నిస్సాన్‌ గ్రావైట్‌ రివీల్‌ డేట్‌ ఫిక్స్‌: 7 సీటర్‌ MPVల్లో లేటెస్ట్‌ ఆప్షన్‌, రెనాల్ట్‌ ట్రైబర్‌కు కాపీ మోడల్‌

నిస్సాన్‌ గ్రావైట్‌ ఫిబ్రవరి 17న రివీల్‌ కానుంది. ట్రైబర్‌ ఆధారంగా వచ్చే ఈ 7 సీటర్‌ MPVలో ఫీచర్లు, ధర అంచనాలు, ఇంజిన్‌ వివరాలు ఇక్కడ తెలుసుకోండి.

ట్రైబర్‌కు కొత్త ఛాలెంజ్‌

Source : https://x.com/

Show Quick Read

Key points generated by AI, verified by newsroom

Nissan Gravite Launch Date: భారత ఆటో మార్కెట్‌లో తన ఉనికిని మరింత బలోపేతం చేయాలనే లక్ష్యంతో నిస్సాన్‌ కీలక అడుగు వేస్తోంది. 7-సీటర్‌ MPV సెగ్మెంట్‌కు కొత్త నిస్సాన్‌ గ్రావైట్‌ (Nissan Gravite)ను పరిచయం చేయబోతోంది. జనవరిలోనే రివీల్‌ కావాల్సిన ఈ కారు, కొన్ని కారణాల వల్ల ఆ తేదీని తప్పించుకుంది. ఇప్పుడు, అధికారికంగా ఫిబ్రవరి 17, 2026న ప్రపంచానికి పరిచయం కానుంది. ఈ విషయాన్ని నిస్సాన్‌ తన అధికారిక సోషల్‌ మీడియా ఖాతాల ద్వారా ధృవీకరించింది.

ట్రైబర్‌ ఆధారంగా కొత్త MPV

నిస్సాన్‌ గ్రావైట్‌ ఒక కాంపాక్ట్‌ 7 సీటర్‌ MPVగా మార్కెట్‌లోకి రానుంది. ఇది రెనాల్ట్‌ ట్రైబర్‌తో ప్లాట్‌ఫామ్‌, ఇంజిన్‌ పరంగా చాలా సమానంగా ఉంటుంది. బాడ్జ్‌ ఇంజినీరింగ్‌ మోడల్‌ అయినప్పటికీ, డిజైన్‌, బ్రాండ్‌ ఐడెంటిటీ విషయంలో నిస్సాన్‌ తన ప్రత్యేకత చూపించేందుకు సిద్ధమైంది. ఈ సెగ్మెంట్‌లో ట్రైబర్‌కు ఇది నేరుగా పోటీ ఇస్తుంది.

ఎక్స్‌టీరియర్‌ డిజైన్‌లో నిస్సాన్‌ టచ్‌

గ్రావైట్‌ సబ్‌-4 మీటర్‌ పొడవుతో వస్తుంది. సైడ్‌ ప్రొఫైల్‌ చూస్తే ట్రైబర్‌ సిల్యుయెట్‌ గుర్తుకు వచ్చినా, ఫ్రంట్‌ డిజైన్‌లో మాత్రం నిస్సాన్‌ స్టైలింగ్‌ స్పష్టంగా కనిపిస్తుంది. ప్రధాన ఆకర్షణగా V-Motion ఫ్రంట్‌ గ్రిల్‌, స్పోర్టీ లుక్‌ ఉన్న లోయర్‌ బంపర్‌, సిల్వర్‌ హైలైట్స్‌, కార్నర్లలో అమర్చిన ఫాగ్‌ ల్యాంప్స్‌ కనిపిస్తాయి. బోనెట్‌పై బోల్డ్‌గా GRAVITE బ్రాండింగ్‌ ఉండగా, హెడ్‌ల్యాంప్స్‌లో ట్విన్‌ స్ట్రిప్‌ LED DRLs ఇస్తారు.

వెనుక భాగంలో పార్ట్‌-LED టెయిల్‌ ల్యాంప్స్‌, బ్లాక్‌ ప్లాస్టిక్‌తో కూడిన స్పోర్టీ బంపర్‌, సిల్వర్‌ గార్నిష్‌ ఉంటాయి. టాప్‌ వేరియంట్‌లో టూ-టోన్‌ అలాయ్‌ వీల్స్‌, సిల్వర్‌ రూఫ్‌ రైల్స్‌ కూడా ఇచ్చే అవకాశం ఉంది.

