CM Jagan Review : ప్రతీ పాఠశాలలో టీవీ కంపల్సరీ, నాడు-నేడు రెండో దశ పనులపై సీఎం జగన్ ఆరా!
CM Jagan Review : పదో తరగతి పరీక్షల ఫలితాల్లో ఉత్తీర్ణత శాతం తక్కువ రావడంపై తప్పుగా భావించనక్కర్లేదని సీఎం జగన్ అన్నారు. నాణ్యమైన విద్య అందించడమే లక్ష్యమన్నారు.
CM Jagan Review : నాడు-నేడు రెండో దశ పనులు వేగవంతం చేయాలని సీఎం జగన్ అధికారులను ఆదేశించారు. విద్యా శాఖపై క్యాంప్ కార్యాలయంలో సీఎం వైయస్ జగన్ సమీక్ష నిర్వహించారు. నాడు–నేడు పనుల ప్రగతితో పాటు విద్యాశాఖలో చేపడుతున్న పలు కార్యక్రమాలకు సంబంధించిన వివరాలను అధికారులు సీఎంకు వివరించారు. స్కూల్స్లో నాడు–నేడు కింద చేపడుతున్న పనుల ప్రగతిపై సీఎం సమీక్షించారు. నాడు–నేడు పనులు వేగవంతం చేయాలని ఆదేశించారు. నిర్దేశించుకున్న లక్ష్యం లోగా పనులు పూర్తి కావాలన్నారు. రెండో దశ నాడు–నేడులో భాగంగా సుమారు 22,344 స్కూల్స్లో అభివృద్ధి పనులు చేస్తు్న్నామని అధికారులు సీఎంకు వివరించారు. ఈ నెలాఖరు నాటికి రెండో దశ కింద అన్ని స్కూల్స్లో పనులు మొదలు కావాలని సీఎం ఆదేశించారు. మౌలిక సదుపాయాల కల్పనలో భాగంగా ప్రతి పాఠశాలలో టీవీలు ఉండేటట్టు చూసుకోవాలన్నారు. బోధన, మౌలిక సదుపాయాల కల్పనలో ప్రైవేటు పాఠశాలలకు ధీటుగా పోటీపడుతున్నామన్నారు. నాడు–నేడు పేరుతో సమూల మార్పులు చేపడుతున్న తరుణంలో టీవీ కూడా ఏర్పాటు చేయాలన్నారు. నాడు నేడు చేపట్టిన స్కూళ్లలో వాచ్మెన్ నియామకంపై ఆలోచన చేస్తున్నామన్నారు. తద్వారా పాఠశాలలో విలువైన ఆస్తులకు రక్షణ కల్పించగలుగుతామన్నారు.
పాఠశాలల నిర్వహణపై శ్రద్ధ
సీబీఎస్ఈ అఫిలియేషన్ పొందిన స్కూళ్లపై సీఎం జగన్ సమీక్ష నిర్వహించారు. సీబీఎస్ఈ గుర్తింపు పొందిన స్కూళ్లలోని ఉపాధ్యాయులకు ఉత్తమ శిక్షణ అందించాలన్నారు. వీరికి మంచి శిక్షణ అందించడం ద్వారా మంచి ఫలితాలు పొందవచ్చన్నారు. స్కూళ్లలో వేలాది కోట్ల రూపాయలు ఖర్చు పెట్టి నాడు–నేడు చేపట్టిన తర్వాత వాటి నిర్వహణపై ప్రత్యేక దృష్టి పెట్టాలన్నారు. నిర్వహణ సక్రమంగా చేయకపోతే మరలా మామూలు స్థితికి వస్తాయన్నారు. కాబట్టి స్కూళ్లు, టాయిలెట్లు నిర్వహణపై ప్రత్యేక శ్రద్ద తీసుకోవాలని ఆదేశించారు.
పోటీ ప్రపంచంలో తట్టుకుని నిలబడగలగాలి
విద్యా కానుక పై సమీక్షించిన సీఎం జగన్.. స్కూళ్లు ప్రారంభమయ్యే నాటికి విద్యా కానుక అందించాలన్నారు. ఈ మేరకు సన్నద్దంగా ఉండాలని అధికారులను సీఎం ఆదేశించారు. విద్యా కానుక మెటిరియల్ ఇప్పటికే సిద్ధంగా ఉందని అధికారులు తెలిపారు. బాలికలకు ప్రత్యేకంగా మండలానికి ఒక జూనియర్ కాలేజీ లేదా హైస్కూల్ ప్లస్ లేదా కేజీబీవీ వచ్చే విధంగా ఏర్పాటు చేస్తున్నామని సీఎం తెలిపారు. ఇందులో భాగంగా బాలికల కోసం 292 మండలాల్లో ఒక హైస్కూల్ను జూనియర్ కాలేజీ లేదా హైస్కూల్ ప్లస్గా అప్గ్రేడ్ చేస్తున్నామన్నారు. సమీక్షాసమావేశంలో రీడ్ ఎలాంగ్ యాప్ పనితీరుని అధికారులు వివరించారు. ఇప్పటి వరకు సుమారు 57,828 మంది రోజూ ఆ యాప్ని వినియోగిస్తున్నారని తెలిపారు. ఫొనిటిక్స్ మీద ప్రధానంగా దృష్టి పెట్టామన్నారు. పిల్లలు పోటీ ప్రపంచంలో తట్టుకుని నిలబడగలగాలని సీఎం జగన్ అన్నారు. పదో తరగతి పరీక్షల ఫలితాల్లో తక్కువ ఉత్తీర్ణత శాతం తక్కువ రావడంపై తప్పుగా భావించనక్కరలేదన్నారు. నాణ్యమైన విద్య అందించడమే లక్ష్యమని సీఎం జగన్ అన్నారు. పదోతరగతి పరీక్షల్లో ఫెయిల్ అయిన వారికి నెలలోజుల్లోనే మరలా పరీక్షలు పెడుతూ వాటిని కూడా రెగ్యులర్గానే పరిగణిస్తామన్నారు. పదోతరగతిలో పాస్ అయిన వారికి కూడా ఏదైనా రెండు సబ్జెక్టులలో బెటర్మెంట్ రాసుకోవడానికి అనుమతి ఇస్తున్నామన్న విద్యాశాఖ అధికారులు తెలిపారు.
టాప్ హెడ్ లైన్స్
ట్రెండింగ్ వార్తలు
