S Cross Discontinued: గ్రాండ్ విటారా రాకతో ఆ కారు నిలిపివేత, మారుతి సుజుకి కీలక నిర్ణయం!

మారుతి సుజుకి కీలక నిర్ణయం తీసుకుంది. దేశీయ మార్కెట్లో S-క్రాస్ అమ్మకాలను నిలిపివేసింది. 7 ఏండ్ల పాటు మార్కెట్ లో సత్తా చాటిన ఈ కారు.. గ్రాండ్ విటారా రాకతో తన ప్రస్థానాన్ని ముగించింది.

Photo@CarBikeTrend/twitter

ఆటో దిగ్గజం మారుతి సుజుకి S-క్రాస్‌ తయారీని నిలిపివేసింది. గ్రాండ్ విటారా లాంచ్ తర్వాత, S-క్రాస్‌ కాల్ ఆఫ్‌ ను కంపెనీ అధికారికంగా ధృవీకరించింది. ఈ కారుకు సంబంధించిన వివరాలను  కంపెనీ తన వెబ్‌ సైట్ నుంచి తొలగించింది.

2015లో మారుతి సుజుకి S-క్రాస్ విడుదల

మారుతి S-క్రాస్ 2015లో విడుదల అయ్యింది. Nexa డీలర్‌ షిప్ ద్వారా రిటైల్ చేయబడిన మొట్టమొదటి ప్రీమియం క్రాస్ ఓవర్ గా గుర్తింపు పొందింది. ఈ మోడల్ దేశంలోని మిడ్ రేంజ్ సెగ్మెంట్‌ లో బలంగా నిలబడింది. ఇతర ప్రత్యర్థి కంపెనీల కార్ల నుంచి గట్టి పోటీ ఎదురైనా తట్టుకుని సత్తా చాటింది. ఈ కారు రెండు డీజిల్ వేరియంట్లలో అందుబాటులోకి వచ్చింది. 89hp, 1.3-లీటర్ మల్టీ జెట్ ఇంజిన్,  117 hp, 1.6-లీటర్ టర్బో డీజిల్ ఇంజన్ తో విడుదల అయ్యింది.  

2017లో ఫేస్ లిఫ్ట్ పొందిన S-క్రాస్

ఫస్ట్ జెనెరేషన్ S-క్రాస్ 2017లో ఫేస్‌ లిఫ్ట్ ను పొందింది. ఈ కారులో పలు మార్పుల చేర్పులు చేశారు. ఈ కారు BMW లుక్ తో వచ్చింది. ఫ్రంట్ గ్రిల్, హెడ్‌లైట్ల ఆకారం BMW X1ని పోలి ఉంటాయి. అయినప్పటికీ, 1.6 లీటర్ ఇంజన్ ను నిలిపివేసింది.  1.3-లీటర్ డీజిల్ ఇంజిన్ 'స్మార్ట్ హైబ్రిడ్'గా మారింది. 2015లో ప్రారంభించబడిన S-క్రాస్ దాదాపు 1.69 లక్షల యూనిట్లను అమ్మింది.  భారతీయ ఆటో పరిశ్రమ గణాంకాలను పరిశీలిస్తే ఇది పెద్ద సంఖ్య ఏమీ కాదు. డీజిల్-ఆటోమేటిక్ ట్రాన్స్‌ మిషన్ లేకపోవడం, పెద్ద హ్యాచ్‌ బ్యాక్ వంటి డిజైన్ కూడా దీనికి అంతగా ఫ్యాన్ ఫాలోయింగ్ లేకపోవడానికి కారణంగా చెప్పుకోవచ్చు. అమ్మకాల పరంగా ఎస్​ క్రాస్​కు అంత ఆదరణ రావడం లేదు. ఇతర కంపెనీల నుంచి వస్తున్న పోటీని ఈ మోడల్ కారుతో తట్టుకోలేకపోతుంది.  అందుకే పోటీని తట్టుకునేలా కొత్త కారును మార్కెట్లోకి తీసుకొచ్చింది. ఈ కారణంగానే మారుతి సుజుకి S-క్రాస్ ను నిలిపివేసింది.

Maruti Suzuki S Cross Removed From Official Website: Discontinued? https://t.co/7LgZXQypQi

— amit chhangani (@amitchhangani) October 10, 2022

S-క్రాస్ వారసుడిగా గ్రాండ్​ విటారా

ఇక S-క్రాస్ వారసుడిగా గ్రాండ్​ విటారా మార్కెట్లోకి అడుగు పెట్టింది. ఎక్కువ ఫీచర్లతో వినియోగదారుల ముందుకు వచ్చింది.  ఇందులో ఆలయ్​ వీల్ డ్రైవ్ వేరియంట్, రెండు ఎలక్ట్రిఫైడ్ పెట్రోల్ ఇంజన్ ఆప్షన్లు కూడా ఉన్నాయి. ఒకటి తేలికపాటి హైబ్రిడ్, మరొకటి   బలమైన హైబ్రిడ్ను కలిగి ఉంది. ఈ మిడ్ రేంజ్ తరహా SUV లాంచ్‌తో వినియోగదారులను పెంచుకునే ప్రయత్నం చేస్తున్నది. ఈ కారు మంచి ఫీచర్లతో పాటు స్పోర్ట్ డిజైన్‌ తో మరింత ఆకర్షణీయంగా కనిపిస్తుంది. ఈ కారును  ప్రముఖ కార్ల తయారీ సంస్థ టయోటాతో కలిసి అభివృద్ధి చేసింది.