టాటా టియాగో vs హ్యుందాయ్‌ గ్రాండ్‌ i10 నియోస్‌ - యాక్సిలరేషన్‌ టెస్ట్‌లో ఏ కారు గెలిచింది?
Tata Tiago & Hyundai Grand i10 Nios మధ్య 0-100 కిమీ వేగం, రోలింగ్‌ యాక్సిలరేషన్‌, ఇంజిన్‌ వివరాలు, ధరలను ఎక్స్‌పర్ట్‌లు పోల్చారు. ఏ కారు మెరుగ్గా నిలిచిందో తెలుసుకోండి.
Tata Tiago vs Hyundai Grand i10 Nios: భారత మార్కెట్‌లో తొలి కారును కొనాలనుకునే వారి జాబితాలో ఎక్కువగా కనిపించే హ్యాచ్‌బ్యాక్‌లు Tata Tiago & Hyundai Grand i10 Nios. తక్కువ ధర, మంచి ఫీచర్లు, కుటుంబ అవసరాలకు సరిపోయే పరిమాణంతో ఈ రెండు కార్లు వినియోగదారులను ఆకర్షిస్తున్నాయి. అయితే నగరంలో వేగంగా దూసుకెళ్లే సామర్థ్యం ఏ కారుకు ఎక్కువ? 0-100 కిమీ వేగం, రోలింగ్‌ యాక్సిలరేషన్‌ పరీక్షల్లో ఏ మోడల్‌ మెరుగైన ఫలితాలు సాధించింది? ఇప్పుడు పూర్తి వివరాలు తెలుసుకుందాం.
ఈ పోలికలో రెండు కార్ల పెట్రోల్‌ మాన్యువల్‌ వేరియంట్లను మాత్రమే పరీక్షించారు. Tata Tiagoలో 1.2 లీటర్‌ 3-సిలిండర్‌ నేచురల్లీ ఆస్పిరేటెడ్‌ పెట్రోల్‌ ఇంజిన్‌ను అందించారు. ఇది 86 హెచ్‌పీ శక్తి & 113 ఎన్ఎం టార్క్‌ను ఉత్పత్తి చేస్తుంది. మరోవైపు Hyundai Grand i10 Niosలో 1.2 లీటర్‌ 4-సిలిండర్‌ నేచురల్లీ ఆస్పిరేటెడ్‌ పెట్రోల్‌ ఇంజిన్‌ ఉంది. ఇది 83 హెచ్‌పీ శక్తి & 114 ఎన్ఎం టార్క్‌ను అందిస్తుంది.
కాగితాలపై చూస్తే Tiagoకు 3 హెచ్‌పీ ఎక్కువ శక్తి ఉండగా, Grand i10 Niosకు 1 ఎన్ఎం అదనపు టార్క్‌ ఉంది. రెండు కార్లలోనూ ఫ్రంట్‌ వీల్‌ డ్రైవ్‌ (FWD) వ్యవస్థతో పాటు 5-స్పీడ్ మాన్యువల్‌ గేర్‌బాక్స్‌ను అందించారు. ఇంధన ట్యాంక్‌ సామర్థ్యంలో మాత్రం Grand i10 Nios 37 లీటర్లతో స్వల్ప ఆధిక్యం సాధించింది. Tiagoలో 35 లీటర్ల ట్యాంక్‌ ఉంది.
ఇది కూడా చదవండి: 2026 Maruti Brezza మైలేజ్‌ నంబర్లు ఇవిగో - పెట్రోల్‌, టర్బో, CNG వేరియంట్ల పూర్తి వివరాలు
నిజ జీవిత పరీక్ష
అయితే, వాస్తవ రోడ్డు పరీక్షల్లో పరిస్థితి పూర్తిగా భిన్నంగా కనిపించింది. 0 నుంచి 100 కిలోమీటర్ల వేగాన్ని అందుకోవడానికి Tata Tiagoకు 16.18 సెకన్లు పట్టగా, Hyundai Grand i10 Nios కేవలం 13.28 సెకన్లలోనే అదే వేగాన్ని అందుకుంది. అంటే Tiago కంటే Grand i10 Nios దాదాపు 2.9 సెకన్లు వేగంగా లక్ష్యాన్ని చేరుకుంది. ఇంజిన్‌ మరింత స్మూత్‌గా పనిచేయడం, గేర్‌ మార్పులు సులభంగా ఉండటం, క్లచ్‌ ఆపరేషన్‌ తేలికగా ఉండటం Grand i10 Niosకు ఈ ఆధిక్యాన్ని తీసుకొచ్చిన ప్రధాన కారణాలుగా నిపుణులు పేర్కొంటున్నారు.
