రూ.10 లక్షల లోపులో బలెనో - రూ.10.75 లక్షల ఆల్ట్రోజ్.. టెక్నాలజీ, ఫీచర్లలో ఏ కారు బెటర్?
మారుతి బలెనో ఆల్ఫా(O), టాటా ఆల్ట్రోజ్ అకాంప్లిష్డ్+S టాప్ వేరియంట్ల ఫీచర్లు, భద్రత, టెక్నాలజీ & ధరల మధ్య పూర్తి పోలిక ఇదే.

Maruti Baleno Top Trim Details In Telugu: హ్యాచ్బ్యాక్ కారు కొనాలనుకునే వారికి మారుతి బలెనో & టాటా ఆల్ట్రోజ్ రూపంలో మంచి ఆప్షన్లు అందుబాటులో ఉన్నాయి. ఈ రెండు కార్లలో టాప్ వేరియంట్లు అధునాతన ఫీచర్లతో వస్తున్నాయి. Maruti Baleno Alpha(O) & Tata Altroz Accomplished+S వేరియంట్లలో అందించే ఫీచర్లను పరిశీలిస్తే కొన్ని అంశాల్లో రెండూ సమానంగా ఉన్నాయి. మరికొన్ని సదుపాయాల్లో మాత్రం తేడాలు కనిపిస్తున్నాయి.
ఇంజిన్
బలెనో ఆల్ఫా(O)లో 1.2 లీటర్ మూడు సిలిండర్ పెట్రోల్ ఇంజిన్ ఉంది. దీనికి 5 స్పీడ్ మాన్యువల్ లేదా 5 స్పీడ్ AMT గేర్బాక్స్ ఎంపికలు ఉన్నాయి. ఆల్ట్రోజ్ అకాంప్లిష్డ్+Sలో 1.2 లీటర్ టర్బో పెట్రోల్ ఇంజిన్ ఉంది. దీనికి 6 స్పీడ్ DCA ఆటోమేటిక్ గేర్బాక్స్ జత చేశారు.
బయటి ఫీచర్లు
రెండు కార్లలోనూ LED ప్రొజెక్టర్ హెడ్ల్యాంపులు, LED DRLలు, LED ఫాగ్ ల్యాంపులు & LED టెయిల్ ల్యాంపులు ఉన్నాయి. 16 అంగుళాల అల్లాయ్ వీల్స్, ఎలక్ట్రికల్గా సర్దుబాటు చేసుకునే ORVMలు, వెనుక వైపర్ & వాషర్ కూడా రెండింటిలో ఉన్నాయి.
ఆల్ట్రోజ్లో ఫ్లష్ ఫిట్టింగ్ డోర్ హ్యాండిల్స్ & డ్యూయల్ టోన్ రూఫ్ ఉన్నాయి. బలెనోలో పుల్ టైప్ డోర్ హ్యాండిల్స్తో పాటు UV కట్ గ్లాస్ లభిస్తుంది.
ఇంటీరియర్
ఆల్ట్రోజ్ పెద్ద స్క్రీన్లతో ముందుంది. ఇందులో 10.25 అంగుళాల ఇన్ఫోటైన్మెంట్ స్క్రీన్ & 10.25 అంగుళాల డిజిటల్ ఇన్స్ట్రుమెంట్ క్లస్టర్ ఉన్నాయి. బలెనోలో 9 అంగుళాల ఇన్ఫోటైన్మెంట్ స్క్రీన్ ఉంటుంది. ఇన్స్ట్రుమెంట్ క్లస్టర్లో అనలాగ్ డయల్స్తో పాటు TFT MID ఉంటుంది.
