెగ్యులేటరీ అండ్ డెవలప్‌మెంట్ అథారిటీ ఆఫ్ ఇండియా (IRDAI) మాస్టర్ సర్క్యులర్‌తో బీమా చేసిన వారికి గొప్ప ఉపశమనం కలిగించింది. ఇప్పుడు పాలసీదారులు క్లెయిమ్ సెటిల్మెంట్ కోసం వేచి ఉండాల్సిన అవసరం లేదు.  కొత్త సర్క్యులర్ ప్రకారం..  ఆసుపత్రి నుండి డిశ్చార్జ్ అభ్యర్థనను స్వీకరించిన రెండు గంటలలోపు క్లెయిమ్ సెటిల్మెంట్ చేయాల్సి ఉంటుంది. IRDAI 29 మే 2024న కొత్త సర్క్యులర్‌ను జారీ చేసింది. పాలసీదారు ఆసుపత్రి నుంచి డిశ్చార్జ్ అయ్యే వరకు ఎట్టి పరిస్థితుల్లో వేచి ఉండాల్సిన అవసరం లేదని కొత్త సర్క్యులర్‌లో పేర్కొంది. పాలసీదారుడి క్లెయిమ్ సెటిల్‌మెంట్‌కు 3 గంటల కంటే ఎక్కువ సమయం తీసుకుంటే, ఆసుపత్రి అదనపు ఛార్జీలు వసూలు చేస్తే, ఆ అదనపు మొత్తాన్ని బీమా కంపెనీ చెల్లించాల్సి ఉంటుందని బీమా నియంత్రణ సంస్థ కంపెనీలకు సూచించింది.

100 శాతం నగదు రహిత పరిష్కారం
చికిత్స సమయంలో పాలసీదారు మరణిస్తే, క్లెయిమ్ సెటిల్‌మెంట్ అభ్యర్థనపై బీమా కంపెనీ వెంటనే చర్యలు తీసుకుంటుందని బీమా నియంత్రణ సంస్థ తెలిపింది.  నిర్ణీత గడువులోగా 100 శాతం నగదు రహిత క్లెయిమ్ సెటిల్‌మెంట్ చేయాలని బీమా కంపెనీలకు IRDAI కఠినమైన ఆదేశాలు ఇచ్చింది. అత్యవసర పరిస్థితుల్లో, నగదు రహిత అభ్యర్థనపై గంటలోపు నిర్ణయం తీసుకోవలసి ఉంటుంది.  డిజిటల్ మోడ్ ద్వారా పాలసీదారులకు ప్రీ-ఆథరైజేషన్ ప్రక్రియను అందించాలని బీమా కంపెనీలకు కూడా సూచించింది. భీమాదారులు నగదు రహిత అభ్యర్థనలను నిర్వహించడానికి..  సహాయం చేయడానికి ఆసుపత్రిలో ఫిజికల్ మోడ్‌లో ప్రత్యేక హెల్ప్ డెస్క్‌లను ఏర్పాటు చేసుకోవచ్చు.

ఈ నిర్ణయాలు కూడా తీసుకున్నారు
-మల్టిపుల్ హెల్త్ ఇన్సూరెన్స్ పాలసీలు ఉన్న పాలసీదారుడు ఆమోదయోగ్యమైన క్లెయిమ్ మొత్తాన్ని పొందగలిగే పాలసీని ఎంచుకునే అవకాశం ఉంటుంది.
-బీమా సంస్థలు ప్రతి పాలసీ డాక్యుమెంట్‌తో పాటు కస్టమర్ ఇన్ఫర్మేషన్ షీట్ (CIS)ని కూడా అందించాలి.
-పాలసీ వ్యవధిలో ఎటువంటి క్లెయిమ్ లేని పక్షంలో, బీమాదారులు పాలసీదారులకు బీమా హామీ మొత్తాన్ని పెంచడం ద్వారా లేదా ప్రీమియం మొత్తంలో తగ్గింపు ఇవ్వడం ద్వారా అటువంటి నో క్లెయిమ్ బోనస్‌ను ఎంపిక చేసుకునే అవకాశాన్ని కల్పించవచ్చు.
-పాలసీదారుడు పాలసీ వ్యవధిలో ఎప్పుడైనా తన పాలసీని రద్దు చేసుకోవాలని ఎంచుకుంటే, అతను గడువు తీరని పాలసీ టర్మ్‌కు వాపసు అందుకుంటారు.