(Source: ECI/ABP News/ABP Majha)
Gautam Adani Net Worth: గ్రాండ్‌ కమ్‌ బ్యాక్ - మళ్లీ టాప్-20 లిస్ట్‌లోకి గౌతమ్ అదానీ
గౌతమ్ అదానీ మొత్తం నికర విలువలో కూడా పెరుగుదల నమోదైంది.
Gautam Adani Net Worth: భారతదేశ బిలీయనీర్‌, అదానీ గ్రూప్ (Adani Group) అధినేత గౌతమ్ అదానీ వ్యక్తిగత సంపద (Gautam Adani Net Worth) మళ్లీ పెరగడం ప్రారంభమైంది. దీంతో, ఆయన మరోసారి ప్రపంచ టాప్-20 సంపన్నుల జాబితాలోకి తిరిగి వచ్చారు.
మంగళవారం (07 ఫిబ్రవరి 2023) అదానీ గ్రూప్ స్టాక్స్‌లో పెరుగుదల నమోదైంది. గ్రూప్‌లోని చాలా స్టాక్స్ అప్పర్‌ సర్క్యూట్స్‌లోకి వెళ్లాయి. అదానీ గ్రీన్ ఎనర్జీ, అదానీ పోర్ట్స్, అదానీ ట్రాన్స్‌మిషన్ కంపెనీల షేర్లను తాకట్టు పెట్టి గతంలో తీసుకున్న రుణాలను వెంటనే తీర్చేయాలని అదానీ గ్రూప్ ప్రమోటర్లు సోమవారం నిర్ణయించారు. వాస్తవానికి, ఆ షేర్లను తాకట్టు నుంచి విడిపించుకోవడానికి 2024 సెప్టెంబర్ వరకు గడువు ఉన్నా, స్టాక్‌ ధరల్లో పతనాన్ని అడ్డుకోవడానికి, ఆయా అప్పులను గడువుకు ముందే చెల్లించాలని డిసైడ్‌ అయ్యారు. మొత్తం 1.1 బిలియన్ డాలర్ల రుణాలను ప్రీపెయిడ్ చేస్తామని ప్రకటించారు. అందువల్ల స్టాక్స్‌లో రికవరీ జరిగింది. దీంతో గౌతమ్ అదానీ మొత్తం నికర విలువలో కూడా పెరుగుదల నమోదైంది.
అదానీ నికర విలువ ఎంత పెరిగింది?
ఫోర్బ్స్ రియల్ టైమ్ బిలియనీర్ల జాబితా (Forbes Billionaires List) ప్రకారం, గౌతమ్ అదానీ మొత్తం నికర విలువ 62.4 బిలియన్ డాలర్లకు చేరుకుంది. దీంతో, ఫోర్బ్స్ బిలియనీర్స్‌ లిస్ట్‌లో అదానీ 17వ స్థానానికి చేరుకున్నారు. ఫిబ్రవరి 7న అదానీ గ్రూప్ షేర్‌ ధరలు పెరిగిన తర్వాత, అదానీ సంపద మొత్తం 463 మిలియన్‌ డాలర్లు పెరిగింది. అందువల్లే అదానీ టాప్-20 సంపన్నుల జాబితాలోకి తిరిగి వచ్చారు.
ముఖేష్ అంబానీ సంపద ఎంతో తెలుసా?
గౌతమ్ అదానీ ఆస్తుల విలువ ప్రస్తావనకు వచ్చిన ప్రతిసారీ, రిలయన్స్‌ ఇండస్ట్రీస్‌ (Reliance Industries) ఛైర్మన్‌ ముకేష్ అంబానీ (Mukesh Ambani) గురించి చెప్పుకోవడం కూడా పరిపాటి. భారత్‌తోపాటు ఆసియాలో అత్యంత ధనవంతుడు ముకేష్ అంబానీ. ఆయన మొత్తం నికర విలువ (Mukesh Amabni Net worth) 82.5 బిలియన్ డాలర్లు. ఫోర్బ్స్ సంపన్నుల జాబితాలో ముకేష్ అంబానీ 11వ స్థానంలో ఉన్నారు.
ఫోర్బ్స్ రియల్ టైమ్ బిలియనీర్స్‌ జాబితా ప్రకారం... ప్రముఖ లగ్జరీ ఉత్పత్తుల తయారీ సంస్థ LVMH Moet హెన్నెస్సీ లూయిస్ విట్టన్‌ CEO బెర్నార్డ్ ఆర్నాల్ట్ (Bernard Arnault) ప్రపంచంలోనే అత్యంత ధనవంతుడు. ఆయన సొంత ఆస్తుల విలువ 213.2 బిలియన్ డాలర్లు. టెస్లా & ట్విట్టర్ సహా అనేక ప్రపంచ స్థాయి కంపెనీలకు యజమాని అయిన ఎలాన్ మస్క్ (Elon Musk) రెండో స్థానంలో ఉన్నారు. ఆయన మొత్తం నికర విలువ 188.6 బిలియన్ డాలర్లు. అదే సమయంలో, అమెజాన్ వ్యవస్థాపకుడు జెఫ్ బెజోస్ (Jeff Bezos) ప్రపంచంలోనే మూడో అత్యంత సంపన్న వ్యక్తి. ఆయన మొత్తం ఆస్తుల విలువ 125.3 బిలియన్ డాలర్లు.
ఒకప్పుడు ప్రపంచంలో మూడో ధనవంతుడు
ఒకానొక సమయంలో, గౌతమ్ అదానీ ప్రపంచంలోనే మూడో అత్యంత సంపన్నుడు. కానీ, అమెరికాకు చెందిన షార్ట్ సెల్లింగ్ సంస్థ హిండెన్‌బర్గ్ రీసెర్చ్‌ (Hindenburg Research) రిపోర్ట్ బయటకు వచ్చిన తర్వాత, అంటే, 2023 జనవరి 24 నుంచి అదానీ గ్రూప్ కంపెనీల షేర్లలో భారీ పతనం కనిపించింది. ఆ తర్వాత 9 ట్రేడింగ్ రోజుల్లోనే, అదానీ గ్రూప్‌లోని మొత్తం 10 లిస్టెడ్‌ కంపెనీల మార్కెట్ క్యాపిటలైజేషన్ రూ. 9.5 లక్షల కోట్లు, అంటే 49 శాతం తగ్గింది. ఈ భారీ క్షీణత కారణంగా, టాప్-20 సంపన్నుల జాబితా నుంచి కూడా గత వారం బయటకు వచ్చారు అదానీ.
టాప్ హెడ్ లైన్స్
ట్రెండింగ్ వార్తలు
