ఇక హైవేపై కంఫర్ట్‌గా డ్రైవ్ చేయండి! తక్కువ ధరలో క్రూయిజ్ కంట్రోల్ ఉన్న 5 కార్లు ఇవే!
హైవే డ్రైవింగ్ కంఫర్ట్ కోసం క్రూయిజ్ కంట్రోల్ కావాలా? రూ.7 లక్షల నుంచి లభించే టాటా, హ్యుందాయ్ కార్ల వివరాలు, హైదరాబాద్ & విజయవాడ ఎక్స్‌-షోరూమ్ ధరలతో తెలుసుకోండి.
Affordable Cars India 2026: మీరు హైవే మీద ఎక్కువగా ప్రయాణం చేస్తారా? ఒకే వేగంతో కారు నడపడం కాస్త అలసటగా అనిపిస్తుందా? అలాంటి సందర్భాల్లో మీకు ఎంతో ఉపయోపడుతుంది "క్రూయిజ్ కంట్రోల్" ఫీచర్. ఒకప్పుడు ఇది రూ.10 లక్షల పైబడిన కార్లలో మాత్రమే కనిపించేది. కానీ ఇప్పుడు పరిస్థితి మారింది. రూ.7 లక్షల లోపే కూడా ఈ సౌకర్యం అందుబాటులో ఉంది.
తెలుగు రాష్ట్రాల ప్రజలను దృష్టిలో పెట్టుకుని, ప్రస్తుతం, క్రూయిజ్ కంట్రోల్ ఫీచర్‌తో తక్కువ ధరలో అందుబాటులో ఉన్న 5 కార్ల వివరాలు మీ కోసం:
5) Tata Tigor
ఎక్స్‌-షోరూమ్ ధర: రూ.7.32 లక్షల నుంచి
మన దేశంలో క్రూయిజ్ కంట్రోల్ అందించే అత్యంత చవక సెడాన్ ఇదే. టాప్ వేరియంట్లు XZ+, XZA+, XZ+ Lux లో ఈ ఫీచర్ ఉంది. 1.2 లీటర్ పెట్రోల్ ఇంజిన్ 86hp శక్తిని ఇస్తుంది. CNG వెర్షన్‌లో 76hp శక్తి అందుతుంది. 5 స్పీడ్ మాన్యువల్ లేదా AMT గేర్‌బాక్స్ ఎంపిక ఉంటుంది. హైదరాబాద్, విజయవాడలో ఆన్‌రోడ్‌ ధరల్లో పెద్దగా వ్యత్యాసం ఉండదు.
4) Tata Altroz
ఎక్స్‌-షోరూమ్ ధర: రూ.7.04 లక్షల నుంచి
ప్రీమియం హ్యాచ్‌బ్యాక్ సెగ్మెంట్‌లో ఉన్న ఈ కారు ఎంట్రీ వేరియంట్ మినహా అన్ని వేరియంట్లలో క్రూయిజ్ కంట్రోల్ అందిస్తుంది. 88hp పెట్రోల్, 90hp డీజిల్, 74hp CNG ఎంపికలు ఉన్నాయి. పెట్రోల్ వెర్షన్‌లో AMT, DCT ఆప్షన్ కూడా అందుబాటులో ఉంటుంది. ఈ లిస్ట్‌లో ఉన్న ఏకైక డీజిల్ ఆప్షన్ ఇది.
3) Tata Punch
ఎక్స్‌-షోరూమ్ ధర: రూ.7 లక్షల నుంచి
SUV తరహాలో ఉండే ఈ మోడల్‌లో Pure+ వేరియంట్ నుంచి క్రూయిజ్ కంట్రోల్ అందుబాటులోకి వస్తుంది. 1.2 లీటర్ నేచురల్లీ ఆస్పిరేటెడ్ ఇంజిన్‌తో పాటు 120hp టర్బో పెట్రోల్ ఎంపిక ఉంది. CNG వెర్షన్ కూడా లభిస్తుంది. ఈ లిస్ట్‌లో అత్యధిక వేరియంట్లలో క్రూయిజ్ కంట్రోల్ ఉన్న మోడల్‌ ఇదే.
2) Hyundai Grand i10 Nios
ఎక్స్‌-షోరూమ్ ధర: రూ.6.84 లక్షల నుంచి
మిడ్ వేరియంట్ Sportz నుంచి క్రూయిజ్ కంట్రోల్ లభిస్తుంది. 83hp 1.2 లీటర్ పెట్రోల్ ఇంజిన్ 5 స్పీడ్ మాన్యువల్ లేదా AMT గేర్‌బాక్స్‌తో వస్తుంది. Sportz AMT వేరియంట్ రూ.7.36 లక్షల ఎక్స్‌-షోరూమ్ ధరతో, ఆటోమేటిక్ గేర్‌బాక్స్‌తో క్రూయిజ్ కంట్రోల్ అందించే అత్యంత చౌకవకైన కారు.
1) Tata Tiago
ఎక్స్‌-షోరూమ్ ధర: రూ.6.77 లక్షల నుంచి
మన దేశం మొత్తంలో, ప్రస్తుతం, క్రూయిజ్ కంట్రోల్ అందించే అత్యంత చవక కారు ఇదే. అయితే ఈ ఫీచర్ టాప్ వేరియంట్ XZ+ లో మాత్రమే లభిస్తుంది. 86hp పెట్రోల్ ఇంజిన్, 5 స్పీడ్ మాన్యువల్ గేర్‌బాక్స్ అందుబాటులో ఉన్నాయి. తక్కువ వేరియంట్లలో AMT, CNG ఎంపికలు కూడా ఉన్నాయి.
హైవే ప్రయాణాల్లో కంఫర్ట్‌గా, స్థిరమైన వేగంతో డ్రైవ్ చేయాలనుకునేవారికి ఇప్పుడు బడ్జెట్‌లోనే మంచి ఆప్షన్లు ఉన్నాయి. ముఖ్యంగా టాటా ఈ సెగ్మెంట్‌లో ఆధిపత్యం చూపిస్తోంది. హైదరాబాద్, విజయవాడ సహా అన్ని తెలుగు నగరాల్లో కూడా ఈ కార్లు సులభంగా అందుబాటులో ఉన్నాయి.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
