Toyota SUVs: హైటెక్ హంగులతో హీట్ పెంచిన టయోటా ఫార్చ్యూనర్, లెజెండర్ - ఈ కార్లు ఇంతకుముందులా లేవు!
Toyota Fortuner And Fortuner Legender: టయోటా ఫార్చ్యూనర్ & ఫార్చ్యూనర్ లెజెండర్ మైల్డ్-హైబ్రిడ్ వేరియంట్స్ బుకింగ్స్ ప్రారంభమయ్యాయి. డెలివరీలు ఈ నెల మూడో వారం నుంచి ప్రారంభం అవుతాయి.
Toyota Fortuner And Legender With 48V Mild-hybrid Tech: టయోటా ఫార్చ్యూనర్ & టయోటా ఫార్చ్యూనర్ లెజెండర్ సొసైటీలో స్టేటస్ సింబల్లా గుర్తింపు తెచ్చుకున్నాయి. చాలామంది ప్రముఖులు ఈ కార్లను ఉపయోగిస్తున్నారు. ఇప్పుడు, ఈ రెండు భారీ కార్లు కొత్త మైల్డ్-హైబ్రిడ్ వేరియంట్స్తో రీలాంచ్ అయ్యాయి, ఫుల్-సైజ్ SUV సెగ్మెంట్లోకి మైల్డ్-హైబ్రిడ్ సిస్టమ్ను తీసుకొచ్చాయి. ఈ సిస్టమ్తో ఇంధన సామర్థ్యం పెరుగుతుంది, ఉద్గారాలు తగ్గుతాయి & బండి పనితీరు మెరుగుపడుతుంది. ప్రస్తుత వెర్షన్లలోని 2.8-లీటర్ డీజిల్ ఇంజిన్నే కొత్త వేరియంట్లలో ఉపయోగించినప్పటికీ, 48-వోల్ట్ మైల్డ్-హైబ్రిడ్ సిస్టమ్ను కొత్తగా యాడ్ చేశారు. ఇంకా అదనపు ఫీచర్లను కూడా కలిపారు.
మైల్డ్-హైబ్రిడ్ సిస్టమ్తో మరింత పవర్ఫుల్గా తయారైన టయోటా ఫార్చ్యూనర్ & టయోటా ఫార్చ్యూనర్ లెజెండర్ కోసం బుకింగ్స్ ప్రారంభమయ్యాయి, జూన్ మూడో వారం నుంచి డెలివెరీలు స్టార్ట్ అవుతాయి.
ధర
టయోటా ఫార్చ్యూనర్ ఎక్స్-షోరూమ్ ధర రూ. 35.37 లక్షల నుంచి రూ. 51.94 లక్షల మధ్య ఉంటుంది & లెజెండర్ ధర రూ. 44.11 లక్షల నుంచి రూ. 50.09 లక్షల వరకు ఉంటుంది. కొత్త వేరియంట్లలో... టయోటా ఫార్చ్యూనర్ మైల్డ్-హైబ్రిడ్ ఎక్స్-షోరూమ్ ధర రూ. 44.72 & లెజెండర్ మైల్డ్-హైబ్రిడ్ ఎక్స్-షోరూమ్ ధర 50.09 లక్షల రూపాయలు.
ఈ వేరియంట్లలో కొత్తగా ఏం యాడ్ చేశారు?
