Tata Curvv EV కొంటే రూ. 3.80 లక్షల వరకు డిస్కౌంట్ - Punch, Tiago పైనా ప్రయోజనాలు
ఫిబ్రవరి 2026లో టాటా ఎలక్ట్రిక్ కార్లపై భారీ ఆఫర్లు ప్రకటించింది. Curvv EVపై రూ. 3.80 లక్షల వరకు తగ్గింపు, Punch EV, Nexon EV, Tiago EVలపై కూడా ప్రత్యేకమైన బెనిఫిట్స్ ఉన్నాయి.
Tata EV February 2026 Offers: ఎలక్ట్రిక్ వాహనాలు కొనుగోలు చేయాలనుకునే వారికి టాటా మోటార్స్ భారీ శుభవార్త చెప్పింది. ఈ నెలలో టాటా తన ఎలక్ట్రిక్ కార్ల లైన్అప్పై ప్రత్యేక కొనుగోలు ఆఫర్లను ప్రకటించింది. ముఖ్యమైన విషయం ఏమిటంటే, ఈ ఫిబ్రవరి ఆఫర్లు 2025 మోడల్ ఇయర్ & అలాగే 2026 మోడల్ ఇయర్ వాహనాలకు కూడా వర్తిస్తాయి. అయితే, ఈ ఆఫర్లు Tigor EVకు మాత్రం వర్తించవని కంపెనీ స్పష్టం చేసింది.
సాధారణంగా చూస్తే, 2026 మోడళ్లతో పోలిస్తే 2025 మోడల్ ఇయర్ కార్లపై ఎక్కువ లాభాలు లభిస్తున్నాయి. స్టాక్ క్లియరెన్స్ నేపథ్యంలో టాటా ఈ విధంగా భారీ డిస్కౌంట్లు అందిస్తున్నట్టు తెలుస్తోంది. అయితే నగరం, డీలర్, స్టాక్ లభ్యత ఆధారంగా ఆఫర్లు మారవచ్చు.
Tata Curvv EV - గరిష్ట ఆఫర్లు
టాటా ఎలక్ట్రిక్ కార్లలో ఈ నెలలో అత్యధిక లాభాలు Curvv EVపై ఉన్నాయి. ఫిబ్రవరి 2026లో... 2025 మోడల్ ఇయర్ Curvv EVను కొనుగోలు చేస్తే రూ. 3.80 లక్షల వరకు లాభాలు పొందవచ్చు. అదే 2026 మోడల్ ఇయర్ Curvv EVపై రూ. 3.30 లక్షల వరకు తగ్గింపు అందుబాటులో ఉంది.
టాటా Curvv EV ఎంట్రీ లెవల్ Creative 45 వేరియంట్ ధర రూ. 17.49 లక్షలు (ఎక్స్-షోరూమ్ ధర) నుంచి ప్రారంభమవుతుంది. టాప్ వేరియంట్ Empowered+ A Dark ధర రూ. 22.24 లక్షలు (ఎక్స్-షోరూమ్ ధర)గా ఉంది.
Tata Punch EV - కారు చిన్నదే కానీ ఆఫర్ పెద్దది
టాటా Punch EV ఈ కంపెనీలో అత్యంత అఫోర్డబుల్ ఎలక్ట్రిక్ SUV. దీని ధరలు రూ. 9.99 లక్షలు నుంచి రూ. 14.44 లక్షల (ఎక్స్-షోరూమ్ ధర) వరకు ఉన్నాయి. 2025 మోడల్ ఇయర్ Punch EVపై రూ. 1.60 లక్షల వరకు ప్రయోజనాలు లభిస్తున్నాయి. అయితే, 2026 మోడల్ ఇయర్ Punch EVపై ఈ ఆఫర్లు రూ. 90,000 వరకు మాత్రమే పరిమితమయ్యాయి.
Tata Harrier EV - ప్రీమియం కొనుగోలుదారులకు లాభం
టాటా ఫ్లాగ్షిప్ ఎలక్ట్రిక్ SUV అయిన Harrier EVపై ఫిబ్రవరి 2026లో రూ. 1.50 లక్షల వరకు లాభాలు ఉన్నాయి. ప్రత్యేకత ఏమిటంటే... 2025 & 2026 మోడల్ ఇయర్ Harrier EVలపై ఒకే రకమైన ఆఫర్లు అందుబాటులో ఉన్నాయి. ఇందులో ఇప్పటికే టాటా EV వినియోగదారులకు లాయల్టీ బోనస్ రూ. 1 లక్ష వరకు, ఎక్స్చేంజ్ బోనస్ రూ. 50,000 వరకు ఉన్నాయి. Harrier EV ప్రారంభ ధర రూ. 21.49 లక్షలు, టాప్ వేరియంట్ ధర రూ. 30.23 లక్షలు (ఎక్స్-షోరూమ్ ధర).
Tata Tiago EV - బడ్జెట్లో బెస్ట్ ఛాయిస్
టాటా Tiago EVపై కూడా ఫిబ్రవరి ఆఫర్లు ఆకర్షణీయంగా ఉన్నాయి. 2025 మోడల్ ఇయర్ Tiago EVపై రూ. 1.50 లక్షల వరకు బెనిఫిట్స్ లభిస్తున్నాయి. 2026 మోడల్ ఇయర్ వేరియంట్పై ఈ ఆఫర్లు రూ. 60,000 వరకు మాత్రమే ఉన్నాయి. Tiago EV ధరలు రూ. 7.99 లక్షలు నుంచి రూ. 11.14 లక్షల (ఎక్స్-షోరూమ్ ధర) మధ్య ఉన్నాయి.
Tata Nexon EV - మోస్తరు తగ్గింపులు
టాటా Nexon EVపై ఈ నెలలో మోస్తరు ఆఫర్లు మాత్రమే ఉన్నాయి. 2026 మోడల్ ఇయర్ Nexon EVపై రూ. 30,000 వరకు తగ్గింపు లభిస్తుండగా, 2025 మోడల్ ఇయర్ కార్లపై రూ. 1.20 లక్షల వరకు ఆఫర్స్ ఉన్నాయి. Nexon EV ధరలు వేరియంట్ను బట్టి రూ. 12.49 లక్షలు నుంచి రూ. 17.49 లక్షల (ఎక్స్-షోరూమ్ ధర) వరకు ఉన్నాయి.
ఈ నెలలో టాటా ఎలక్ట్రిక్ కారు కొనాలని భావిస్తున్నవాళ్లకు ఇది మంచి సమయం. ముఖ్యంగా Curvv EVపై ఉన్న భారీ ఆఫర్లు, Punch EV, Tiago EVలపై తగ్గింపులు తెలుగు ప్రజలకు పెద్ద ఆకర్షణగా నిలవనున్నాయి. ఖచ్చితమైన ఆఫర్ల వివరాల కోసం దగ్గరలోని టాటా మోటార్స్ డీలర్ను సంప్రదించడం మంచిది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
