Nara Lokesh Speech Tribal University Convocation: ప్రజల జీవితాల్లో మార్పు తీసుకురావడమే అసలైన విద్య - ఘనంగా కేంద్రీయ గిరిజన వర్సిటీ మొదటి స్నాతకోత్సవం
President Droupadi Murmu Visakhapatnam: గిరిజన యూనివర్శిటీ మొదటి స్నాతకోత్సవం విశాఖలో జరిగింది. రాష్ట్రపతి ముర్ము ముఖ్య అతిధిగా హాజరయ్యారు.
Central Tribal University of AP 1st Convocation: విశాఖపట్నంలో జరిగిన ఆంధ్రప్రదేశ్ కేంద్రీయ గిరిజన విశ్వవిద్యాలయం తొలి స్నాతకోత్సవ వేడుకలు ఘనంగా జరిగాయి. విశాఖ నోవాటెల్ హోటల్లో నిర్వహించిన ఈ ప్రతిష్టాత్మక కార్యక్రమానికి భారత రాష్ట్రపతి ద్రౌపది ముర్ము ముఖ్య అతిథిగా హాజరై విద్యార్థులకు బంగారు పతకాలను అందజేశారు. ఈ వేడుకలో రాష్ట్ర విద్య, ఐటీ శాఖల మంత్రి నారా లోకేష్ పాల్గొని ప్రసంగించారు. కేవలం డిగ్రీలు అందుకోవడం మాత్రమే విద్య కాదని, ప్రజల జీవితాల్లో సానుకూల మార్పు తీసుకురావడమే అసలైన విద్య అని ఆయన స్పష్టం చేశారు. సమాజంలోని ప్రతి వర్గానికి, ముఖ్యంగా వెనుకబడిన ప్రాంతాలలోని ప్రతి ఒక్కరికీ నాణ్యమైన విద్య అందినప్పుడే ప్రధానమంత్రి నరేంద్ర మోదీ ఆకాంక్షించిన ‘వికసిత్ భారత్’ కల సాకారమవుతుందని లోకేష్ పేర్కొన్నారు.
స్వయంకృషితో ఎదిగిన రాష్ట్రపతి జీవితం.. విద్యార్థులకు నిలువెత్తు స్ఫూర్తి!
గిరిజన విశ్వవిద్యాలయం తొలి స్నాతకోత్సవానికి రాష్ట్రపతి ద్రౌపది ముర్ము కంటే సరైన ముఖ్య అతిథి మరొకరు ఉండరని మంత్రి లోకేష్ కొనియాడారు. ఒడిశాలోని ఒక చిన్న గిరిజన గ్రామంలో జన్మించి, ఎన్నో ప్రతికూల పరిస్థితులను అధిగమించి, ఆ గ్రామం నుండి డిగ్రీ పూర్తి చేసిన తొలి మహిళగా ఆమె నిలిచారని గుర్తుచేశారు. రాయరంగ్పూర్లో ఒక ఉపాధ్యాయురాలిగా ప్రస్థానం ప్రారంభించి.. కౌన్సిలర్, ఎమ్మెల్యే, రాష్ట్ర మంత్రి, గవర్నర్గా ప్రజాసేవలో ఒక్కో మెట్టు ఎక్కుతూ దేశ అత్యున్నత పదవిని అధిరోహించిన ముర్ము గారి జీవితం స్వయంకృషికి నిదర్శనమన్నారు. 2009 నుండి 2014 మధ్య కాలంలో భర్త, ఇద్దరు కుమారులు, తల్లి, సోదరుడిని కోల్పోయినా.. ఆ అపార వ్యక్తిగత విషాదాన్ని తట్టుకుని, ఆధ్యాత్మిక బలంతో తిరిగి ప్రజాసేవకే తన జీవితాన్ని అంకితం చేసిన ఆమె సంకల్పం నేటి యువతకు గొప్ప సందేశమని లోకేష్ అన్నారు.
ఏఐ యుగంలోనూ మానవీయ విలువలే ముఖ్యం
ప్రస్తుత ఆధునిక సాంకేతిక యుగంలో మనం జీవిస్తున్నామని, ఆర్టిఫిషియల్ ఇంటెలిజెన్స్ ఎలాంటి ప్రశ్నకైనా సమాధానాలు ఇవ్వగలదని లోకేష్ వ్యాఖ్యానించారు. అయితే, ఏఐ సాంకేతికత మానవీయ విలువలను, కరుణను, మనిషి వ్యక్తిత్వాన్ని ఎన్నటికీ భర్తీ చేయలేదని ఆయన స్పష్టం చేశారు. ఇటువంటి ఉన్నతమైన విలువలు గొప్ప విశ్వవిద్యాలయాల్లోనే అలవడతాయని తెలిపారు. రేపు సమాజంలోకి అడుగుపెట్టిన తర్వాత విద్యార్థుల విజయానికి ప్రామాణికం వారు సంపాదించిన డబ్బు మాత్రమే కాదని, వారి వల్ల సమాజంలో ఎంతమంది జీవితాలు మారాయనేదే ముఖ్యమని హితవు పలికారు. విద్యార్థులు తమ జ్ఞానాన్ని ఆత్మవిశ్వాసంతో, తమ మూలాలను గర్వంతో, విలువలను వినయంతో ముందుకు తీసుకెళ్లాలని ఆకాంక్షించారు.
ఏపీ ఉన్నత విద్యలో సమూల మార్పులు.. భవిష్యత్ నాయకుల తయారే లక్ష్యం!
ముఖ్యమంత్రి నారా చంద్రబాబు నాయుడు నాయకత్వంలో ఆంధ్రప్రదేశ్ ఉన్నత విద్యా రంగంలో కూటమి ప్రభుత్వం సమూల మార్పులు తీసుకువస్తోందని మంత్రి లోకేష్ వెల్లడించారు. కేవలం ఉద్యోగాలు చేసే నిపుణులనే కాకుండా, భవిష్యత్ దేశాన్ని నడిపించే నాయకులను తీర్చిదిద్దడమే తమ ప్రభుత్వ లక్ష్యమన్నారు. పరిశ్రమల అవసరాలకు అనుగుణంగా సరికొత్త నైపుణ్యాలు , పరిశోధనలు, ఆవిష్కరణలకు కేంద్రాలుగా భవిష్యత్ విశ్వవిద్యాలయాలను నిర్మిస్తున్నట్లు పేర్కొన్నారు. ప్రపంచవ్యాప్తంగా ఉన్న అత్యుత్తమ ప్రతిభతో పోటీ పడగలమనే గట్టి ఆత్మవిశ్వాసాన్ని ఏపీ యువతలో నింపడమే తమ అంతిమ ధ్యేయమని లోకేష్ వివరించారు.
ఘనంగా స్నాతకోత్సవం.. హాజరైన ప్రముఖులు
కేంద్ర విద్యాశాఖ మంత్రి ధర్మేంద్ర ప్రధాన్, ఆంధ్రప్రదేశ్ గవర్నర్ జస్టిస్ అబ్దుల్ నజీర్ కూడా ఈ ప్రతిష్టాత్మక స్నాతకోత్సవంలో పాల్గొని విద్యార్థులను అభినందించారు. దేశ యువతకు ఉన్నత విద్యా రంగంలో మరిన్ని అవకాశాలు కల్పిస్తున్న కేంద్రమంత్రి ధర్మేంద్ర ప్రధాన్కు లోకేష్ ఈ సందర్భంగా కృతజ్ఞతలు తెలిపారు.
టాప్ హెడ్ లైన్స్
ట్రెండింగ్ వార్తలు
