Hyundai Bluelink Insurance: హ్యుందాయ్ బ్లూలింక్‌ కస్టమర్లకు బీమా బెనిఫిట్స్... డ్రైవింగ్ స్కోర్ ఆధారంగా అదనపు ప్రయోజనాలు
హ్యుందాయ్ కంపెనీ, బ్లూలింక్‌ కనెక్టెడ్ కార్ల కస్టమర్ల కోసం యూసేజ్‌-బేస్డ్‌ ఇన్సూరెన్స్ ప్రోగ్రామ్‌ను ప్రారంభించింది. ఇన్సూరెన్స్ రెన్యూవల్ సమయంలో అదనపు ప్రయోజనాలు పొందే అవకాశం ఉంది.
Hyundai Usage Based Insurance: హ్యుందాయ్ ఇండియా, తన Bluelink కనెక్టెడ్ కార్ల కస్టమర్ల కోసం కొత్త 'యూసేజ్‌-బేస్డ్‌ ఇన్సూరెన్స్' (UBI) ప్రోగ్రామ్‌ను ప్రవేశపెట్టింది. ఈ కార్యక్రమం ద్వారా.. కస్టమర్ల డ్రైవింగ్ అలవాట్ల ఆధారంగా, ఇన్సూరెన్స్ రెన్యూవల్ సమయంలో అదనపు ప్రయోజనాలు పొందే అవకాశం ఉంటుంది. ఈ ప్రోగ్రామ్‌లో భాగంగా.. Bluelink ప్లాట్‌ఫామ్ సేకరించే వాహన డేటాను ఉపయోగించి ప్రతి కస్టమర్‌కు వ్యక్తిగత డ్రైవింగ్ స్కోర్ కేటాయిస్తారు. ఈ స్కోర్‌ను ఇన్సూరెన్స్ పాలసీ రెన్యూవల్ సమయంలో పాల్గొనే బీమా సంస్థలు పరిగణనలోకి తీసుకుంటాయి.
ఈ కార్యక్రమం హ్యుందాయ్ మోడల్ పోర్ట్‌ఫోలియో అంతటా అందుబాటులో ఉంటుంది. అయితే, కస్టమర్లు నిర్దేశించిన అర్హత ప్రమాణాలను అందుకోవాలి. అలాగే, ఇన్సూరెన్స్ రెన్యూవల్ సమయాన్ని బట్టి ఈ ప్రయోజనాలు వర్తిస్తాయి.
హ్యుందాయ్ ఇండియా ఇన్సూరెన్స్ బ్రోకింగ్‌ (HIIB) ఈ కార్యక్రమంలో మధ్యవర్తిగా వ్యవహరిస్తుంది. కస్టమర్ల అనుమతితో, వారి డ్రైవింగ్ స్కోర్లను పాల్గొనే బీమా సంస్థలకు అందిస్తుంది. మొదటి దశలో.. చోళమండలం ఎంఎస్ జనరల్ ఇన్సూరెన్స్, గో డిజిట్ జనరల్ ఇన్సూరెన్స్ & ఐసిఐసిఐ లోంబార్డ్ జనరల్ ఇన్సూరెన్స్ సంస్థలు ఇందులో భాగస్వాములుగా ఉన్నాయి.
డ్రైవింగ్ స్కోర్ ఎలా లెక్కిస్తారు?
Bluelink ద్వారా గత మూడు నెలల్లో నమోదైన డ్రైవింగ్ ప్రవర్తన ఆధారంగా UBI స్కోర్‌ను లెక్కిస్తారు. రాబోయే 90 రోజుల్లో ఇన్సూరెన్స్ పాలసీ రెన్యూవల్ కావాల్సిన కస్టమర్లు తమ స్కోర్‌ను చూసుకోవచ్చు. అలాగే, ఈ ప్రోగ్రామ్ ద్వారా అదనపు ప్రయోజనాలు పొందేందుకు అర్హత ఉందో లేదో తెలుసుకోవచ్చు.
ఇది కూడా చదవండి: ఇండియన్ మార్కెట్లోకి 3 ఇటాల్‌జెట్‌ స్కూటర్లు.. బ్రెంబో బ్రేక్స్, ట్విన్ సిలిండర్ ఇంజిన్లతో రంగప్రవేశం!
డ్రైవింగ్ స్కోర్‌ను లెక్కించేటప్పుడు కొన్ని అంశాలను పరిశీలిస్తారు. వేగంగా యాక్సిలరేషన్ ఇవ్వడం, వేగంగా వేగం తగ్గించడం, అకస్మాత్తుగా బ్రేకులు వేయడం, వేగ నియంత్రణ, ఇంజిన్ ఐడ్లింగ్ వంటి అంశాలు ఇందులో ఉంటాయి. ఈ డేటా నేరుగా కారు నుంచే సేకరిస్తారు. కాబట్టి, కస్టమర్లు ప్రత్యేకంగా ఎలాంటి అదనపు పరికరాలు లేదా హార్డ్‌వేర్‌ను కారులో ఏర్పాటు చేసుకోవాల్సిన అవసరం లేదు.
Bluelink యాప్‌లోనే స్కోర్ వివరాలు
కస్టమర్లు తమ డ్రైవింగ్ స్కోర్‌ను Bluelink యాప్‌లో చూడవచ్చు. అలాగే, ఈ ప్రోగ్రామ్‌కు తమ అర్హతను కూడా ట్రాక్ చేయవచ్చు. తమ అనుమతితో యాప్ ద్వారానే డ్రైవింగ్ స్కోర్‌ను భాగస్వామ్య బీమా సంస్థలతో పంచుకునే అవకాశం ఉంటుంది. ఆ తర్వాత, బీమా సంస్థలు ఈ స్కోర్‌ను తమ అండర్‌రైటింగ్ ప్రక్రియలో ఒక అంశంగా పరిగణిస్తాయి. దాని ఆధారంగా పాలసీకి వర్తించే అదనపు ప్రయోజనాలను నిర్ణయిస్తాయి.
70 లేదా అంతకంటే ఎక్కువ స్కోర్ ఉంటే బెనిఫిట్స్
UBI స్కోర్ 70 లేదా అంతకంటే ఎక్కువ ఉన్న కస్టమర్లు ఇన్సూరెన్స్ రెన్యూవల్ సమయంలో అదనపు ప్రయోజనాలకు అర్హత పొందే అవకాశం ఉంది. అయితే, ఎంత ప్రయోజనం లభిస్తుంది అనేది పూర్తిగా సంబంధిత బీమా సంస్థ అండర్‌రైటింగ్ విధానం, నిబంధనలు & షరతులపై ఆధారపడి ఉంటుంది.
ఇది కూడా చదవండి: ఆఫ్‌రోడింగ్‌ ఎస్‌యూవీల కోసం భారీగా ఖర్చు పెట్టే పనే లేదు! రూ.12.59 లక్షల నుంచే 5 సూపర్‌ మోడళ్లు!
70 కంటే తక్కువ స్కోర్ వచ్చిన కస్టమర్లు కూడా నిరాశ చెందాల్సిన అవసరం లేదు. తమ డ్రైవింగ్ అలవాట్లను మెరుగుపరుచుకోవడానికి Bluelink యాప్ ద్వారా వ్యక్తిగత డ్రైవింగ్ సూచనలు పొందవచ్చు. వాటిని పాటించడం ద్వారా భవిష్యత్తులో మెరుగైన స్కోర్ సాధించి, అదనపు ఇన్సూరెన్స్ ప్రయోజనాలకు అర్హత పొందే అవకాశం ఉంటుంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
