వెహికల్‌ లోన్‌ తీర్చేశారా? RCలో హైపోతికేషన్ తీసేయించడానికి RTOకి వెళ్లాల్సిన అవసరం లేదిప్పుడు!

కార్‌ లేదా బైక్‌ లోన్‌ పూర్తిగా చెల్లించారా? ఇక ఆర్‌టీఓ ఆఫీసు చుట్టూ తిరగాల్సిన అవసరం లేదు. RCలో హైపోతికేషన్ తొలగింపు ప్రాసెస్‌ను వాహన్ పోర్టల్‌లో ఆన్‌లైన్‌లో ఎలా పూర్తి చేయాలో తెలుసుకోండి.

RC అప్‌డేట్‌ ఇప్పుడు ఇంటి నుంచే

Source : https://x.com/

Show Quick Read

Key points generated by AI, verified by newsroom

• RCలో హైపోథికేషన్ తొలగింపు ఇప్పుడు ఆన్లైన్లో సులభతరం.
• రుణం చెల్లించిన తర్వాత వాహనంపై పూర్తి హక్కులు పొందండి.
• వాహన్ పోర్టల్లో ఫారం 35, NOC అప్లోడ్ చేయాలి.
• కొన్ని రాష్ట్రాల్లో RTOను సందర్శించి పత్రాలు సమర్పించాల్సి ఉంటుంది.

RC Hypothecation Removal: మీరు బ్యాంక్‌ లేదా ఫైనాన్స్ కంపెనీ నుంచి లోన్ తీసుకుని స్కూటర్‌, బైక్‌, కారు లేదా మరేదైనా వెహికల్‌ కొనుగోలు చేశారా? ఆ లోన్ మొత్తాన్ని పూర్తిగా చెల్లించేశారా? అయితే మీకో ముఖ్యమైన శుభవార్త. ఇకపై, మీ బండి రిజిస్ట్రేషన్‌ సర్టిఫికెట్‌ (RC)లో హైపోతికేషన్ తొలగించేందుకు RTO ఆఫీసుకు వెళ్లాల్సిన అవసరం ఉండదు. కేంద్ర ప్రభుత్వం ఈ ప్రక్రియను సులభతరం చేసింది. ఇప్పుడు వాహన్ పోర్టల్‌ ద్వారా ఆన్‌లైన్‌లోనే హైపోతికేషన్ టెర్మినేషన్ (Hypothecation Termination In RC) పూర్తి చేయవచ్చు.            

హైపోతికేషన్ అంటే ఏమిటి? 

మీరు లోన్‌పై వాహనం కొనుగోలు చేసినప్పుడు, మీ RC కార్డులో బ్యాంక్‌ లేదా ఫైనాన్స్ సంస్థ పేరు ఉంటుంది. ఇది, ఆ వాహనం రుణ తాకట్టులో ఉందని సూచిస్తుంది. మీరు లోన్ మొత్తం చెల్లించిన తర్వాత కూడా ఆ వివరాలు RCలో అలాగే ఉంటాయి. అందుకే వాటిని అధికారికంగా తొలగించాలి. ఈ ప్రక్రియనే హైపోతికేషన్ టెర్మినేషన్ అంటారు.

ఎందుకు ఇది అవసరం?

మీరు వాహనాన్ని అమ్మాలనుకుంటే, ఓనర్‌షిప్ మార్చాలనుకుంటే లేదా RCలో పూర్తి హక్కులు మీ పేరుపైనే ఉండాలంటే హైపోతికేషన్ తొలగింపు తప్పనిసరి. ఇది చేయకపోతే భవిష్యత్తులో సమస్యలు తలెత్తే అవకాశం ఉంటుంది.

అవసరమైన పత్రాలు

హైపొతికేషన్ టెర్మినేషన్ కోసం ఈ డాక్యుమెంట్లు సిద్ధంగా ఉంచుకోవాలి:

బ్యాంక్‌ లేదా ఫైనాన్స్ కంపెనీ నుంచి నో అబ్జెక్షన్ సర్టిఫికెట్ (NOC)

RTO ఫారం 35

ఒరిజినల్ RC

చెల్లుబాటు అయ్యే ఇన్సూరెన్స్ సర్టిఫికెట్

ఆన్‌లైన్‌లో ఎలా చేయాలి?

ముందుగా vahan.parivahan.gov.in వెబ్‌సైట్‌లో లాగిన్ అవ్వాలి.

“Online Services”లో “Vehicle Related Services” ఎంచుకోవాలి.

మీ వెహికల్‌ రిజిస్ట్రేషన్ నంబర్‌, ఛాసిస్ నంబర్ నమోదు చేసి OTP పొందాలి.

మీ మొబైల్‌కు వచ్చిన OTP నమోదు చేసి లాగిన్ కావాలి.

“Hypothecation Termination” ఎంపిక చేసి కొనసాగాలి.

అవసరమైన డాక్యుమెంట్లు DMS ద్వారా అప్‌లోడ్ చేయాలి.

ఫీజు చెల్లించి సబ్మిట్ చేయాలి.

ప్రాసెస్ పూర్తయిన తర్వాత మీ అప్లికేషన్ RTOలో పరిశీలనకు వెళ్తుంది. అధికారుల ఆమోదం తర్వాత RCలో హైపోతికేషన్ తొలగింపు జరుగుతుంది.

కొన్ని రాష్ట్రాల్లో ఈ పద్ధతి లేదు

కొన్ని రాష్ట్రాల్లో, ఆన్‌లైన్‌లో అప్లై చేసిన తర్వాత కూడా ఫారం 35, ఇతర అవసరమైన పత్రాలను RTOకి తీసుకువెళ్లి సమర్పించాల్సి ఉంటుంది. అందుకే మీ రాష్ట్రంలో అమల్లో ఉన్న నియమాలు ముందుగా తెలుసుకోవడం మంచిది.

లోన్ పూర్తిగా చెల్లించిన తర్వాత RCలో హైపోతికేషన్ తొలగించుకోవడం చాలా ముఖ్యం. ఆన్‌లైన్ సదుపాయం వల్ల సమయం, శ్రమ రెండూ ఆదా అవుతాయి. మీరు లోన్ క్లోజ్ చేసిన వెంటనే ఈ ప్రక్రియ పూర్తి చేసి మీ వాహనంపై పూర్తి హక్కులు మీ పేరుపైనే ఉండేలా చూసుకోండి, భవిష్యత్తులో ఎలాంటి ఇబ్బందులు రాకుండా ముందే జాగ్రత్త పడండి.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.

మరిన్ని చదవండి

మారుతి స్విఫ్ట్‌ కొంటే ₹45,000, వాగన్‌ఆర్‌ కొంటే ₹37,500 - ఆఫర్‌ ఇంకొన్ని రోజులే