ఫార్చ్యూనర్ & లెజెండర్ వేరియంట్లలో అత్యంత కీలక అప్డేట్ వాటి పవర్ట్రెయిన్. 2.8-లీటర్ డీజిల్ 48-వోల్ట్ మైల్డ్-హైబ్రిడ్ సిస్టమ్ గరిష్టంగా 204 PS పవర్ను, 500 Nm టార్క్ను జనరేట్ చేస్తుంది. ఇది 6-స్పీడ్ AT ట్రాన్స్మిషన్తో, రియర్-వీల్ డ్రైవ్తో (RWD) పరుగులు పెడుతుంది. ఫార్చ్యూనర్ మైల్డ్-హైబ్రిడ్లో పవర్ ఔట్పుట్ మారలేదు. ఇంజిన్, తన ఔట్పుట్లో 16 PS & 65 Nm స్వల్ప బూస్ట్ కోసం ఒక చిన్న బ్యాటరీ ప్యాక్ & ఎలక్ట్రిక్ మోటారుపై ఆధారపడుతుంది. ఫలితంగా చాలా ఈజీ డ్రైవ్ ఇస్తుంది. ఇంకా.. ఐడిల్ స్టార్ట్/స్టాప్ను యాడ్ చేయడం వల్ల ఇంధన సామర్థ్యం మెరుగుపడుతుంది.
డిజైన్
కొత్త వేరియంట్లలో డిజైన్ పరంగా కనిపించే ఏకైక మార్పు బాడీపై కనిపించే 'నియో డ్రైవ్' బ్యాడ్జ్. డిజైన్ పరంగా ఇతర మార్పులు లేవు.
ఫీచర్లు
ఫార్చ్యూనర్ & లెజెండర్ రెండింటిలోనూ 360-డిగ్రీ కెమెరా ఉంది, వీటిని డీలర్షిప్ స్థాయిలో బిగిస్తున్నారు. ఫార్చ్యూనర్లో వైర్లెస్ ఫోన్ ఛార్జర్ కూడా ఉంది, దీనిని కూడా డీలర్షిప్ ఫిట్మెంట్గా అందుబాటులో ఉంచారు. ఇంకా.. మల్టీ-టెర్రైన్ సెలెక్ట్, లెదర్ సీట్ కవర్లు, 8-అంగుళాల టచ్స్క్రీన్ సిస్టమ్, పవర్డ్ ఫ్రంట్ సీట్లు, రియర్ AC వెంట్స్తో డ్యూయల్-జోన్ ఆటో AC, క్రూయిజ్ కంట్రోల్, యాంబియంట్ లైటింగ్, ఆటో-డిమ్మింగ్ ఇన్సైడ్ రియర్వ్యూ మిర్రర్ (IRVM) & 11-స్పీకర్ JBL సౌండ్ సిస్టమ్ ఉన్నాయి. ఇంకో సూపర్ టెక్నాలజీ ఏంటంటే.. దీనిలో గెస్చర్-కంట్రోల్డ్ పవర్డ్ టెయిల్గేట్ & ఇన్స్ట్రుమెంట్ క్లస్టర్లో మల్టీ-ఇన్ఫర్మేషన్ డిస్ప్లే (MID) కూడా ఈ వేరియంట్లలో చూడవచ్చు.
అయితే, మైల్డ్-హైబ్రిడ్ వేరియంట్స్ నుంచి వెంటిలేటెడ్ ఫ్రంట్ సీట్లు తీసేశారు. కచ్చితమైన కారణం తెలియకపోయినా, సీటు కింద మైల్డ్-హైబ్రిడ్ టెక్ కోసం చిన్న బ్యాటరీని అమర్చడం కోసం ఆ వెంటిలేటెడ్ సీట్ ఫీచర్ను తీసేసి ఉండొచ్చని భావిస్తున్నారు.
భద్రత
ప్రయాణీకుల భద్రత కోసం 7 ఎయిర్బ్యాగులు, ఎలక్ట్రానిక్ స్టెబిలిటీ కంట్రోల్ (ESC), హిల్ స్టార్ట్ అసిస్ట్, రియర్ పార్కింగ్ కెమెరా, ఫ్రంట్ & రియర్ పార్కింగ్ సెన్సార్లు ఉన్నాయి.
పోటీ కార్లు
టయోటా ఫార్చ్యూనర్ & లెజెండర్ రెండూ MG Gloster, Jeep Meridian, Skoda Kodiaqతో పాటు త్వరలో రాబోయే MG Majestorకు పోటీ ఇస్తాయి.
టాప్ హెడ్ లైన్స్
ట్రెండింగ్ వార్తలు