అయితే, బలెనోలో వెంటిలేటెడ్ ఫ్రంట్ సీట్లు & హెడ్ అప్ డిస్ప్లే ఉన్నాయి. ఆల్ట్రోజ్లో ఇవి లేవు. ఆల్ట్రోజ్లో సన్రూఫ్, వెనుక ఆర్మ్రెస్ట్ & కూల్డ్ గ్లోవ్బాక్స్ ఉన్నాయి. రెండు కార్లలో వైర్లెస్ ఆండ్రాయిడ్ ఆటో, ఆపిల్ కార్ప్లే, ఆటోమేటిక్ క్లైమేట్ కంట్రోల్, వెనుక AC వెంట్స్ & వైర్లెస్ ఛార్జర్ ఉన్నాయి.
ఇది కూడా చదవండి: రూ.3.60 లక్షల స్పాట్ క్యాష్తో Mahindra XUV 7XO మీదే! ఈజీ EMI ప్లాన్ ఎంచుకుంటే చాలు
టెక్నాలజీ విషయానికి వస్తే బలెనోలో అడాప్టివ్ క్రూయిజ్ కంట్రోల్ ఉంది. ఇది లెవల్ 2 ADAS ప్యాకేజీలో భాగం. ఆల్ట్రోజ్లో బ్లైండ్ స్పాట్ మానిటర్, రెయిన్ సెన్సింగ్ వైపర్లు, ఎయిర్ ప్యూరిఫైయర్ & SOS కాలింగ్ వంటి ఫీచర్లు ఉన్నాయి. రెండు కార్లలోనూ 360 డిగ్రీ కెమెరా & వాయిస్ అసిస్టెంట్ ఉన్నాయి.
భద్రత
రెండు కార్లలో ఆరు ఎయిర్బ్యాగులు, TPMS, ఎలక్ట్రానిక్ స్టెబిలిటీ కంట్రోల్, హిల్ హోల్డ్ అసిస్ట్, ABSతో EBD & ISOFIX మౌంట్స్ ఉన్నాయి. బలెనోలో లెవల్ 2 ADAS ప్రత్యేకతగా ఉంది. ఇందులో లేన్ కీప్ అసిస్ట్, లేన్ డిపార్చర్ వార్నింగ్, అడ్వాన్స్డ్ ఎమర్జెన్సీ బ్రేకింగ్, ఫార్వర్డ్ కొలిజన్ వార్నింగ్ & హై బీమ్ అసిస్ట్ వంటి సదుపాయాలు ఉన్నాయి.
ధర
బలెనో ఆల్ఫా(O) ధర రూ.9.50 లక్షల నుంచి రూ.9.99 లక్షల వరకు ఉంది. ఆల్ట్రోజ్ అకాంప్లిష్డ్+S ధర రూ.10.75 లక్షలు. అంటే ఆల్ట్రోజ్ కంటే బలెనో ధర సుమారు రూ.76 వేల నుంచి రూ.1.25 లక్షల వరకు తక్కువగా ఉంటుంది.
ఫీచర్ల పరంగా రెండు కార్లకు ప్రత్యేకతలు ఉన్నాయి. ఆల్ట్రోజ్లో పెద్ద డిస్ప్లేలు, సన్రూఫ్ & కూల్డ్ గ్లోవ్బాక్స్ ఉన్నాయి. బలెనోలో వెంటిలేటెడ్ సీట్లు, హెడ్ అప్ డిస్ప్లే, లెవల్ 2 ADAS & రెండు గేర్బాక్స్ ఎంపికలు ఉన్నాయి. ధర, ఫీచర్లు & ఇంజిన్ ఎంపికలను పరిగణనలోకి తీసుకుని కొనుగోలుదారులు తమ అవసరానికి తగిన వేరియంట్ను ఎంచుకోవచ్చు.
ఇది కూడా చదవండి: ప్రయాణాల్లో మీ కుటుంబం భద్రతకు మహీంద్రా భరోసా! XUV 7XOకు 5 స్టార్ సేఫ్టీ రేటింగ్
ఇంకా ఇలాంటి ఆటోమొబైల్ వార్తలు & అప్డేట్స్ కోసం "ABP దేశం" 'ఆటో' సెక్షన్ని ఫాలో అవ్వండి.
ట్రెండింగ్ వార్తలు





















