D-Mart Q2 Results: కొనసాగిన డీమార్ట్ లాభాల పరంపర, ఈసారి రూ.686 కోట్ల ప్రాఫిట్‌

ఏకీకృత నికర లాభాన్ని 64.13 శాతం పెంచుకుని ₹685.71 కోట్లను డి మార్ట్‌ తన కిరాణా బాస్కెట్‌లో వేసుకుంది. ఏడాది క్రితం ఇదే త్రైమాసికంలో ₹417.76 కోట్ల నికర లాభాన్ని ఈ కంపెనీ ఆర్జించింది.

కొనసాగిన డీమార్ట్ లాభాల పరంపర

D-Mart Q2 Results: డి-మార్ట్‌ బ్రాండ్‌తో దేశవ్యాప్తంగా కిరాణా వ్యాపారం చేస్తున్న, ప్రజలకు సుపరిచితమైన అవెన్యూ సూపర్‌మార్ట్స్ లిమిటెడ్ (Avenue Supermarts Ltd), FY23 జులై-సెప్టెంబర్ త్రైమాసికంలోనూ లాభాల పరంపర కొనసాగించింది. ఖర్చులు (QoQ, YoY రెండింట్లో) తగ్గిన కారణంగా కంపెనీ నికర లాభం పెరిగింది.

ఈ త్రైమాసికంలో, ఏకీకృత నికర లాభాన్ని 64.13 శాతం పెంచుకుని ₹685.71 కోట్లను డి మార్ట్‌ తన కిరాణా బాస్కెట్‌లో వేసుకుంది. ఏడాది క్రితం ఇదే త్రైమాసికంలో ₹417.76 కోట్ల నికర లాభాన్ని ఈ కంపెనీ ఆర్జించింది.

సమీక్షిస్తున్న త్రైమాసికంలో కార్యకలాపాల ద్వారా వచ్చిన ఆదాయం (ఆపరేటింగ్‌ రెవెన్యూ) 36.58 శాతం పెరిగి ₹10,638.33 కోట్లకు చేరుకుంది. గత ఆర్థిక సంవత్సరం ఇదే త్రైమాసికంలో ఇది ₹7,788.94 కోట్లుగా ఉంది.

తగ్గిన ఖర్చులు
క్వార్టర్-ఆన్-క్వార్టర్ (QoQ), ఇయర్-ఆన్-ఇయర్‌లోనూ (YoY) కంపెనీ ఖర్చులు తగ్గాయి. Q2FY23లో, అవెన్యూ సూపర్‌మార్ట్ మొత్తం ఖర్చులను ₹9.638.07 కోట్లుగా ప్రకటించింది. ఏడాది కిందట ఇవి ₹11.997.25 కోట్లుగా ఉన్నాయి. Q1FY23లో మొత్తం ఖర్చులు ₹8,934 కోట్లుగా ఉన్నాయి. 

పెరిగిన ఆస్తులు
ప్రస్తుత ఆర్థిక సంవత్సరం మొదటి ఆరు నెలల్లో ఈ రిటైల్ కార్పొరేషన్ మొత్తం ఆస్తులు మెరుగుపడ్డాయి. జులై- సెప్టెంబర్ త్రైమాసికం ముగింపు నాటికి మొత్తం ఆస్తులను ₹17152.11 కోట్లుగా ఈ కంపెనీ నివేదించింది, FY22 చివరి నాటికి దీని మొత్తం ఆస్తుల విలువ ₹15403.96 కోట్లుగా ఉంది. 2022-23 ఆర్థిక సంవత్సరం మొదటి ఆరు నెలల్లో మొత్తం ఆస్తులను దాదాపు 11.35 శాతం మేర పెంచుకుంది.

Q2FY23లో కంపెనీ మొత్తం నాన్‌-కరెంట్‌ అసెట్స్ ₹11791.72 కోట్లుగా తేలాయి. మొత్తం కరెంట్‌ అసెట్స్‌ ₹5360.39 కోట్లుగా ఉన్నాయి.

అయితే, ప్రస్తుత ఆర్థిక సంవత్సరం మొదటి ఆరు నెలల్లో కంపెనీ ఈక్విటీ, లయబిలిటీస్‌ కూడా పెరిగాయి. 2022 సెప్టెంబర్ త్రైమాసికం ముగిసిన తర్వాత, కంపెనీ మొత్తం ఈక్విటీ, లయబిలిటీస్‌ ₹17,152.11 కోట్లుగా ఉన్నాయి. 2021-22 ఆర్థిక సంవత్సరం ముగింపులో ఇవి ₹15,403.96 కోట్లుగా ఉన్నాయి.

షేర్‌ ట్రెండ్‌
శుక్రవారం సెషన్‌లో, డి మార్ట్‌ షేరు ధర 0.28 శాతం తగ్గి, రూ.4,298.05 వద్ద ఆగింది. 

గడిచిన నెల రోజుల్లో ఈ స్టాక్ 0.68 శాతం నష్టపోయి ఫ్లాట్‌గా ఉంది. గత ఆరు నెలల కాలంలో ఒక్కో షేరుకు రూ.242 లేదా 5.97 లాభపడింది. అయితే, ఈ ఏడాదిలో ఇప్పటివరకు (YTD) షేరు ధర రూ.413 లేదా 8.78 శాతం నష్టపోయింది.

Disclaimer: ఈ వార్త కేవలం సమాచారం కోసం మాత్రమే. మ్యూచువల్‌ ఫండ్లు, స్టాక్‌ మార్కెట్‌, క్రిప్టో కరెన్సీ, షేర్లు, ఫారెక్స్‌, కమొడిటీల్లో పెట్టే పెట్టుబడులు ఒడుదొడుకులకు లోనవుతుంటాయి. మార్కెట్‌ పరిస్థితులను బట్టి ఆయా పెట్టుబడి సాధనాల్లో రాబడి మారుతుంటుంది. ఫలానా మ్యూచువల్‌ ఫండ్‌, స్టాక్‌, క్రిప్టో కరెన్సీలో పెట్టుబడి పెట్టాలని లేదా ఉపసంహరించుకోవాలని 'ఏబీపీ దేశం' చెప్పడం లేదు. పెట్టుబడి పెట్టే ముందు, లేదా ఉపసంహరించుకునే ముందు అన్ని వివరాలు పరిశీలించడం ముఖ్యం. అవసరమైతే సర్టిఫైడ్‌ ఫైనాన్షియల్‌ అడ్వైజర్ల నుంచి సలహా తీసుకోవడం మంచిది.