ఒక్కసారి ఛార్జ్ చేస్తే 460km దూరం జర్నీ.. 7 ఎయిర్‌బ్యాగ్స్‌తో కియా కొత్త PV7 ఎలక్ట్రిక్ వ్యాన్!
కియా కొత్త PV7 ఎలక్ట్రిక్ వ్యాన్‌ను ఆవిష్కరించింది. 11 సీటర్ సామర్థ్యం, 460 కి.మీ. రేంజ్, 7 ఎయిర్‌బ్యాగ్స్, లెవల్ 2 ఏడీఏఎస్‌తో వస్తోంది.
Kia PV7 Electric Van: ఎలక్ట్రిక్ వాహనాల మార్కెట్‌లో కియా మరో కొత్త మోడల్‌ను తీసుకొస్తోంది. కియా PV7 ఎలక్ట్రిక్ వ్యాన్‌ను అంతర్జాతీయంగా ఆవిష్కరించింది. ఇది ఈ సంస్థ నుంచి వస్తున్న రెండో ఎలక్ట్రిక్ వ్యాన్. ఇప్పటికే PV5ను తీసుకొచ్చిన కియా.. ఇప్పుడు దాని కంటే పెద్దదైన PV7ను పరిచయం చేసింది.
రెండు వెర్షన్లు
PV7ను రెండు ప్రధాన వెర్షన్లలో అందిస్తోంది, అవి: ప్యాసింజర్ వెర్షన్ & కార్గో వెర్షన్. ప్యాసింజర్ వెర్షన్‌లో మార్కెట్‌ను బట్టి 9 మంది లేదా 11 మంది ప్రయాణించే అవకాశం ఉంటుంది. అయితే 11 సీటర్ వెర్షన్‌ను కొరియా మార్కెట్‌కు పరిమితం చేయనుంది. ఇతర మార్కెట్లలో గరిష్ఠంగా 9 సీట్లతో వస్తుంది. టూర్లు, కుటుంబ ప్రయాణాలు, గ్రూప్ ట్రావెల్‌కు పెద్ద వాహనం అవసరమయ్యే వారికి ఈ వ్యాన్ ప్రత్యేకంగా ఉపయోగపడే అవకాశం ఉంది.
కార్గో వెర్షన్‌ను వ్యాపార అవసరాలకు అనుగుణంగా రూపొందించారు. ఇందులో గరిష్ఠంగా 1,200 కిలోల వరకు సరుకును తరలించవచ్చు.
PV7లో రెండు బ్యాటరీ ఆప్షన్లు ఉన్నాయి. 71.5 కిలోవాట్ అవర్ (71.5kWh) & 96.2 కిలోవాట్ అవర్ (96.2kWh) బ్యాటరీలను అందిస్తున్నారు. వీటికి ముందు చక్రాలను నడిపించే (FWD) ఎలక్ట్రిక్ మోటార్‌ను జత చేశారు. ఈ మోటార్ 268 హెచ్‌పీ శక్తిని, 400 ఎన్ఎం టార్క్‌ను ఉత్పత్తి చేస్తుంది.
460km రేంజ్
పెద్ద బ్యాటరీని (96.2kWh) ఒక్కసారి ఛార్జ్ చేస్తే 460 కిలోమీటర్ల వరకు ప్రయాణించవచ్చని కియా చెబుతోంది. ఇది WLTP ప్రమాణాల ప్రకారం వెల్లడించిన రేంజ్. 350kW DC ఫాస్ట్ ఛార్జర్‌తో 10 నుంచి 80 శాతం వరకు ఛార్జ్ చేసేందుకు 25-30 నిమిషాల సమయం పడుతుందని కంపెనీ తెలిపింది.
ఈ వ్యాన్‌లో 800 వోల్ట్ (800V) ఎలక్ట్రిక్ ఆర్కిటెక్చర్‌ను ఉపయోగించారు. ముందు భాగంలో AC/DC ఛార్జింగ్ పోర్టులు ఉన్నాయి. అదనంగా వెనుక వైపు AC ఛార్జింగ్ పోర్టును కూడా ఎంపికగా అందిస్తున్నారు. భవిష్యత్తులో ఆల్ వీల్ డ్రైవ్ వెర్షన్‌ను (AWD) కూడా తీసుకురానున్నారు.
