YS Sharmila: పెద్ద కోటల్లో జగన్, ఎన్నికల కోసమే బయటికి - ఆయన మనకి అవసరమా: షర్మిల

AP Elections 2024: శ్రీసత్యసాయి జిల్లా మడకశిర నియోజక వర్గంలో వైఎస్ షర్మిల బహిరంగ సభ నిర్వహించారు. జగన్ పెద్ద పెద్ద కోటలు కట్టుకొని ఉంటున్నారని షర్మిల విమర్శించారు.

వైఎస్ షర్మిల

YS Sharmila in Madakasira: ఎన్నికలు ఉన్నాయని జగన్ సిద్ధం అంటూ బయటకు వస్తున్నారని... పెద్ద పెద్ద కోటలు కట్టుకొని ఉంటున్నారని వైఎస్ షర్మిల విమర్శించారు. ప్రజల సమస్యలు ఏనాడైనా విన్నారా? అని ప్రశ్నించారు. హంద్రీనీవా ప్రాజెక్టు  వైఎస్ఆర్ హయంలో 90 శాతం పూర్తి అయిందని వైఎస్ షర్మిల అన్నారు. 2019 ఎన్నికల సమయంలో చంద్రబాబు కట్టలేదని జగన్ ఎద్దేవా చేసిన విషయాన్ని గుర్తు చేశారు. అధికారంలో వస్తే ప్రాజెక్ట్ పూర్తి చేసి 127 చెరువులకు నీళ్ళు ఇస్తానని జగన్ చెప్పిన విషయాన్ని ప్రస్తావించారు. దాని ద్వారా లక్షల ఎకరాలకు సాగునీరు ఇస్తామన్నారని.. అధికారంలో వచ్చాక ప్రాజెక్ట్ పట్టించుకునేవారే లేరని అన్నారు. శ్రీసత్యసాయి జిల్లా మడకశిర నియోజక వర్గంలో వైఎస్ షర్మిల బహిరంగ సభ నిర్వహించారు.

‘‘ఇండస్ట్రియల్ కారిడార్ అన్నాడు. ఒక్క పరిశ్రమ రాలేదు. రఘువీరా హయాంలో భూ సేకరణ జరిగింది. భూములు ఉన్నా పరిశ్రమలు రాలేదు. లేదర్ పార్క్ అన్నాడు. మరిచారు. మడక శిర నియోజక వర్గం చుట్టూ రింగ్ రోడ్ అన్నారు...మరిచారు. గత 10 ఏళ్లుగా ఈ నియోజక వర్గాన్ని TDP, YCP మోసం చేసింది. ప్రత్యేక హోదా మన రాష్ట్రానికి సంజీవని. హోదా వచ్చి ఉంటే వేల సంఖ్యలో పరిశ్రమలు వచ్చేవి. హోదా విషయంలో బీజేపీ మోసం చేసింది. అయినా బీజేపీ తో బాబు, జగన్ పోటీలు పడి పొత్తులు పెట్టుకుంటున్నారు. 

బాబు పొత్తు.. జగన్ తొత్తు
పొత్తులు, తొత్తులకు ఓటు వేయడం అవసరమా? బీజేపీకి గులాం గిరీ చేస్తున్నారు. బీజేపీకి బానిసలుగా మారారు. రాష్ట్ర ప్రయోజనాలు తాకట్టు పెట్టారు. ఒక్క సీటు లేని బీజేపీ రాష్ట్రంలో రాజ్యం ఏలుతుంది. బాబుకి ఓటు వేసినా బీజేపీకి వేసినట్లే. జగన్ కి ఓటు వేసినా బీజేపీ ఓటు వేసినట్లే. రాష్ట్ర ప్రయోజనాలు తాకట్టు పెట్టిన బీజేపీ, బాబు, జగన్ లు ఈ రాష్ట్రానికి అవసరమా? హోదా ఇవ్వని, మోసం చేసిన ఈ పార్టీలు మనకు అవసరమా? ప్రత్యేక హోదా ఇచ్చేది కాంగ్రెస్ మాత్రమే. హోదా 10 ఇస్తామని AICC మ్యానిఫెస్టోలో పెట్టింది.

రాష్ట్రంలో అధికారంలో వస్తే మొదటి సంతకం భారీగా ఉద్యోగాల కల్పన మీదే ఉంటుంది. 2.25 లక్షల ఉద్యోగాల భర్తీ మీదనే తొలి సంతకం. ప్రతి మహిళ పేరు మీద 5 లక్షలతో పక్కా ఇండ్లు కట్టిస్తం. ఏడాదికి పెద్ద మహిళకు లక్ష రూపాయల ఆర్థిక సహాయం చేస్తాం. వృద్దులకు 4 వేలు, వికలాంగులకు 6 వేలు పెన్షన్ ఇస్తాం. గత 10 ఏళ్లు బాబు, జగన్ పాలన చూశారు. కాంగ్రెస్ కి అవకాశం ఇవ్వండి. YSR పాలన మళ్ళీ తీసుకువద్దాం. మీరు పిలిస్తే పలికే వాళ్లకు ఓటు వేయాలి.

ఎన్నికలు ఉన్నాయని జగన్ సిద్ధం అంటూ బయటకు వస్తున్నారు. పెద్ద పెద్ద కోటలు కట్టుకొని ఉంటున్నారు. ప్రజల సమస్యలు ఏనాడైనా విన్నారా? వైఎస్ఆర్ హయాంలో ప్రజా దర్బార్ ఉండేది. వారసుడు పాలనలో ఎక్కడ పోయింది దర్బార్? మడకశిర ఎమ్మెల్యేగా సుధాకర్ ను గెలిపించాలని, ఎంపీ గా సమద్ షాహిన్ ను గెలిపించాలని కోరుతున్నా’’ అని వైఎస్ షర్మిల అన్నారు.