రోలింగ్‌ యాక్సిలరేషన్‌ పరీక్షల్లో కూడా Hyundai Grand i10 Niosనే ఆధిపత్యం చాటింది. మూడో గేర్‌లో 20 నుంచి 80 కిలోమీటర్ల వేగాన్ని అందుకోవడానికి Tiagoకు 16.36 సెకన్లు పట్టగా, Grand i10 Nios కేవలం 14 సెకన్లలోనే ఈ పరీక్షను పూర్తి చేసింది. అంటే దాదాపు 2.36 సెకన్ల తేడాతో Nios ముందంజలో నిలిచింది.
నాలుగో గేర్‌లో 40 నుంచి 100 కిలోమీటర్ల వేగం పరీక్షలో కూడా Grand i10 Nios మెరుగైన ఫలితాన్ని నమోదు చేసింది. Tiago ఈ పరీక్షను 23.44 సెకన్లలో పూర్తి చేయగా, Grand i10 Nios 22.44 సెకన్లలోనే లక్ష్యాన్ని చేరుకుంది. అంటే మరోసారి ఒక సెకను తేడాతో Hyundai హ్యాచ్‌బ్యాక్‌ విజయం సాధించింది.
ఇది కూడా చదవండి: ₹50,000 డౌన్ పేమెంట్‌తో టాటా టియాగోను కొనుగోలు చేస్తే నెలవారీ EMI ఎంత ఉంటుంది?
ధరలు
ధరల పరంగా మాత్రం Tata Tiago స్పష్టమైన ఆధిక్యాన్ని కలిగి ఉంది. Tiago ఎక్స్‌షోరూమ్‌ ధర రూ.4.70 లక్షల నుంచి రూ.7.30 లక్షల వరకు ఉండగా, Hyundai Grand i10 Nios ధర రూ.5.60 లక్షల నుంచి రూ.7.52 లక్షల వరకు ఉంది. ఎంట్రీ లెవల్‌ వేరియంట్‌లో Tiago కంటే Grand i10 Nios ధర రూ.90 వేల వరకు ఎక్కువ. టాప్ వేరియంట్‌లో కూడా Grand i10 Nios దాదాపు రూ.22 వేల అధిక ధరను కలిగి ఉంది.
మొత్తంగా చూస్తే పనితీరు, యాక్సిలరేషన్‌, నగర డ్రైవింగ్‌లో చురుకుదనం కోరుకునే వారికి Hyundai Grand i10 Nios మెరుగైన ఎంపికగా నిలుస్తోంది. 0-100 కిమీ వేగం పరీక్షతో పాటు రోలింగ్‌ యాక్సిలరేషన్‌లో కూడా ఇది Tata Tiagoను స్పష్టంగా అధిగమించింది. మరోవైపు తక్కువ బడ్జెట్‌లో మంచి హ్యాచ్‌బ్యాక్‌ను కొనాలనుకునే వారికి Tata Tiago ఇప్పటికీ ఆకర్షణీయమైన ఎంపికగానే ఉంది. అంటే మీ ప్రాధాన్యం వేగం & స్మూత్‌ డ్రైవింగ్‌ అయితే Grand i10 Niosను ఎంచుకోవచ్చు. తక్కువ ధరలో విలువైన కారు కావాలంటే Tata Tiago మంచి ప్రత్యామ్నాయంగా నిలుస్తుంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