డిజైన్ పరంగా PV7లో PV5 పోలికలు కనిపిస్తాయి. అయితే, PV7 మరింత పొడవుగా ఉంటుంది. ముందు భాగంలో C ఆకారంలో LED DRLs, సన్నని LED హెడ్‌ల్యాంప్స్ ఉన్నాయి. నలుపు రంగు ట్రిమ్‌తో ముందు భాగానికి ప్రత్యేక రూపం ఇచ్చారు.
రెండు వెర్షన్లలోనూ పవర్‌తో పనిచేసే స్లైడింగ్ డోర్లు ఉంటాయి. కార్గో వెర్షన్‌లో మాన్యువల్ స్లైడింగ్ డోర్లను కూడా ఎంచుకోవచ్చు. ప్యాసింజర్ వెర్షన్‌లో పెద్ద గాజు ప్రాంతం ఉంటుంది. వెనుక భాగంలో సన్నని టెయిల్ ల్యాంప్స్ ఉన్నాయి.
ఇది కూడా చదవండి: బ్రేక్ వేయడం నుంచి లేన్ మార్చే వరకు.. కారులో ADAS ఉంటే భద్రత మరింత పెరుగుతుందా?
PV7 పొడవు 5,350 మిల్లీమీటర్లు. వెడల్పు 1,995 మిల్లీమీటర్లు. ఎత్తు 1,990 మిల్లీమీటర్లు. వీల్‌బేస్ 3,500 మిల్లీమీటర్లు. పరిమాణంలో ఇది కియా కార్నివాల్ కంటే పెద్దదిగా ఉంటుంది.
లోపల కూడా ఆధునిక ఫీచర్లు ఉన్నాయి. 14.6 అంగుళాల ఇన్ఫోటైన్‌మెంట్ స్క్రీన్ ఉంటుంది. ఇది ఆండ్రాయిడ్ ఆటోమోటివ్ ఓఎస్ ఆధారంగా పనిచేసే ప్లియోస్ కనెక్ట్ వ్యవస్థను పొందుతుంది. డిజిటల్ డ్రైవర్ డిస్‌ప్లే కూడా ఉంటుంది.
7-సీటర్ వేరియంట్
ప్యాసింజర్ వెర్షన్‌లో ఏడు సీట్ల వేరియంట్ కూడా ఉంటుంది. ఇందులో కొన్ని సీట్లను తొలగించి లగేజీకి అదనపు స్థలం కల్పించవచ్చు. ముందు వరుస మినహా మిగతా వరుసలకు రూఫ్ మౌంటెడ్ ఏసీ వెంట్స్ ఉన్నాయి. 100 వాట్ల USB టైప్ C ఛార్జింగ్ పోర్టులు కూడా ఉంటాయి.
భద్రత విషయంలోనూ PV7పై కియా ప్రత్యేక దృష్టి పెట్టింది. ఇందులో ఏడు ఎయిర్‌బ్యాగ్స్ ఉన్నాయి. రూఫ్‌లో కో డ్రైవర్ ఎయిర్‌బ్యాగ్‌ను కూడా ఏర్పాటు చేశారు. లెవల్ 2 ADAS సదుపాయం ఉంటుంది. ఇది డ్రైవర్‌కు వివిధ సందర్భాల్లో సహాయం చేస్తుంది.
కియా PV7ను కొరియా & యూరప్ మార్కెట్లలో 2027 ద్వితీయార్థంలో విడుదల చేయనుంది. తర్వాత ఇతర మార్కెట్లకు విస్తరించే అవకాశం ఉంది. అయితే భారత్‌లో ఈ ఎలక్ట్రిక్ వ్యాన్ విడుదలయ్యే అవకాశాలు ప్రస్తుతం తక్కువగా ఉన్నట్లు సమాచారం.
ఇది కూడా చదవండి: OTT లాగే కొత్త కార్లనీ సబ్‌స్క్రైబ్‌ చేసుకోవచ్చు, కొనకుండానే దర్జాగా తిరగొచ్చు, బోర్‌ కొడితే మార్చేయొచ్చు
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