ఫీచర్లు & ఇంటీరియర్‌

గ్రావైట్‌ ఫీచర్ల లిస్ట్‌ ట్రైబర్‌కు దగ్గరగానే ఉంటుంది. టాప్‌ ట్రిమ్‌లో 7 ఇంచుల డిజిటల్‌ క్లస్టర్‌, 8 ఇంచుల టచ్‌స్క్రీన్‌, వైర్‌లెస్‌ Apple CarPlay, Android Auto వంటి ఫీచర్లు ఆశించవచ్చు. వైర్‌లెస్‌ ఛార్జింగ్‌, క్రూజ్‌ కంట్రోల్‌, కూల్డ్‌ గ్లోవ్‌బాక్స్‌, టూ-టోన్‌ ఇంటీరియర్‌ థీమ్‌ కూడా ఉండొచ్చు.

ఇది 5+2 సీటింగ్‌ లేఅవుట్‌తో మూడు వరుసల సీట్లలో వస్తుంది. అన్ని వరుసల్లో రియర్‌ AC వెంట్స్‌, మల్టిపుల్‌ ఛార్జింగ్‌ పోర్ట్స్‌, కప్‌ హోల్డర్స్‌, స్టోరేజ్‌ పాకెట్లు ఇవ్వాలని నిస్సాన్‌ ప్లాన్‌ చేస్తోంది.

భద్రతపై ఫోకస్‌

భద్రత విషయంలో కూడా గ్రావైట్‌ బలంగా ఉంటుంది. 6 ఎయిర్‌బ్యాగ్స్‌, ఎలక్ట్రానిక్‌ స్టెబిలిటీ కంట్రోల్‌, హిల్‌ స్టార్ట్‌ అసిస్ట్‌, టైర్‌ ప్రెజర్‌ మానిటరింగ్‌, ISOFIX చైల్డ్‌ సీట్‌ యాంకర్స్‌, ముందు-వెనుక పార్కింగ్‌ సెన్సర్లు, రివర్సింగ్‌ కెమెరా వంటి ఫీచర్లు అందించనున్నారు.

ఇంజిన్‌ & ధర అంచనాలు

గ్రావైట్‌లో రెనాల్ట్‌ ట్రైబర్‌లో ఉన్న అదే 1.0 లీటర్‌ మూడు సిలిండర్‌ పెట్రోల్‌ ఇంజిన్‌ ఉంటుంది. ఇది 72hp శక్తి, 96Nm టార్క్‌ ఉత్పత్తి చేస్తుంది. 5 స్పీడ్‌ మాన్యువల్‌, 5 స్పీడ్‌ AMT గేర్‌బాక్స్‌ ఆప్షన్లు లభించొచ్చు. డీలర్‌ ఫిట్‌ CNG కిట్‌ కూడా ఇవ్వవచ్చని సమాచారం.

ధర విషయానికి వస్తే, నిస్సాన్‌ గ్రావైట్‌ రూ.6 లక్షల నుంచి రూ.9 లక్షల వరకు (ఎక్స్‌-షోరూమ్‌ ధర) ఉండొచ్చని అంచనా.

భవిష్యత్‌ ప్లాన్స్‌

నిస్సాన్‌ 2027 నాటికి భారత మార్కెట్‌లో ఇంకా రెండు కొత్త కార్లు తీసుకురావాలని ప్లాన్‌ చేస్తోంది. అందులో గ్రావైట్‌ కీలక పాత్ర పోషించనుంది.

మొత్తం మీద, కుటుంబ అవసరాలకు సరిపడే బడ్జెట్‌ 7 సీటర్‌ MPV కోసం చూస్తున్న వారికి నిస్సాన్‌ గ్రావైట్‌ ఒక ఆసక్తికరమైన కొత్త ఎంపికగా మారనుంది.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.

మరిన్ని చదవండి

షాకింగ్‌ డెసిషన్‌: ఎలక్ట్రిక్‌ కార్లలో పవర్డ్‌ డోర్‌ హ్యాండిల్స్‌ బ్యాన్‌, ఇక కనిపించవు!